ދޯނީގައި މަސް ފިނިކުރާ ނިޒާމު ޤާއިމުކުރަން ލޯނު ދޫކުރާނީ އެއްވެސް ރަހުނެއް ނުބަހައްޓައި!

އޮޑިދޯނިފަހަރުގައި ލޮނު ފެނުން މަސް ފިނިކުރާ ނިޒާމު ޤާއިމްކުރަން ލޯނު ދޫކުރާނީ 50 ފޫޓަށްވުރެ އެ އުޅަނދު ބޮޑުނަމަކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވުޒާރާއިން ވިދާޅުވެއްޖެއެވެ. ލޮނުފެނުން މަސްފިނިކުރާ ނިޒާމު ޤާއިމްކުރަން ދޫކުރާ ލޯނަށް އެދުމަށް ހުޅުވާލާފައިވަނީ ސެޕްޓެމްބަރު މަހުގެ 22 ވަނަ ދުވަހުއެވެ.

މަސްވެރިކަމާއި ކަނޑުގެ ވަޞީލަތްތަކާބެހޭ ވުޒާރާއިން ވިދާޅުވީ ލޮނު ފެނުން މަސް ފިނިކުރާ ނިޒާމު ޤާއިމްކުރުމަށް ލޯނު ދޫކުރާނީ މައިގަނޑު 2 ޝަރުޠެއް ހަމަވާނަމަކަމަށެވެ. އެގޮތުން އެއް ޝަރުތަކީ އެ އުޅަނދު 50 ފޫޓަށްވުރެ ބޮޑުވުމެވެ. ދެވަނަ ޝަރުތަކީ އެ އުޅަނދެއްގައި 15 ޓަނުގެ މަސް ރައްކާކުރެވޭނެ ޖާގަ ހުރުމެވެ.

އޮޑިދޯނިފަހަރުގައި ލޮނު ފެނުން މަސް ފިނިކުރާ ނިޒާމު ޤާއިމްކުރުމަށް ލޯނު ދޫކުރަނީ އެސްއެމްއީ ޑިވަލޮޕްމެންޓް ފައިނެންސް ކޯޕަރޭޝަން، އެސްޑީއެފްސީ މެދުވެރިކޮށެވެ.

އެސްޑީއެފްސީން ވިދާޅުވީ "މުރާބަޙާ އާރުއެސްޑަބްލިޔު" މި ސްކީމްގެ ދަށުން މައިގަނޑު 3 ކަމަކަށް ލޯނު ދޫކުރެވޭނެ ކަމަށެވެ. އެއީ މަސް ދޯނިފަހަރުގައި ލޮނުފެނުން މަސް ފިނިކުރާ ނިޒާމު ޤާއިމްކުރުމަށާއި، މަސްވެރި އުޅަނދުގައި ބޭނުންކުރަން ޖެނެރޭޓަރ ސެޓް ގަތުމުގެ އިތުރުން އުޅަނދުގައި ހަރުކުރަން ސޯލަރ ޕެނަލް ޕަވަރ ސިސްޓަމް ގަތުމަށެވެ. އަދި މި 3 ކަން ކުރުމަށްވެސް އެންމެ ގިނައިން ދޫކުރެވޭނީ 2 މިލިޔަން ރުފިޔާކަމަށް އެސްޑީއެފްސީން ވިދާޅުވެއެވެ.

އޮޑިދޯނިފަހަރުގައި ލޮނު ފެނުން މަސް ފިނިކުރާ ނިޒާމު ޤާއިމްކުރަން ލޯނު ދޫކުރާއިރު ފައިދާ ހިސާބު ދޫކުރާނީ އަހަރަކަށް ފައިނެންސިން 6 އިންސައްތަ ރޭޓުގައެވެ. މި ލޯން ނެގޭނީ އެންމެ ގިނަވެގެން 10 އަހަރު ދުވަހުގެ ތެރޭގައި ދައްކާ ޚަލާސްކުރާ ގޮތަށެވެ. އަދި ހަމައަގު ދައްކަން ދެވޭނެ އެންމެ ދިގު މުއްދަތު ނުވަތަ ގްރޭސްގެ މުއްދަތަކީ ގިނަވެގެން 6 މަސް ދުވަހެވެ. އަދި މި ލޯނު ދޫކުރުމަށް ރަހުނެއް ނުބަހައްޓާނެއެވެ.

އޮޑިދޯނިފަހަރުގައި ލޮނު ފެނުން މަސް ފިނިކުރާ ނިޒާމު ހަރުކޮށްދިނުމުގެ މަސައްކަތް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް، މިފްކޯއިން ކޮށްދޭނެކަމަށް އެ ކުންފުނިންވަނީ ވިދާޅުވެފައެވެ. އެގޮތުން މި ނިޒާމު އުޅަނދުގައި ހަރުކޮށްދޭނީ މިފްކޯގެ އިންޖީނިއަރުން މެދުވެރިކޮށް އެ ދޯންޏެއްގެ ކެޕޭސިޓީ ހުރި މިންވަރަށް ބަލައި، ދިރާސާ ކުރުމަށްފަހުގައިކަމަށް އެކުންފުނިން ވިދާޅުވެއެވެ.

ދިވެހި އޮޑިދޯނިފަހަރުތަކުގައި ލޮނުފެނުން މަސް ފިނިކުރާ ނިޒާމު ޤާއިމްކުރެވުމާއެކު އައިސް ހޯދަން ދޯނިތަކުންކުރާ ހޭދަ ވަރަށް ބޮޑަށް ކުޑަ ވާނެއެވެ.