އެއްގަމު ދަތުރުފަތުރަށާއި ހިނގާ މީހުންނަށް އުނދަގޫވާގޮތަށް ގިނަ ދުވަސްތަކެއްވަންދެން މާލޭގެ މަގުމަތީގައި ޤަވާއިދާ ޚިލާފަށް ޕާކްކޮށްފައި ހުރި އުޅަނދުތައް ނެގުމަށް މޯލްޑިވްސް ޕޮލިސް ސާވިސްއާއި މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ ގުޅިގެން ޚާއްޞަ މަސައްކަތްތަކެއް މާދަމާ ފައްޓަވާނެކަމަށް ފުލުހުން ވިދާޅުވެއްޖެއެވެ.
އެގޮތުން، މާލޭގެ އެކި ސަރަހައްދުތަކުގައި، ޚާއްޞަކޮށް ކާރޫބާރޫބޮޑުވާ ސަރަހައްދުތަކުގައި ޤަވާއިދާ ޚިލާފަށް ޕާކްކޮށްފައި ހުރި އުޅަނދުތަކާއި ގިނަ ދުވަސްވަންދެން ބަހައްޓާފައިހުންނަ، ބާވެ ހަލާކުވެފައިވާ އުޅަނދުތައް ނެގުމުގެ މަސައްކަތް މާދަމާގެ އެކި ވަގުތުތަކުގައި ކުރައްވާނެކަމަށް ފުލުހުން މަޢުލޫމާތުދެއްވައެވެ.
މި މަސައްކަތާ ބެހޭގޮތުން މަޢުލޫމާތު ދެއްވަމުން، ސެންޓްރަލް އޮޕަރޭޝަންސް ކޮމާންޑްގެ ހެޑް - ޗީފް ސުޕްރިންޓެންޑެންޓް އޮފް ޕޮލިސް ޙަމްދޫން ރަޝީދު ވިދާޅުވީ، ރަމްޟާންމަހަކީ އެހެން މަސްތަކަށްވުރެ މަގުމަތީގެ ކާރޫބާރޫ ބޮޑުވެ ތޮއްޖެހުން އިތުރުވާ މަހަކަށް ވުމާއެކު، ރައްޔިތުންނަށް ކުރިމަތިވާ ދަތިތަކަށް ކޮންމެވެސް ވަރެއްގެ ޙައްލެއް ހޯދައި ދިނުމުގެ ގޮތުން އެއްގަމު އުޅަނދު ޕާކު ކުރުމުގެ ޤަވާއިދުގެ ދަށުން ވެހިކަލްތައް ޓޯވކޮށް އެ ޤަވާއިދުގެ ދަށުން ފިޔަވަޅު އަޅުއްވާނެކަމަށެވެ. މީގެ އިތުރުން، މަގުމަތި ތަރުތީބުވެފައި އޮތުމަކީ ސަލާމަތާއި ރައްކާތެރިކަމުގެ ގޮތުންވެސް ކޮންމެހެން މުހިއްމުކަމެއްގައި ފާހަކުރައްވައި ޙަމްދޫން ރަޝީދު ވިދާޅުވީ ކުރިއަށް އޮތް ރަމްޟާންމަހު މާލޭގެ މަގުތައް އަމާންކަމާއެކު ތަރުތީބުކޮށް ބޭއްވުމަށް ފުލުހުން ކުރަން ރާއްވަވާފައިވާ މަސައްކަތްތަކަށް ރައްޔިތުންގެ އެއްބާރުލުން ބޭނުންވާކަމަށެވެ. އެގޮތުން، ބާޒާރުމަތިފަދަ ކާރޫބާރޫ ބޮޑުވާ ބައެއް ސަރަހައްދުތަކުގައި އުޅަނދުތައް ޕާކު ކުރުމަށް ފުލުހުން ހަމަޖައްސަވާ އިންތިޒާމްތަކާ އެއްގޮތަށް އެ ސަރަހައްދުތަކުގައި ޕާކު ކުރާ ހުރިހާ ބޭފުޅުންވެސް ޢަމަލު ކުރުމަށް ޙަމްދޫން ރަޝީދު އެދިވަޑައިގެންނެވިއެވެ.