ރައީސަށް އެއްބާރުލުންދިނުމަށް މުސާރައިގެ %10 ނުނެންގެވުމަށް މެންބަރު ފަލާޙުވެސް ނިންމަވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚަރަދު ކުޑަކުރުމުގެ ސިޔާސަތަށް އެއްބާރުލުން ދިނުމުގެ ގޮތުން މުސާރައިން 10 އިންސައްތަ ނުނެންގެވުމަށް ޕީއެންސީގެ ޕާލިމެންޓަރީ ގުރޫޕުގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާޙު ނިންމަވައިފިއެވެ.

މެންބަރު ފަލާޙު މިގޮތަށް ނިންމަވާފައި މިވަނީ އަންނަ އަހަރަށް ދައުލަތުގެ ބަޖެޓު ހުށައަޅާއިރު، އިޤުތިޞާދީ އިޞްލާޙީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަޤުޞަދުގައި ގިނަ ފިޔަވަޅުތަކެއް ސަރުކާރުން އަޅުއްވަމުން ގެންދަވާ ދަނޑިވަޅެއްގައެވެ.

ސޯޝަލް މީޑިޔާގައި ހިއްސާ ކުރެއްވި ޕޯސްޓެއްގައި ޕީއެންސީގެ ޕީޖީ ލީޑަރު އިބްރާހީމް ފަލާޙު ވިދާޅުވީ މުސާރައިން އެއްބައި ނުނަންގަވަން ނިންމެވީ ޤައުމުގެ އިޤުތިޞާދީ ޙާލަތު ރަނގަޅުކުރުމަށާއި، އާމްދަނީ އިތުރުކޮށް، ޚަރަދު ކުޑަކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަޅުއްވަމުން ގެންދަވާ ފިޔަވަޅުތަކަށް އެއްބާލުރުން ދިނުމުގެ ގޮތުން ކަމަށެވެ. އެގޮތުން އަންނަ މަހުގެ 1 ވަނަ ދުވަހުން ފެށިގެން އެއް އަހަރު ދުވަހުގެ މުއްދަތަށް މަޖިލީހުގެ މެންބަރަކަށްވުމުން ލިބޭ މުސާރައިގެ 10 އިންސައްތަ ނުނަންގަވަން ނިންމަވާފައިވާކަމަށް ޕީޖީ ލީޑަރު ވިދާޅުވިއެވެ.

Raees Muizzu qaumu ge iqthisodhee haalathu Rangalhu koh Ammudhanee ithuru koh Haradhu tha kuda kurumah alhuvamun gendhavaa muhihmu fiyavalhu thakah eh baarulun dhinumu ge gothun alhugandu ge majilis musaara in Nov 1 feshi gen 1 aharu dhuvahah 10% unikuran ninmaafin.

— Ibrahim Falah (@IbrahimFalahR) October 24, 2024

އިޤުތިޞާދީ އިސްލާޙީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަޤުޞަދުގައި ގިނަ ފިޔަވަޅުތަކެއް އެޅުމަށް ރައީސުލްޖުމްހޫރިއްޔާ ވަނީ ނިންމަވާފައެވެ. އެގޮތުން ރައްޔިތުންގެ މަޖިލީހުގެ މެންބަރުންނާއި މިނިވަން މުއައްސަސާތައް ހިމެނޭ ގޮތަށް ބައެއް މަޤާމުތަކުގެ މުސާރައިން 10 އިންސައްތަ އުނިކުރެއްވުން ހިމެނެއެވެ. ނަމަވެސް އޭގެތެރޭގައި ސިވިލް ސަރވިސްއާއި 12،000 ރުފިޔާއިން ދަށުގެ މުސާރަ ލިބޭ ފަރާތްތައް ނުހިމެނެއެވެ.

ރައީސުލްޖުމްހޫރިއްޔާގެ ޚަރަދު ކުޑަކުރުމުގެ ސިޔާސަތަށް އެއްބާރުލުން ދިނުމުގެ ގޮތުން ފަލާޙުގެ އިތުރުން ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲވެސް ވަނީ ލިބިވަޑައިގަންނަވާ މުސާރައިން 50 އިންސައްތަ ނުނެންގެވުމަށް ނިންމަވާފައެވެ.