އަސްކަރީ ދާއިރާއިން އިތުރަށް ގުޅުން ބަދަހިކުރުމަށް ޗައިނާއާއެކު މަޝްވަރާކުރައްވައިފި

އަސްކަރީ ދާއިރާއިން އިތުރަށް ގުޅުން ބަދަހިކުރުމަށް ރާއްޖެއިން ޗައިނާއާއެކު މަޝްވަރާކުރައްވައިފިއެވެ.

މިމަޝްވަރާތައް ކުރައްވާފައިވަނީ ދިފާޢީ ވަޒީރު މުޙައްމަދު ޣައްސާން މަޢުމޫން، މިހާރު ޗައިނާއަށް ކުރައްވަމުން ގެންދަވާ ދަތުރުފުޅުގެ ތެރެއިން ޗައިނާގެ ދިފާޢީ ވަޒީރު ޑޮންގް ޖުންއާއެކު ބޭއްވެވި ބައްދަލުކުރެއްވުމުގައެވެ.

ވަޒީރު ޣައްސާން މަޢުމޫން، ޗައިނާއަށް ކުރައްވަމުންގެންދަވާ ދަތުރުފުޅަކީ 11 ވަނަ ބެއިޖިން ޝަންގް ޝަން ފޯރަމްގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. ޝަންގް ޝަން ފޯރަމަކީ އޭޝިޔާ ޕެސިފިކް ޤައުމުތަކުގެ އަސްކަރީ ދާއިރާގެ ވެރިން ބައިވެރިވާ ފޯރަމެކެވެ.

ސޯޝަލް މީޑިޔާގައި ހިއްސާކޮށްފައިވާ ޕޯސްޓެއްގައި ދިފާޢީ ވުޒާރާއިން ވިދާޅުވީ މިބައްދަލުކުރެއްވުމުގައި ރާއްޖެއާއި ޗައިނާއާ ދެމެދު އަސްކަރީ ދާއިރާއިން އިތުރަށް ގުޅުން ބަދަހިކުރުމަށް މަޝްވަރާކުރައްވާފައިވާ ކަމަށެވެ.

Minister of Defence, @mgmaumoon called upon the Minister of National Defence of the People’s Republic of China, Admiral Dong Jun on the sidelines of the 11th Beijing Xiangshan Forum.

During the meeting, the two ministers discussed avenues of strengthening defence cooperation… pic.twitter.com/rSz2wmKKDo

— Ministry of Defence (@MoDmv) September 13, 2024

މިބައްދަލުކުރެއްވުމުގައި ދިވެހިރާއްޖޭގެ ފަރާތުން ޗައިނާއަށް ކަނޑައަޅުއްވާފައި ހުންނަވާ ސަފީރު ޑރ. ފަޒީލް ނަޖީބްވެސް ބައިވެރިވެވަޑައިގެންނެވިއެވެ.

ދިވެހި އަސްކަރިއްޔާ އިތުރަށް ބާރުވެރިކޮށް ދިވެހީން އަމިއްލައަށް ދިވެހީންގެ ސަލާމަތީ ކަންކަން ބެލެހެއްޓުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވައުދުފުޅެކެވެ. އެވައުދުފުޅުގެ ދަށުން ރައީސުލްޖުމްހޫރިއްޔާވަނީ ރާއްޖޭގައި ފުރަތަމަ ފަހަރަށް ދިވެހި ސިފައިންގެ ޚިދުމަތަށް "އެއަރ ކޯ" ތައާރަފު ކުރައްވާފައެވެ. މިއާއެކު ވައިގެ މަގުން ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ގާބިލުކަން ދިވެހި އަސްކަރިއްޔާއަށް ވަނީ ލިބިގެންގޮސްފައެވެ.

އެއަރ ކޯއާއެކު ރާއްޖޭގައި ފުރަތަމަ ފަހަރަށް އަސްކަރީ ޑްރޯން ވެސް ބޭނުން ކުރަން ވަނީ ފަށާފައެވެ. އަދި ކުރިއަށް އޮތްތަނުގައި ޑްރޯން އިތުރުކޮށް، ކަނޑާއި އެއްގަމާއި ވައިގެ އުޅަނދުތައް ސިފައިންގެ ޚިދުމަތަށް އިތުރުކުރައްވާނެ ކަމަށްވެސް ރައީސުލްޖުމްހޫރިއްޔާވަނީ ވިދާޅުވެފައެވެ.