ކަސިޔާރު ފިކުރީ ރާޅުތަކުން ވިސްނުންތައް ސަލާމަތްކުރަންޖެހޭ: ރައީސް

ކަސިޔާރު ފިކުރީ ރާޅުތަކުން އަދުގެ ޖީލުތަކުގެ ހިތްތަކާއި ވިސްނުންތައް ސަލާމަތްކުރަން ބުރަ މަސައްކަތްތަކެއް ކުރަންޖެހޭކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހުއްރިއްޔާ ޑރ. މުޙައްމަދު މުޢިއްޒު މިހެން ވިދާޅުވީ ޤައުމީ ދުވަހުގެ ރަސްމީ ޖަލްސާގައި ވާހަަކަފުޅުދައްކަވަމުންނެވެ.

ދަރުބާރުގޭގައި ބޭއްވި މިއަހަރުގެ ޤައުމީ ދުވަހުގެ ރަސްމީ ޖަލްސާގައި ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ވިދާޅުވީ ދިވެހިންގެ އައިޑެންޓިޓީ އާލާކުރުމުގެ ވާހަކަ ދައްކާއިރު ސަމާލުކަމަށް ގެންނާންޖެހޭ މުހިންމު އެއް ޙަޤީޤަތަކީ ޤައުމުގެ އެއް މާނައަކީ މީހުންކަންކަމަށެވެ.
އަދި ޤައުމެއް ސަލާމަތްކުރުމުގައި އެންމެ މުހިންމު އެއް ކަމަކީ މީހުން ސަލާމަތްކުރުންކަންކަމަށާއި ޤައުމެއްގެ މީހުންނަށް އަމާޒުކޮށް ހިންގޭ ދީނާ ޚިލާފު، ޤައުމާ ދެކޮޅު، މިނިވަންކަމަށް ނުރައްކާތެރިކަން ބޮޑު އެތައް ކަމެއް ހުންނަކަން ރައީސް ފާހަގަކުރެއްވިއެވެ.

ރައީސް ވިދާޅުވީ އެ ކަންކަމުން ބޮޑެތި ފިކުރީ ކާރިސާތައް އައިސް ޤައުމުތައް އެފުށް މިފުށަށް ޖެހެމުންދާކަމަށާއި އެންމެ ބޮޑު ފުރޮޅުންތަކެއް މި ގޮތުން އައީ ގްލޯބަލައިޒޭޝަން ނުވަތަ ބަވަނަކުރުމުގެ ޠޫފާނުގެ ތެރޭންކަމަށެވެ.

"ޙަޤީޤަތުގައި މި ކަންކަމުގެ އެންމެ ފުނުގައި ހުންނަނީ ބާރުގަދަ ގައުމުތަކުން އިތުރަށް ބާރުވެރިވާން އެކަށައަޅައިފައި ހުންނަ އެޖެންޑާތައް. އެކަންކަން އަޅުގަނޑުމެންގެ މައްޗަށް ތަންފީޒުވާ އިރު އޭގެ ވަރަށް ބޮޑެތި ނޭދެވޭ އަސަރުތައް ކުރޭ. އެންމެ ބޮޑު ނުރައްކަލަކީ މިއީ ފިކުރުތަކެއް. ލޮލަށް ނުފެންނަ އޮއިވަރުތަކެއް"ރައީސް ވިދާޅުވިއެވެ.

ރައީސް ވިދާޅުވީ މި ފަދަ އޮއިވަރުތަކުގައި ޅަ ޖީލުތައް ބެހިގެންދާ އިރު، އެހެން އެކަން ވާކަން އިޙްސާސްކުރެވޭނީ ވަރަށް މަދުބަޔަކަށްކަމަށެވެ. މި ފަދަ އޮއިވަރުތަކުގައި ޤައުމުގެ އެއްބައިވަންތަކަން ފުނޑުފުނޑުކޮށްލެވޭ ކަމަށާއި އެކަމަށްޓަކާ އެތަނެއްގެ ޤަދަރުވެރީންނާއި ދީނުގެ ޢިލްމުވެރީންގެ އަގުވައްޓާލެވޭކަމަށްވެސް ރައީސް ވިދާޅުވިއެވެ.

