ރައީސްގެ ތަޤްރީރުން އަދުގެ ޖީލަށް އެތައް ފިލާވަޅުތަކެއް!

ފަޚްރުވެރި ދިވެހީންގެ ޤައުމީ ރޫޙު އާލާކޮށްލަމާހޭ؟
ފަޚްރުވެރި ތާރީޚު ދައްކާ ހެކިތަކަށް އަދު ވިސްނަމާހޭ؟


ޤައުމީދުވަހު ބޭއްވި ރަސްމީ ޖަލްސާގައި ޤައުމާ މުޚާޠަބުކުރައްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ތަޤުރީރު ފެއްޓެވީ އުސްތާޛުލްޖީލް އަލްމަރްޙޫމް މުޙައްމަދު ޖަމީލު ދީދީގެ ޅެމެއްގެ ބައިތަކުންނެވެ.

ރައީސުލްޖުމްހޫރިއްޔާ ޑރ.މުހައްމަދު މުޢިއްޒު މި ބައިތު ސިފަކުރެއްވީ ވަރަށް މާނަ ފުން ނިދާއެއްގެ ގޮތުގައެވެ. އެމަނިކުފާނުގެ ތަޤުރީރު ފެއްޓެވި ގޮތާމެދު ޚިޔާލު ފާޅުކުރައްވަމުން ދިވެހި ތާރީޚު ދިރާސާކުރައްވާ، ޤައުމީ ޚިދުމަތްތެރިއެއްކަމަށްވާ ކަށިމާ އަޙުމަދު ޝާކިރު ވިދާޅުވިއެވެ.

"ޤައުމީ ރޫޙު އަޅުގަނޑުމެން އާލާކުރަން ވެއްޖެކަމާ، އަޅުގަނޑުމެންގެ ފަޚުރުވެރި ތާރީޚާމެދު ވިސްނަންވެއްޖެކަމާ، އެ ދުރުމާޒީ ބަލަމުން މިއަދާ ހަމަޔަށް ގެންނަންވެއްޖެކަމާ، މި ހުރިހާކަމެއް ވަރަށް ފުރިހަމަޔަށް ވިދާޅުވެދެއްވާފަ ދެން އޭގެ މިސާލުތައް ދައްކަވަން ފެއްޓެވި". ކަށިމާ އަޙްމަދު ޝާކިރު ވިދާޅުވިއެވެ.

ތެދެކެވެ. ރައީސުލްޖުމްހޫރިއްޔާ އޭގެ ފަހުން އެންމެ ފުރަތަމަވެސް ފެއްޓެވީ ޤައުމީ ޚިދުމަތްތެރިންގެ ވާހަކައެވެ. ޤައުމިއްޔަތު ނެގެހެއްޓުމަށް އިސްލާމްދީނާ ދިވެހި ބަހަށް ޚިދުމަތްކުރުމުގައި ނަމޫނާ މިސާލެއް އެންމެހާ ދިވެހިންނަށް ރައީސުލްޖުމްހޫރިއްޔާ ދެއްކެވިއެވެ. އެ މިސާލަކީ ފަޟީލަތުއްޝައިޚް އަލްމަރްޙޫމް ޙުސައިން ޞަލާޙުއްދީނެވެ. ހުސައިން ޞަލާޙުއްދީންގެ ޚިދުމަތް ސިފަކުރެއްވީ ދިވެހި ޤައުމިއްޔަތު ނެގެހެއްޓުވުމަށް އިސްލާމްދީނާ ދިވެހި ބަހަށް އިސްކަންދެއްވި ބޭފުޅެއްގެ ގޮތުގައެވެ.

ރައީސް ޑރ.މުހައްމަދު މުޢިއްޒުގެ ތަޤުރީރުގައި ދެން ދިވެހިންނާ ކުރެއްވީ ސުވާލުތަކެކެވެ. ސުވާލަކަށްފަހު ސުވާލެއް ކުރައްވަމުން ގެންދެވީ އަޑުފުޅަށް ބާރު ލައްވަމުންނެވެ.

