ނުކުޅެދުންްތެރިކަން ހުންނަ މީހުންގެ ހައްގުތަކަށް ޤާނޫނަށް ބަދަލު ގެންނަން މަސައްކަތްކުރާނަން: ޑރ. އަނާރާ

ނުކުޅެދުންތެރިކަން ހުންނަ މީހުންގެ ޙައްޤުތައް އިތުރަށް ކަށަވަރުކުރުމަށް ޤާނޫނަށް ގެންނަންޖެހޭ ބަދަލުތައް ގެނައުމަށް ރައްޔިތުންގެ މަޖިލީހުގެ ތެރެއިން ކޮށްދެވެންއޮތް މަސައްކަތެއް ކޮށްދެއްވާނެކަމަށް ހުރާ ދާއިރާގެ މެންބަރު ޑރ. އަނާރާ ނަޢީމް ވިދާޅުވެއްޖެއެވެ.

ޑރ. އަނާރާ މިހެން ވިދާޅުވީ ނުކުޅެދުންތެރިކަން ހުންނަ މީހުންގެ ޙައްޤުތަކާގުޅޭ ސްޓޭކްހޯލްޑަރ ފޯރަމް ފެށުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ.

ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމުންން އިސްނަގައިގެން ބާއްވާ ނުކުޅެދުންތެރިކަން ހުންނަ މީހުންގެ ޙައްޤުތަކާގުޅޭ ފޯރަމް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ރައްޔިތުންގެ މަޖިލީހުގެ ހުރާ ދާއިރާގެ މެންބަރު ޑރ. އަނާރާ ނަޢީމް ވިދާޅުވީ ރާއްޖޭގައި ނުކުޅެދުންތެރިކަން ހުންނަ މީހުންނަށް މުޖުތަމަޢުގައި ޝާމިލްވެގެން އަމިއްލަ އުޅެވޭނެ ގޮތްތަކެއް ފަހިވާންޖެހޭކަމަށެވެ.

މަޖިލީހުގެ މެންބަރެއްގެ ޙައިސިއްޔަތުން ނުކުޅެދުންތެރިކަން ހުންނަ މީހުންނާ ވަރަށް ގާތުން މަސައްކަތްކުރަމުންދާކަން ފާހަކަުރައްވާ ޑރ. އަނާރާ ވަނީ ނުކުޅެދުންތެރިކަން ހުންނަ މީހުންގެ ޙައްޤުތައް ކަށަވަރުކުރުމަށް ޤާނޫނު އިސްލާހުކޮށްގެން ނަމަވެސް، މަޖިލީހުގެ ތެރެއިން ކުރެވެންހުރި ހުރިހާކަމެއް ކުރައްވާނެކަމުގެ ޔަޤީންކަން ދެއްވާފައެވެ.

ޑރ. އަނާރާ ވިދާޅުވީ އަތޮޅުތަކުގައި ދިރިއުޅޭ ނުކުޅެދުންތެރިކަން ހުންނަ ދިންނަށް ތަޢުލީމު އުނގެނުމުގެ ފުރުޞަތާއި ފަރުވާ ލިބުމުގައި ދަތިތައް އެބަހުރި ކަމަށެވެ.

"ނުކުޅެދޭ ކުޑަކުދިންނަށް އުނގެނުމުގެ ޙައްޤު ވަރަށް މުހިންމު. ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ގާނޫނުގައި އެފަދަ ކުދިންނަށް ކިޔެވޭނެ މަގު ފަހިކޮށްދޭންޖެހޭނެކަމަށް ބަޔާންކޮށްފައިވޭ. އަޅުގަނޑު އުންމީދުކުރަނީ ސަރުކާރުން އެކަން ކޮށްދޭނެކަމަށް. ސަރުކާރުން ޚާއްސަ ސަމާލުކަމެއްދެއްވާ އެފަދަ ކަންކަމަށް." ޑރ. އަނާރާ ވިދާޅުވިއެވެ.

އެއް ދުވަހުގެ މުއްދަތަށ ްކުރިއަށްގެންދާ ނުކުޅެދުންތެރިކަން ހުންނަ މީހުންގެ ޙައްޤުތަކާގުޅޭ ސްޓޭކްހޯލްޑަރ ފޯރަމްގައި ނުކުޅެދުންތެރިކަން ހުންނަ މީހުންގެ ޙައްޤުތައް މިހާރު ރާއްޖޭގައި އޮތް ހާލަތާއި، އެފަދަ މީހުންނަށް ދިމާވާ ގޮންޖެހުންތަކާމެދު ހޭލުންތެރިކުރެވޭނެކަމަށް އެޗްއާރުސީއެމުން ވިދާޅުވެއެވެ.

މި ފޯރަމްގައި ސަރުކާރުގެ އިދާރާތަކާއި ކުންފުނިތަކާއި ޖަމްޢިއްޔާތައް ހިމެނޭހެން 60 ފަރާތަކުން ބައިވެރިވެއެވެ. އަދި ތަފާތު ބާވަތްތަކުގެ ނުކުޅެދުންތެރިކަން ހުންނަ މީހުންވެސް ފޯރަމްގައި ބައިވެރިވެއެވެ.

ނުކުޅެދުންތެރިކަން ހުންނަ މީހުންގެ ޙައްޤުތަކާގުޅޭ ސްޓޭކްހޯލްޑަރ ފޯރަމް ކުރިއަށްގެންދަނީ އެޗްއާރުސީއެމުން އިސްނަގައިގެން ޔުނައިޓެޑް ސްޓޭޓްސް އެޖެންސީ ފޯ އިންޓަނޭޝަނަލް ޑިވަލޮޕްމެންޓް، ޔޫއެސްއެއިޑާއި އިންޓަނޭޝަނަލް ފައުންޑޭޝަން ފޯ އިލެކްޓޯރަލް ސިސްޓަމްސް، އައިއެފްއީއެސްއާ ގުޅިގެންނެވެ.