އެމެރިކާގެ ދިފާޢީ ބާރުގެ އެކެޑެމީތަކުން ހިންގާ ކޯސްތަކުގައި ބައިވެރިވާން ދިވެހިންނަށް ހުޅުވާލައިފި

އެމެރިކާގެ ދިފާޢީ ބާރުގެ އެކެޑެމީތަކުން ހިންގާ ކޯސްތަކުގައި ބައިވެރިވާން ބޭނުންވާ ދިވެހިންނަށް އެފުރުޞަތު ހުޅުވާލާފައިވާކަމަށް ދިވެހިރާއްޖޭގެ ޤައުމީ ދިފާޢީ ބާރުން ވިދާޅުވެއްޖެއެވެ.

މި ކޯސްތަކަށް ދަރިވަރުން ފޮނުވާނީ ރާއްޖޭގެ ޤައުމީ ދިފާޢީ ބާރުގެ ބެލުމުގެ ދަށުންނެވެ.

ޤައުމީ ދިފާޢީ ބާރުން ވިދާޅުވީ އެމެރިކާގެ ޤައުމީ ދިފާޢީ ބާރުގެ 4 އެކެޑެމީއަކުން ހިންގާ ކޯސްތަކުގައި ބައިވެރިވުމުގެ ފުރުޞަތު ހުޅުވާލާފައިވާ ކަމަށެވެ. އެ 4 އެކެޑެމީއަކީ ޔުނައިޓެޑް ސްޓޭޓްސް އެއަރފޯސް އެކެޑަމީއާއި ޔުނައިޓެޑް ސްޓޭޓްސް ކޯސްޓްގާޑް އެކެޑަމީއާއި ޔުނައިޓެޑް ސްޓޭޓްސް މިލިޓަރީ އެކެޑަމީއާއި ޔުނައިޓެޑް ސްޓޭޓްސް ނޭވަލް އެކެޑަމީއެވެ.

މި އެކެޑެމީތަކުން ހިންގާ ކޯސްތަކުގެ މަޢުލޫމާތު ދިވެހި ސަރުކާރުގެ ގެޒެޓާއި މި އެކެޑެމީތަކުގެ ރަސްމީ ވެބްސައިޓުތަކުން ލިބޭނެއެވެ. މި ކޯސްތައް ފެށުމަށް ހަމަޖެހިފައިވަނީ އަންނަ އަހަރުގެ ޖޫން މަހުއެވެ. ކޯސްތަކުގެ މުއްދަތަކީ 4 އަހަރެވެ. އަދި ކޯސްތަކުގެ ލެވެލްއަކީ ބެޗްލަރސް ޑިގްރީއެވެ. އަދި ކޮންމެ އެކެޑެމީއަކަށް 6 ދިވެހިންނަށް ފުރުޞަތު ލިބޭނެކަމަށް ޤައުމީ ދިފާޢީ ބާރުން ވިދާޅުވެއެވެ.

ރާއްޖޭގެ ޤައުމީ ދިފާޢީ ބާރުން ވަނީ ކޯސްތަކުގައި ބައިވެރިވާ ދިވެހިންގެ ކިބައިގައި ހުންނަންޖެހޭ ޝަރުތުތަކެއްވެސް ކަނޑައަޅާފައެވެ. މި ޝަރުތުތަކުގެ ތެރޭގައި ހިމެނެނީ އަންނަ އަހަރުގެ ޖުލައި 1 ވަނަ ދުވަހުގެ ކުރިން 23 އަހަރު ނުފުރޭ މީހަކަށްވުމާއި ޒަވާޖީ ޙަޔާތެއް ފަށާފައި ނުވުމާއި އޭ ލެވެލް ހަދާފައިވުމާއި ހަށިހެޔޮކަމުގެ އިމްތިހާނުން ފާސްވެފައިވާ އަދި ނަފްސާނީ ގޮތުންނާއި ޖިސްމާނީގޮތުން ދުޅަހެޔޮ މީހެއް ކަމުގައިވުމެވެ.

މީގެ އިތުރުން ސްކޮލާސްޓިކް އެޕްޓިޓިއުޑް ޓެސްޓް، އެސްއޭޓީ ނުވަތަ އެމެރިކަން ކޮލެޖް ޓެސްޓިންގ އޭސީޓީ ހަދާފައިވާ މީހެއްކަމުގައިވެސް ވާންޖެހެއެވެ. މި ޓެސްޓުތަކަކީ ކޯހަށް ވަނުމަށް އެދުމަށްފަހުވެސް ހެދޭނެ ޓެސްޓުތަކެކެވެ.

ޤައުމީ ދިފާޢީ ބާރުން ވިދާޅުވީ މި ކޯސްތަކުގައި ބައިވެރިވާން ބޭނުންވާ ދިވެހިން، ކޯހަށް ވަނުމަށްއެދޭ ފޯމު ފުރުމަށްފަހު ބަންޑާރަކޮށްޓަށް ފޯމު ހުށައެޅޭނެ ކަމަށެވެ. ނުވަތަ ދިފާޢީ ބާރުގެ މެއިލް [email protected] އަށްވެސް ފޯމު ހުށައެޅޭނެކަމަށްވެސް ވިދާޅުވިއެވެ. ފޯމު ދިފާޢީ ބާރުގެ ވެބްސައިޓުން ލިބޭނެއެވެ. ފޯމު ހުށައެޅުމުގެ ސުންގަޑިއަކީ އަންނަ މަހުގެ 7 ވަނަ ދުވަހެވެ.