ފަސް މިލިޔަން ގަސް ޕްރޮގްރާމް: މިހާތަނަށް 3 މިލިޔަން ގަސް އިންދަން އެކި ފަރާތްތަކުން ވަނީ އިސްނަގާފައި

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިޢުލާން ކުރައްވާފައިވާ 5 މިލިޔަން ގަސް އިންދުމުގެ ޕްރޮގުރާމްގެ ދަށުން މިހާތަނަށް 3.1 މިލިޔަން ގަސް އިންދުމަށް އެކި ފަރާތްތަކުން ޝައުޤުވެރިކަން ފާޅުކޮށްފައިވާކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ.

ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި ވަޒީރު ޠާރިޤް އިބްރާހިމް ވިދާޅުވީ މިހާތަނަށް 3.1 މިލިޔަން ގަސް އިންދުމަށް އެކި ފަރާތްތަކުން ޝައުޤުވެރިކަން ފާޅުކޮށްފައިވާ ކަމަށާ، އަދި މިހާތަނަށް 4 ލައްކައެއްހައި ގަސް އިންދާފައިވާ ކަމަށެވެ. އަދި ކުރިއަށްއޮތް 4 އަހަރުގެ ތެރޭގައި 5 މިލިޔަނަށްވުރެ ގިނަ ގަސް އިންދޭނެކަމަށް އުއްމީދުކުރައްވާކަމަށް ވެސް ވަޒީރު ވިދާޅުވިއެވެ.

Great to see @Portmv kickstarting a tree planting programme under the Five Million Tree Project, launched by HEP Dr @MMuizzu on the World Environment Day this year. @Portmv has pledged to plant one million trees under the Project, which brings the total pledges to 3.1 million… pic.twitter.com/P6KY5bD4md

— Thoriq Ibrahim (@Thoriqibrahim) October 19, 2024

5 މިލިޔަން ގަސް އިންދުމުގެ ޕްރޮގްރާމް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަށްޓަވައިދެއްވީ މިއަހަރުގެ ތިމާވެށީގެ ދުވަސްކަމަށްވާ މިދިޔަ ޖޫން މަހުގެ 5ވަނަ ދުވަހުއެވެ.

5 މިލިޔަން ގަސް އިންދުމުގެ ޕްރޮގްރާމްގައި އިންދަނީ ރާއްޖެއިން މަދުން ފެންނަ އެކި ބާވަތުގެ ގަސްގަހާގެއްސާއި ހިޔާ ލިބޭ ގަސްގަހާގެއްސެވެ. އަދި އެކި ބާވަތުގެ ކާނާ ލިބޭ ޖުމްލަ 90 ބާވަތެއްގެ ގަސް އިންދުމަށް ކަނޑައަޅުއްވާފައިވެއެވެ.

މާލެއާއެކުއެކީގައި އަތޮޅުތަކުގައިވެސް ވަނީ ގަސް އިންދުމުގެ ޕްރޮގްރާމް ފަށާފައެވެ. އެގޮތުން މި މަޝްރޫޢުގެ ފުރަތަމަ ދުވަހު 398000 ގަސް އިންދާފައިވާކަމަށް ތިމާވެއްޓާބެހޭ ވަޒީރު ޠާރިޤް އިބްރާހީމް ވިދާޅުވެފައިވެއެވެ.

މި ޕްރޮގްރާމުގެ މަޤްޞަދަކީ ރާއްޖެއިން ނެތެމުންދާ ގަސްތައް އަލުން އާލާކުރުމާއި ފެހިކަން އިތުރުކޮށް މާހައުލީ ނިޒާމު ދަމަހައްޓައިމޫސުމީ ބަދަލުތަކަށް ވިލުންތެރިކަން އިތުރުކުރުމެވެ.