މާލެ ސިޓީގައި ހުކުރު ނަމާދުކުރާ މީހުންގެ ދަފްތަރު އެކުލަވާލުމަށް އިންޓަވިއުތަކެއް ބާއްވަނީ
-
ދެން މާލެ ސަރަހައްދުގައި އިމާމްވެ ހުކުރު ކުރެވޭނީ އައު ދަފްތަރުގައި ހިމެނޭ އިމާމުންނަށް
-
މިމަހުގެ 15 ވަނަ ދުވަހުގެ ކުރިން އިންޓަވިއުގައި ބައިވެރިވުމަށް ފުރުޞަތު ހުޅުވާލާފައިވޭ
މާލެ ސިޓީގައި އިމާމުވެ ހުކުރު ނަމާދުކުރާ މީހުންގެ ދަފްތަރު އެކުލަވާލުމުގެ ގޮތުން އިންޓަވިއުތަކެއް ބޭއްވުމަށް ހަމަޖެހިފައިވާކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއްޖެއެވެ.
އިސްލާމީ ކަންތައްތަކާބެހޭ ވުޒާރާއިން ވިދާޅުވީ، މާލެ ސިޓީގައި ހުކުރު ނަމާދުކުރާ އިމާމުންގެ ދަފްތަރު އެކުލަވާލުމުގެ ގޮތުން އިމާމުންގެ ފެންވަރު ވަޒަންކުރުމަށް އިންޓަވިއުތަކެއް ބޭއްވުމަށް ހަމަޖެހިފައިވާ ކަމަށެވެ. އަދި ދެން ދަފްތަރު އެކުލަވާލާއިރު މާލޭގައި ހުކުރުކުރުމުގެ ފުރުޞަތު ދޭނީ އިންޓަވިއުއަށްފަހު ހުކުރުކުރެވޭނެކަމަށް ވުޒާރާއިން ކަނޑައަޅާ އިމާމުންނަށްކަމަށް އެ ވުޒާރާއިން ވިދާޅުވިއެވެ.
އިސްލާމީ ކަންތައްތަކާބެހޭ ވުޒާރާއިން ވިދާޅުވީ، މިމަހުގެ 15 ވަނަ ދުވަހުގެ ކުރިން އިންޓަވިއުގައި ބައިވެރިވުމަށް އިމާމުންނަށް ފުރުޞަތު ހުޅުވާލާފައިވާ ކަމަށެވެ. އަދި އިންޓަވިއުގައި ބައިވެރިވުމަށް ހުށައަޅަންޖެހޭ ގޫގުލް ފޯމު އިސްލާމީ ކަންތައްތަކާބެހޭ ވުޒާރާގެ ވެބްސައިޓުން ލިބޭނެކަމަށް މަޢުލޫމާތު ދެއްވިއެވެ.
މާލޭ ސިޓީގެ މިސްކިތްތަކުގައި ހުކުރު ޚުޠުބާ އިއްވާ ފަރާތްތަކުގެ ދަފްތަރު މުރާޖަޢާކޮށް އަލުން އެކުލަވާލަން ނިންމާފައި މިވަނީ ޚުޠުބާ އިއްވުމުގައި ބައެއް އިމާމުން ކުށްކިޔާ ކަމަށް ބުނެ، ބައެއް ފަރާތްތަކުން ކަންބޮޑުވުން ފާޅުކުރުމާއި ގުޅިގެންނެއެވެ.
އިސްލާމީ ކަންތައްތަކާބެހޭ ވުޒާރާއިން ދަނީ ރާއްޖޭގެ މިސްކިތްތަކުގައި މަސައްކަތްކުރާ އިމާމުން ތަމްރީންކުރުމުގެ ގޮތުން ޚަޠީބުން ތާޒާކުރުމުގެ ޕްރޮގުރާމްތަކެއްވެސް ކުރިއަށް ގެންދަމުންނެވެ. އަދި ޒުވާން ޚަޠީބުން ތަމްރީންކުރުމަށްވެސް ސްކޫލް ނިންމާ ޒުވާނުންނަށް އަމާޒުކޮށްގެން ޕްރޮގުރާމްތަކެއް ދަނީ ކުރިއަށް ގެންދަމުންނެވެ.