"މާ ކަނޑެއްގެ މެދުގައި މި ރާއްޖެ ދިފާޢުކޮށްގެން ދިވެހީންނަށް މިހާ ދުވަހު ތިބެވުނީ، ކޮންކޮން ސަބަބުތަކެއް އެކަމުގައި ހުރެގެންބާ؟ ހަމަ އެއްވެސް ބާރަކުން މި ފަސްގަނޑަށް ނުފޫޒު ފޯރުވާއިރަށް، އެ ބައެއްގެ ވަރަ ބިންދާލުމުގެ ތޫނުކަމާއި، އެ ހިތްވަރު މި ތިރި ރަށްތަކުގައި ދިރިއުޅުނު ކާބަފައިން ލިބިގަތީ ކިހިނެއްބާ؟" ރައީސުލްޖުމްހޫރިއްޔާ ސުވާލުކުރެއްވިއެވެ.

މި ސުވާލުތަކަށްފަހު އެމަނިކުފާނު ދިވެހިންގެ ކިބައިން އެދިވަޑައިގަންނަވާ ކަންކަން ބަޔާންކުރެއްވިއެވެ.

"ދިވެހީންނަކީ އަބަދުވެސް މިނިވަންކަމުގެ ބަޠަލުން. ދިވެހީންގެ ޠަބީޢަތަކީ މިނިވަންކަމާއެކު ދެމިތިބުން. އަޅުގަނޑުގެ މުޅި ސިޔާސަތު ބިނާކުރަނީ، މި އަސާސްގެ މައްޗަށް. މިއަދު ރާއްޖޭގައި ބޭރުގެ ސިފައިން ޤާއިމުވެ ނެތީ އެހެންވެގެން. މިއަދު ރާއްޖެ ބަލަހައްޓަން އެންމެ ޒަމާނީ ޓެކްނޯލޮޖީއާއެކު އުޅަނދުތައް އުދުހެމުން އެދަނީ އެހެންވެގެން. އަދި މިއަދު ދިވެހި ޤައުމިއްޔަތުގެ ޚާއްޞަ ނިޒާމެއް ތަޢާރަފުކުރެވި، އެ ދާއިރާގެ ތަޢުލީމާއި ހޭލުންތެރިކަން އާންމުކުރަމުން މިދަނީ މި މުހިންމު ބޭނުމުގައި. ދިވެހި ޤައުމިއްޔަތުން ދަސްވާނީ ދިވެހިވަންތަކަން ކުރިއަރުވާން. މި ލޮބުވެތި ދިވެހިރާއްޖެ ނުވަތަ ދިވެހި ފަސްނގަޑާ ދިވެހީން ހަވާލުވާން." ދިވެހި ރައްޔިތުންނަށް ޔަގީންކަން ދެއްވާ އަޑުފުޅަކުން ވާހަކަފުޅުދައްކަވަމުން ވިދާޅުވިއެވެ.

ޤައުމީ ދުވަހު ރައީސުލްޖުމްހޫރިއްޔާ ދިވެހި ފަސްގަނޑުގެ އަހުލުވެރިންނަށް ދެއްވި ޔަގީންކަމަކީ ޤައުމުގެ ވަލިއްޔުލްއަމްރުގެ ހައިސިއްޔަތުން އެންމެ އިންޗިއަކަށްވެސް ފަހަތަށް ޖެހިވަޑައި ނުގަންނަވާނެކަމުގެ ޔަގީންކަމެވެ. ދުނިޔޭގެ ބޮޑެތިބާރުތަކުގެ ކުރިމަތީގައި ދިވެހިރާއްޖެ ކުޑަކަކޫ ނުޖަހާނެ މިންވަރަށް ރާއްޖޭގެ ކަންކަން ބައްޓަންކުރައްވަމުން ގެންދަވާކަމުގެ ހެކިތައް ދެއްކެވިއެވެ. ދިވެހި ފަސްގަނޑު ހިމާޔަތްކުރުމުގައި އެންމެ އިސްސަފުގައި އެމަނިކުފާނު އެބަހުންނެވިކަމުގެ ޔަގީންކަން ދިވެހިންނަށް ދެއްވީ ދިރިހުރި މިސާލުތަކާއެކުގައެވެ.

ރައީސުލް ޖުމްހޫރިއްޔާއަކަށް ހުންނެވިނަމަވެސް މާޒީގެ އަގުހުރި ޚިދުމަތްތެރިން އަގުހުރި ފިލާވަޅުތަކުގެ މަތީގައި ދެމިހުންނަވާނެކަންވެސް އެމަނިކުފާނުގެ ވާހަކަފުޅުން ސާބިތުވަމުންދިޔައެވެ. އަލްއުސްތާޛު އަލްމަރުޙޫމް އިބްރާހީމް ޝިހާބު ވިދާޅުވެފައިވާ ބަސްފުޅެއް ތަކުރާރުކުރެއްވިއެވެ.

