އިއްޔެއަކީ ފަހުގެ ތާރީހެއްގައި އެންމެ ގިނަ ޒުވާން ހަތީބުން އިމާމުވެ ހުކުރުކުރި ދުވަސް

އިއްޔެއަކީ، ފަހުގެ ތާރީޚެއްގައި އެންމެ ގިނަ ޒުވާން ޚަޠީބުން ރާއްޖޭގައި އިމާމުވެ ހުކުރު ނަމާދު ކުރި ދުވަސްކަމަށް އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ގްރޭޑް 10، 11 އަދި 12ގަައި ކިޔަވަމުންދާ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރު ކުރުމުގެ ހުއްދަ ދިނުމަށް ސަރުކާރުން އަންނަނީ ޒުވާން ޚަޠީބު ޕްރޮގްރާމްގެ ނަމުގައި ހާއްސަ ޕްރޮގްެރާމެއް ހިންގަމުންނެވެ.

އިސްލާމީ ކަންތައްތަކާބެހޭ ވަޒީރު ޑރ.މުހައްމަދު ޝަހީމް އަލީ ސައީދު ވިދާޅުވީ އިއްޔެއަކީ މި ފަހުގެ ތާރީހެއްގައި މާލެ ސަރަހައްދުގައި އެންމެ ގިނަ ޒުވާން ޙަތީބުން އިމާމުވެ ހުކުރު ކުރި ދުވަސްކަމަށެވެ. އަދި މި ޒުވާން ހަތީބުންނަކީ ސަރުކާރުން ވޭތުވެދިޔަ ދުވަސްތަކުގައި ކުރިއަށް ގެންދެވި ހަތީބުން ތަމްރީނުކުރުމުގެ ޚާއްޞަ ޕްރޮގްރާމު ފުރިހަމަކޮށްފައިވާ ދަރިވަރުންކަމަށްވެސް ވަޒީރު ވިދާޅުވިއެވެ.

Mi'adhaki mi fahuge thaareekheh ga Male sarahadhuga emme gina Zuvaan Khatheebun Imaamuve hukuru kuri dhuvaheh. Mi emmehaa kudhinaki Zuvaan Khatheeb Programun Thamreen hoadhai Sanadhu haasil kuri kudhin. Alhamdhu Lillah. https://t.co/mlcFJHxWaD

— Mohamed Shaheem Ali Saeed (@Mohamedshaheem1) September 6, 2024

މާލެ ސަރަހައްދުގެ 12 މިސްކިތެއްގައި ޒުވާން ޙަތީބުން އިމާމުވެ ވަނީ ހުކުރުކޮށްފައިއެވެ. އެ މިސްކިތްތަކަކީ މަސްޖިދު މުހައްމަދު، މަސްޖިދު އަމީލް ޖަލީލް، މަސްޖިދު އުސްމާން، މަސްޖިދު ސަލާމް، މަސްޖިދު ހަސަން އާދަމް، މަސްޖިދުލް އަޞްދީގާ، މީގެ އިތުރުން މަސްޖިދުއް ސުލްތާން ހަސަން އިއްޒުއްދީން، މަސްޖިދު އިސްކަންދަރު، މަސްޖިދުލް ޖަލާލުއްދީން މިިސްކިތް ހިމެނެއެވެ. މީގެ އިތުރުން މަސްޖިދުލް ފުރްގާން، މަސްޖިދުއްސުލްތާން މުހައްމަދު ބިން އަބްދުﷲ މިސްކިތާއި މަސްޖިދުއް ނޫރު މިސްކިތް ހިމެނެއެވެ.

ޒުވާން ޚަޠީބު ޕްރޮގްރާމަކީ ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރު ކުރުމުގެ ހުއްދަ ދިނުމަށް ކުރިއަށްގެންދާ ޕްރޮގްރާމެކެވެ. އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާ މިޕްރޮގްރާމަކީ ރައީސް ޑރ. މުހައްމަދު މުޢިއްޒުގެ އިރުޝާދުގެ ދަށުން ކުރިއަށްގެންދާ ޕްރޮގްރާމެކެވެ. އެގޮތުން މިހާތަނަށް ހިންގި 2 ޕްރޮގްރާމުން 300އަށްވުރެ ގިނަ ޚަޠީބުން ތަމްރީންކޮށްފައިވާކަމަަށް ވަޒީރު ވިދާޅުވިއެވެ.

މިޕްރޮގްރާމަށް ވަރަށް ބޮޑު ތަރުހީބެއް ލިބެމުން އަންނަކަމަށާއި، މިޕްރޮގްރާމުން ސަނަދު ހާސިލްކުރާ ޚަޠީބުން މުޖްތަމަޢުންވެސް ވަރަށް ބޮޑަށް ބަލައިގަނެފައިވާކަމަށް އިސްލާމީ ކަންތައްތަކާއި ބެހޭ ވުޒާރާއިން ވިދާޅުވެއެވެ. ސަރުކާރުގެ އަމާޒަކީ މި ދައުރުގެ ތެރޭގައި 1000 ޚަތީބުން ތަމްރީނުކުރުމެއެވެ.

މި ޕްރޮގްރާމްގެ މައިގަނޑު މަޤްޞަދަކީ ދިވެހިރާއްޖޭގެ އެކި ކަންކޮޅުތަކުގައި އިމާމުންގެ ދަތިކަން ޙައްލުކުރުމެވެ. މީގެ އިތުރުން، ޒުވާނުންގެ މެދުގައި އިމާމުކަމާއި ޚުޠުބާ ކިޔެވުމަށް ޝައުޤުވެރިކަން އުފެއްދުމާއެކު، އިސްލާމްދީނަށް ލޯބި ކުރުމުގެ ރޫޙު އާލާކުރުމަކީވެސް މި ޕްރޮގްރާމްގެ މުހިންމު އަމާޒެކެވެ. މި މަސައްކަތުން، ރާއްޖޭގެ މިސްކިތްތަކުގައި ޤާބިލު އިމާމުން ތަމްރީނުކޮށް، ދީނީ ޢިލްމުވެރިންގެ އާ ޖީލެއް އުފެއްދުމަށް މަގުފަހިވެގެންދާނެކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ.