ތިން ބަހުން ޚިދުމަތްދޭ ކޯލް ސެންޓަރެއް އިސްލާމީ ޔުނިވަރސިޓީން ތަޢާރަފްކޮށްފި

3 ބަހުން ޚިދުމަތްދޭ ކޯލް ސެންޓަރެއް ދިވެހިރާއްޖޭގެ އިސްލާމީ ޔުނިވަރސިޓީގައި ތަޢާރަފްކޮށްފިއެވެ.

ދިވެހިރާއްޖޭގެ އިސްލާމީ ޔުނިވަރސިޓީން ވިދާޅުވީ މި ކޯލް ސެންޓަރަކީ ފުރަތަމަ ފަހަރަށް ރާއްޖޭގައި 3 ބަހުރުވައިން ޚިދުމަތްދޭ ކޯލް ސެންޓަރު ކަމަށެވެ. މި ކޯލް ސެންޓަރުން ދިވެއްސާއި އިނގިރޭސިއާއި ޢަރަބިބަހުން ޚިދުމަތްދޭނެކަމަށް އިސްލާމީ ޔުނިވަރސިޓީން ވިދާޅުވިއެވެ. މި ކޯލް ސެންޓަރަށް އިސްލާމީ ޔުނިވަރސިޓީގެ ހޮޓްލައިން، 1405 މެދުވެރިކޮށް ގުޅޭނެއެވެ.

އިސްލާމީ ޔުނިވަރސިޓީން ވިދާޅުވީ، މި ކޯލް ސެންޓަރުގެ ސަބަބުން ރާއްޖޭގައި ތަޢުލީމް ޙާސިލްކުރަން ބޭނުންވާ ބޭރުގެ ދަރިވަރުން، އެ ޔުނިވަރސިޓީއަށް އެންރޯލްވުމަށް މަގު ފަހިވެގެންދާނެ ކަމަށެވެ.

ދިވެހިރާއްޖޭގެ އިސްލާމީ ޔުނިވަރސިޓީއަކީ ރާއްޖޭގައި ހަމައެކަނި ހުންނަ 2 ޔުނިވަރސިޓީގެ ތެރެއިން އެއް ޔުނިވަރސިޓީއެވެ. މި ޔުނިވަރސިޓީގައި ސެޓްފިކެޓް ލެވެލް ޕްރޮގްރާމްތަކުން ފެށިގެން ޕީއެޗްޑީ ޕްރޮގްރާމްތަކާ ހަމައަށް ކިޔެވެއެވެ.

ގިނަ ޢަދަދަކަށް ޢަރަބި ބަސް ކިޔަވާ ދަރިވަރުން ޔުނިވަރސިޓީގައި ތިބުމާއެކު، ޢަރަބި ބަހުންވެސް ކޯލް ސެންޓަރުގެ ޚިދުމަތް ދިނުމުގެ ބޭނުމަކީ ރައީސުލްޖުމްހޫރިއްޔާގެ ރިޔާސީ މެނިފެސްޓޯގައިވެސް ހިމަނުއްވާފަދައިން ޢަރަބިބަސް ކިޔަވައިދިނުން ފުޅާކުރުމެވެ. އިސްލާމީ ޔުނިވަރސިޓީގެ ވަރަށް ގިނަ ދަރިވަރުންނަކީ ރާއްޖޭގެ ކަންކޮޅުތަކުގައި ތިބެގެން ތައުލީމު ހާސިލުކުރާ ދަރިވަރުންކަންވެސް ފާހަގަކޮށްލެވެއެވެ.