ފަތުރުވެރިކަމަށް ކޮށްދެއްވި ޚިދުމަތުގެ އަގުވަޒަންކޮށް ޗަމްޕާ ދެ ބެއިންނަށް ސަޓާ އެވޯޑް އަރުވައިފި

ރާއްޖެއަށް ފަތުރުވެރިކަން ތަޢާރަފްކުރުގައި އެންމެ އިސްދައުރެއް އަދާކުރެއްވި ބޭފުޅުންގެތެރޭގައި ހިމެނޭ މަޝްހޫރު ވިޔަފާރިވެރިންކަމުގައިވާ ޗަމްޕާ މުޙައްމަދު މޫސާ އާއި ޗަމްޕާ ހުސެއިން އަފީފަށް މި ސަރަޙައްދުގައި ފަތުރުވެރިކަމުގެ ދާއިރާއިންދޭ އެންމެ ޝަރަފުވެރި އަދި ހޯދާ ކާމިޔާބީތަކާއި ޚިދުމަތްތަކުގެ އަގު ވަޒަންކުރުމަށް ސައުތު އޭޝިއަން ޓްރެވަލް އެވޯޑްސްއިން ދޭ "ފޭސް އޮފް ސައުތު އޭޝިއާ" އެވޯޑް އަރުވައިފިއެވެ.

މީރު އައިލެންޑް ރިސޯޓްގައި ބޭއްވި ރަސްމިއްޔާތުގައި ޗަމްޕާ ބްރަދާރސްގެ ޗެެއާރމަން މުހައްމަދު މޫސާ އާއި ކްރައުން ކޮމްޕެނީގެ ޗެއާރމަން ހުސައިން އަފީފްއަށް މި އެވޯޑް ހަވާލުކޮށްދެއްވީ ސާޓާގެ ނައިބް ރައީސް ސޫރަޖް ޚާންއެވެ.

އެވޯޑާ ހަވާލުވުމަށްފަހު ވާހަކަދައްކަވަމުން ޗަމްޕާ ދެބެއިން ވިދާޅުވީ މިފަދަ އެވޯޑެއް ލިބިވަޑައިގަތުމުން އުފާކުރައްވާ ކަމެއް ކަމަށާއި، އެ އެވޯޑް ދެއްވީތީ ޝުކުރު އަދާކުރައްވާފައެވެ.

"ހީނުކުރަން މި ކަހަލަ އެވޯޑެއް ލިބޭނެކަމަަށްވެސް. ވަރަށް އުފާވެއްޖެ އަދި ވަރަށް ބޮޑަށް ޝުކުރިއްޔާ" އަފީފްއާއި އުއްޗު ވިދާޅުވިއެވެ.

މި ރަސްމިއްޔާތުގައި ވާހަކަދައްކަމުން ސާޓާގެ ނައިބް ރައީސް ސޫރަޖް ޚާން ވިދާޅުވީ 1970 ގެ އަހަރުތަކުގެ ކުރީކޮޅުން ފެށިގެން ރާއްޖޭގައި ފަތުރުވެރިކަން ފެށުނު ފަހުން ސިނާއަތައް އިންގިލާބީ ބޮޑުބަދަލެއް އައިސްފައިވާކަމަށެވެ. އެގޮތުން މި ބަދަލުގެ ފަހަތުގައި މުޙައްމަދު މޫސާއާއި ހުސައިން އަފީފްގެ މުހިންމު ދައުރެއްވާކަން އޭނާ ފާހަގަކުރެއްވިއެވެ.

"ރާއްޖޭގައި ފަތުރުވެރިކަން ފެށިގެންއައިރު ގިނަގޮންޖެހުންތަކެއް ހުރިކަން އިނގޭ. އޭރު ހުރީ މަދު ވަސީލަތްތައްކެއް. އެގޮތުން ދަތުރުފަތުރާއި، މުވާސަލާތާއި އުމަރާނީ ގޮތުންވެސް ހުރި ދަތިތަކާއެކު ހޯދާފައިވަނީ ތައުރީފު ޙައްޤު، ފާހަގަކުރުން މުހިއްމު މަސައްކަތްތަކެއް" ސޫރަޖް ވިދާޅުވިއެވެ.