"ސަލާމަތް ބުއްދިޔަކާއި، ހެޔޮ ވިސްނުމެއް ލިބިފައިވާ ކޮންމެ މީހަކުމެ ގަބޫލުކުރާނެޔޭ. އަމިއްލަކަން ލިބިގެންވާ، ވަކި ޤައުމެއްގެ ސިފައިން ސިފަ ލިބިގެން ތިބި، ކޮންމެ ބަޔަކުމެ އެންމެ ޙުރުމަތްތެރިކޮށް ހިތާ ތަކެއްޗަކީ އެ ބައެއްގެ ދީނޭ. އެ ބައެއްގެ ބަހޭ. އެ ބައެއްގެ ތާރީޚޭ. އަދި އެ ބައެއްގެ ސަޤާފަތޭ." ރައީސް ޑރ.މުޢިއްޒުގެ ތަޤުރީރުގައި ވިދާޅުވިއެވެ.

އެއަށްފަހު ރައީސުލްޖުމްހޫރިއްޔާ ފެއްޓެވީ ދިވެހި ޖުމްހޫރީ ހަޔާތުގެ ރައީސަކު ޤައުމީ މަޝްރޫޢަކަށް ހައްދަވައިގެން މިހާތަނަށް ނުފައްޓަވާ ކަމެއްގެ ވާހަކައެވެ. އެއީ ދިވެހި ޤައުމިއްޔަތު އިޢާދަކުރުމުގެ ޤައުމީ ހަރަކާތް ފެއްޓެވި ވާހަކައެވެ. ދިވެހި ކާބަފައިންގެ އުޅުންހުރި ރީތި ދިރިއުޅުން އަނބުރާ ގެންނެވުމަށް ޤައުމީ ކެމްޕެއިނެއް ފަށްޓަވާ ވާހަކައެވެ. މިކަމުގެ މަންފާ އޮތީ ދިވެހީންނަށެވެ.

ދިވެހީން ދިވެހިގެ ދީނަށް އުޅޭ، ދިވެހީން ދިވެހިންގެ ގޮތުގައި އުޅޭ މުސްތަޤުބަލެއް ހޯއްދަވައިދެއްވުމަށް މިނުކުންނެވީ ރައީސް ޑރ.މުހައްމަދު މުއިއްޒުއެވެ. ޤައުމީ ދުވަހު ދިވެހި ޤައުމުގެ ރައްޔިތުންގެ ކުރިމަތީގައި ދެއްކެވީ މި ވާހަކައެވެ.

ރައީސުލް ޖުމްހޫރިއްޔާ ޑރ.މުހައްމަދު މުއިއްޒުގެ ތަޤުރީރު އަޑުއައްސަވާފައި ހިތްޕުޅުގައި އުފެދުނު ޝުޢޫރުތައް ބަޔާންކުރައްވަމުން ދިވެހި ތާރީޚު ދިރާސާކުރައްވާ ކަށިމާ އަޙުމަދު ޝާކިރު ވިދާޅުވިއެވެ.

"ރައީސްގެ ތަޤުރީރުގައި ފުރިހަމަޔަށް އިޝާރާތްކުރައްވާފައި އެބައޮތް ފަތިސްނަމާދަށް ތެދުވާން. އެއިން މިދައްކައިދެނީ އަޅުގަނޑުމެން އަޅުގަނޑުމެންގެ ދީނަށް ހުރުމަތްތެރިކޮށް ހިތާ ބައެއްކަންކަން. އަޅުގަނޑުމެންނަކީ ހަމައެކަނި ދީނަށް ކަމޭހިތާ ބައެކޭ ވިދާޅުވުމުގެ ބަދަލުގައި އަޅުގަނޑުމެންގެ އަޚުލާގީ ރީތި ސިފައަކުން މިސާލު އެޖެއްސެވީ." ކަށިމާ އަޙްމަދު ޝާކިރު ވިދާޅުވިއެވެ.