"ދީން ދިފާޢު ކުރުމުގެ އެންމެ ބޮޑު ޤާނޫނީ ބާރެއް އޮންނަނީ ޤައުމުގެ ވެރީންގެ ކިބައިގައި ކަމަށްވާތީ ވެރީންގެ އަގުވައްޓާލެވޭ. މުއައްސަސާތައް ޤުރުބާންކޮށްލެވޭ. ސޯޝަލް މީޑިޔާއާއި އެ ނޫންވެސް މީޑިޔާގެ ވަސީލަތްތައް މެދުވެރިކޮށް އުފެއްދޭ ތަފާތު އުފެއްދުންތަކުން ޤައުމުގެ މުޅި ޖަމާޢީ ސިކުނޑި ވިހަކޮށްލެވޭ. ކުޑަކުދީންނާއި ޒުވާނުންނާއި ހަރުމީހުންނަށް ދާންދެން ދީނާ ޚިލާފު، ޤައުމަށް ގެއްލުންހުރި އެތައް ވިސްނުންތަކަކާއި އަމަލުތަކެއްގެ ކަނޑަށް ޣަރަޤުކޮށްލެވޭ" ރައީސް ވިދާޅުވިއެވެ.

ރައީސް ޑރ. މުޢިއްޒު ވިދާޅުވީ ރަށްގިރުމާއި އުދައެރުމުން ރާއްޖޭގެ ރަށްތައް ސަލާމަތްކުރަން މަސައްކަތްކުރާ ފަދައިން، ކަސިޔާރު ފިކުރީ ރާޅުތަކުން އަޅުގަނޑުމެންގެ ޖީލުތަކުގެ ހިތްތަކާއި ވިސްނުންތައް ސަލާމަތްކުރަން ބުރަ މަސައްކަތްތަކެއް ކުރަން ޖެހޭކަމަށެވެ. އަދި މިކަމުގައި ކޮންމެ ބެލެނިވެރިއެއް، ކޮންމެ މުދައްރިސެއް އަދި ކޮންމެ ރައްޔިތެއްގެ އިސްނެންގެވުމަށް ރައީސް ވަނީ އިލްތިމާސްކުރައްވާފައެވެ.

ރައީސް ޑރ.މުޢިއްޒު ވިދާޅުވީ ފިކުރުތަކާއި ނުރައްކާތަކުގެ ދުނިޔޭގައި މިއަދު ބޭނުންވަނީ މި ކަންކަމުން ފިލާވަލު ލިބިގަނެ ޤައުމުގެ ޙައްޤުގައި ހޭލާތިބުންކަމަށެވެ.

މި ލޮބުވެތި ދިވެހި ޤައުމުގެ ޤައުމިއްޔަތު ހިމާޔަތްކޮށް އިޔާދަކުރުމަށް ޢަޒުމު ކަނޑައަޅާ އެންމެން އެކަތިގަނޑަކަށްވެ ކަމަރު ބަނުމަށް ގޮވާލައްވާ ރައީސް ވަނީ އެކަމަށްޓަކައި ހުރިހާ ދިވެހިރައްޔިތުން ގުޅިގެން އެކަތިގަނޑަކަށް ވެގެން އިޞްލާޙުކުރުމުގެ މަގުން ހަލުވިފިޔަވަޅުތަކެއް އެޅުމަށް އެދިވަޑައިގަންނަވާފައެވެ. އަދި އެ މަސައްކަތުގައި ދިވެހިރާއްޖޭގެ ކޮންމެ ރައްޔިތެއްގެ އެއްބާރުލުމާއި އެހީތެރިކަން ރައީސް އެދިވަޑައިގެންނެވިއެވެ.