ސޫރަޖް ވިދާޅުވީ މުޙައްމަދު މޫސާގެ އިސްނެންގެވުމާ އެކު ޗަމްޕާ ބްރަދާސްއަކީ ރާއްޖޭގެ އިތުރުން ބައިނަލްއަގްވާމީ ފެންވަރުގައިވެސް ފާހަގަކޮށްލެވޭފަދަ ވަރުގަދަ ކުންފުންޏެއްކަމަށެވެ. އެގޮތުން ފަތުރުވެރިކަމާއި ހޮސްޕިޓާލިޓީގެ އިތުރަށް ދަނޑުވެރިކަމާއި މަސްވެރިކަމާއި ރިއަލް އެސްޓޭޓާއި، ފެން އުފެއްދުމާއި އަދި މާލީ ޚިދުމަތްތަކުގެ ބޮޑު ޕޯޓްފޯލިއޯއެއް ޗަމްޕާ ކުންފުނީގައި އޮތްކަން ސޫރަޖު ފާހަގަކުރެއްވިއެވެ. ސޫރަޖް ޚާން ވަނީ ރާއްޖޭގެ ފަތުރުވެރިކަމުގެ ދާއިރާ ކުރިއަރުވަން ޗަންޕާގެ ދެބެއިން ކުރައްވާ މުހިއްމު މަސައްކަތްތައް ފާހަގަކޮށްފައެވެ.

މިއެވޯޑްތަކާއި ގުޅޭގޮތުން އެމްއެމްޕީއާރްސީގެ މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވީ ރާއްޖޭގައި ފަތުރުވެރިކަން ފަށައިގަތުމުގެ ފަހަތުގައިވާ އެންމެ މުހިއްމުބޭފުޅުންނަކީ ޗަމްޕާ ދެބެއިންކަމަށެވެ. އެގޮތުން މީގެ 50 ވަރަކަށް އަހަރުކުރިން އެ ބޭފުޅުން ކުރެއްވި މަސައްކަތަކީ ފިލާވަޅު ލިބިގަންނަންޖެހޭ ޚިދުމަތެއްކަމަށް ޝިއުރީ ވިދާޅުވިއެވެ. އަދި މިއަދު ފަތުރުވެރިކަމުގެ ދާއިރާއިން ލިބެމުން ކުރިއެރުންތަކާއި ފައިދާއަކީ އެ ބޭފުޅުންގެވެސް އަގުހުރި މަސައްކަތްކުން ދެމެހެއްޓެނިވި ގޮތެއްގައި ލިބެމުންދާ މަންފާތައްކަން ޝިއުރީ ފާހަގަކުރެއްވިއެވެ.

"މިކަހަލަ އަގުވަޒަން ކުރުމުގެ އެވޯޑްތައް ދިނުމަކީ އަސްލު ވަރަށް މުހިންމު ކަމެއް. މިފަދަ ގޮތަކަށް އެފަދަ ބޭފުޅުންގެ އަގުވަޒަންކުރުމަކީ ނުހަނު މުހިންމުkަމެއްކަމަށް ޤަބޫލުކުރެވޭ" ޝިއުރީ ވިދާޅުވިއެވެ.

ޗަމްޕާ ބްރަދާރސްގެ ޗެެއާރމަން މުހައްމަދު މޫސާ އަދި ކްރައުން ކޮމްޕެނީގެ ޗެއާރމަން ހުސައިން އަފީފްއަށް މި އެވޯޑް ލިބިފައިމިވަނީ ޤައުމުތަކުގެ ފަތުރުވެރިކަމުގެ ސިނާއަތަށް ކޮށްދެއްވާފައިވާ މުހިންމު ޚިދުމަތްތައް ފާހަގަކޮށެވެ. މިދެ ބޭފުޅުންގެ އިތުރުން މިދިޔަ މަހު ނޭޕަލްގެ ކަތަމަންޑޫގައި ބޭއްވި ސަޓާ އެވޯޑްސް 2024ގައި އިތުރު ތިން ބޭފުޅަކަށް ވެސް މި އެވޯޑު ވަނީ އަރުވާފައެވެ. އެއީ ނޭޕާލްގެ ދެ ބޭފުޅަކާއި ބަންގްލަދޭޝްގެ ބޭފުޅަކަށެވެ.

ސާޓާ އެވޯޑަކީ ދެކުނު އޭޝިޔާ ސަރަޙައްދުގައި ފަތުރުވެރިކަމުގެ ދާއިރާއިންދޭ އެންމެ ޝަރަފުވެރި އެއް އެވޯޑެވެ. މިއީ ސާޓާ އެވޯޑް ބޭއްވި 8 ވަނަ އަހަރެވެ. މި އަހަރުގެ ސަޓާގެ އެވޯޑްސްގެ ގާލާ ނައިޓް ބާއްވައިފައިވަނީ ނޭޕާލްގެ ވެރިރަށް ކަތަމަންޑޫގައެވެ. މި އަހަރުވެސް ރާއްޖޭއަށް ޝަރަފުވެރި އެތައް އެވޯރޑެއް ވަނީ ލިބިފައެވެ. އެގޮތުން އެކި އެކި ދާއިރާތަކުން 16 ގޯލްޑް އެވޯޑާއި 14 ސިލްވަރ އެވޯޑް، ރާއްޖެއިން ވަނީ ހާސިލްކޮށްފައެވެ.