ރައީސް ޑރ.މުޢިއްޒުގެ ތަޤުރީރުގައި ހިމެނެނީ އެތައް މިސާލުތަކެކެވެ. ދިވެހިން އުޅުނު ރީތި ދިރިއުޅުމުގެ މިސާލުތަކެވެ. އަޑުއަހަން އިން ކޮންމެ މީހެއްގެ ހިތަށް އަސަރުކުރުވީ އެމަނިކުފާނުގެ މުޅި ތަޤުރީރުގައި މިސާލުތައް ޖައްސަވާފައިވާތީއެވެ. ކޮންމެ މީހެއްގެ ދިރިއުޅުމާ ގުޅޭ މިސާލުތަކަކަށްވާތީއެވެ. އެއިން ކޮންމެ މިސާލަކާމެދު އަޑުއަހަން އިން މީހަކަށް ވިސްނަން މަޖުބޫރުކުރުވިއެވެ.

ދިވެހި ޤައުމާ މުޚާތަބުކުރައްވާ ރައީސް ޑރ.މުހައްމަދު މުޢިއްޒު ތަޤުރީރު ކުރައްވަމުން ގެންދެވީ ހިތްޕުޅުގައި އުފެދިފައިވާ އެދުންތަކެއް ބަޔާންކުރައްވަމުންނެވެ. ދިވެހީން ދިވެހީންގެ ގޮތުގައި ދެމި ތިބުމަށާއި، އިސްލާމްދީނުގެ ތެދުމަގުގައި ސާބިތުވެ ތިބުމަށް ހަނދާންކޮށްދެއްވަމުންނެވެ. އެމަނިކުފާނުގެ މުޅި ތަޤުރީރުގައި އެތައް ފަހަރު އިސްލާމްދީނަށް އިޝާރާތްކުރެއްވިއެވެ.

"وَإِنَّكَ لَعَلَىٰ خُلُقٍ عَظِيم'' "އަދި ހަމަ ކަށަވަރުން ކަލޭގެފާނު ވާކަން ކަށަވަރީ މަތިވެރިވެގެންވާ އަޚްލާޤެއްގެ މަތީގައޭ.'' ޙަޤީޤަތުގައި ޢަޤީދާއާއި ޢިބާދާތުގެ މުޖުތަމަޢެއް އިޞްލާޙު ކުރުމުގައި، އެންމެ މުހިންމު ދައުރެއް އަދާކުރާނީ، އެ ބައެއްގެ އަޚްލާޤު. ޤައުމެއްގައި ނަމަ، އެ ޤައުމެއްގެ ކޮންމެ ފަރުދެއްގެ އަޚުލާޤު. ދިވެހި އައިޑެންޓިޓީގެ ވާހަކަ ދައްކާއިރު، މިއީ މިއަދު އަޅުގަނޑު ވަރަށް ބާރުލާން ބޭނުންވާ ނުކުތާއެއް. " ރައީސް ޑރ.މުހައްމަދު މުޢިއްޒު ތަޤުރީރު ކުރައްވަމުން ވިދާޅުވިއެވެ.

ރައީސުލްޖުމްހޫރިއްޔާގެ ތަޤުރީރު ކޮންމެ މީހަކުވެސް އަޑުއެހީ ފޫހިކަމެއް ނެތިއެވެ. ގަޑީގެ ކަށި ހިނގަމުންދާ ލަސްކަން އިހުސާސު ނުކުރެވިއެވެ. ޤައުމު ދެކެ ލޯބިވާ ފަރުދެއްގެ އިޚުލާސްތެރި އެދުންތައް އަޑުއަހަންތިބީ ޤައުމީ ރޫޙެއްގައެވެ. ރައީސް ޑރ.މުހައްމަދު މުއިއްޒުގެ ތަޤުރީރު ނިންމަވާލެއްވީ ހުރިހާ ދިވެހިރައްޔިތުން ގުޅިގެން، އެކަތިގަނޑަކަށް ވެގެން އިޞްލާޙުކުރުމުގެ މަގުން ހަލުވި ފިޔަވަޅުތަކެއް އެޅުމަށް އެދިވަޑައިގަންނަވަމުންނެވެ. ދިވެހިރާއްޖޭގެ ލޮބުވެތި ކޮންމެ ރައްޔިތެއްގެ އެއްބާރުލެއްވުމާއި އެހީތެރިކަމަށް މިކަމުގައި އެމަނިކުފާނު އެދިވަޑައިގަންނަވާކަމުގެ އާދޭހާއެކުގައެއެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ތަޤުރީރު ނިމުމާއެކު ދަރުބާރުގޭ ރަންނަ ބަނޑޭރި މާލަމުގައި ތަރުހީބުގެ އަޑު ބާރުވެގެންދިޔައެވެ.