ރާއްޖެއިން ބައިވެރިވާ 76 ފަރާތަކާއެކު ކުންމިންގ ފެއަރ ފަށައިފިއެވެ.
ޗައިނާގެ ކުންމިންގައި ބާއްވާ މި ފެއަރގައި ރާއްޖެއިން 11000 ވުރެއް ގިނަ ދިވެހި އުފެއްދުން ބައިވެރިކުރުމަށް ވަނީ ހަމަޖެހިފައެވެ. މިއަހަރުގެ ކުންމިންގް ފެއަރ ގެ ކަންޓްރީ އޮފް އޮނާރ އަކީ ރާއްޖެއެވެ. މިއަހަރު ރާއްޖޭގެ ސްޓޯލްވަނީ މުހައްމަދު ތަކުރުފާނުގެ ގަނޑުވަރު ހުންނަ ގޮތަށް ފަރުމާކޮށްފައެވެ. އަދި އެތަނަށް ޒިޔާރަތް ކުރާ ފަރާތްތަކަށް ދިވެހި ރާޢްޖެ ސިފަވެގެންދާނެކަމަށްވެސް އިކޮނޮމިކް މިނިސްޓްރީން ހާމަކުރައްވައެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ޑެޕިއުޓީ މިނިސްޓަރު އާދަމް ތައުފީޤް ވިދާޅުވިގޮތުގައި ފެއަރއިން ރާއްޖެއަށް ލިބިފައިވާ ޖާގައިން އެކި ކަހަލަ އަތްތެރި މަސައްކަތްތައް ދައްކާލުމަށް ހަމަޖެހިފައިވާ ކަމަށާއި، އެގޮތުން ކަސަބު އެޅުމާއި ލިޔެލާ ޖެހުން ފަދަ މަސައްކަތްތައް ކުރާތަން ފެއަރ އަށް ޒިޔާރަތްކުރާ ފަރާތްތަކަށް ފެނިގެންދާނެ ކަމަށް ތައުފީގު ވިދާޅުވިއެވެ.
މިއަހަރުގެ ފެއަރގެ ކަންޓްރީ އޮފް އޮނަރ ގެ މަޤާމް ރާއްޖެއަށް ލިބިފައިވުމުން، ފެއަރގައި ރާއްޖޭގެ އުފެއްދުންތައް ދެއްކުމަށް ވަނީ ބޮޑު ޖާގައެއް ލިބިފައެވެ. މި ފެއަރ މެދުވެރިކޮށް ރާއްޖޭގެ އުފެއްދުންތައް މަރކެޓް ކޮށް އެތަކެތި އިޝްތިހާރުކުރުމުގެ ފުރުސަތު ފަހިވެގެންދާނެއެވެ.
މިއަހަރުގެ ފެއަރގައި ބައިވެރިވެފައިވާ ފަރާތްތަކުގެ އަދަދު އެހެން އަހަރުތަކާއި އަޅާ ބަލާއިރު އިތުރުކަން ފާހަގަކޮށްލެވެއެވެ. އަދި މިއަހަރުގެ ފެއަރއަށް ޒިޔާރަތްކުރާނެ ފަރާތްތަކުގެ އަދަދުވެސް އިތުރުވާނެ ކަމަށް ފެއަރ އިންތިޒާމް ކުރާ ފަރާތުން ވަނީ ލަފާކޮށްފައެވެ. މިއަހަރުގެ ފެއަރ އަށް ހަތްސަތޭކަ ހާހެއްހާ މީހުން ޒިޔާރަތް ކުރާނެ ކަމަށް ބެލެވެއެވެ.