ބަޖެޓު ކޮމިޓީއަށް މާލީ ވަޒީރާއި، ގަވަރުނަރާއި، އޮޑިޓަރ ޖެނެރަލް ޙާޒިރުކުރަނީ
-
ސަޕްލިމެންޓަރީ ބަޖެޓެއް ސަރުކާރުން ހުށައެޅީ މިދިޔަ ބުރާސްފަތި ދުވަހު
-
ބަޖެޓު ފާސްކުރަން ސުންގަޑިއެއްގެ ގޮތުގައި ކަނޑައަޅާފައިވަނީ މާދަމާ
ރައްޔިތުންގެ މަޖިލީހަށް ހުށައަޅާފައިވާ ދައުލަތުގެ ސަޕްލިމެންޓަރީ ބަޖެޓު ދިރާސާކުރަން އެކުލަވާލާފައިވާ ބަޖެޓު ދިރާސާކުރާ ކޮމިޓީއަށް މާލީ ވަޒީރު މޫސާ ޒަމީރު ޙާޒިރުކުރުމަށް ކޮމިޓީގެ އިއްތިފާޤުން ފާސްކޮށްފިއެވެ.
މާލީ ވަޒީރުގެ އިތުރުން މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީގެ ގަވަރުނަރު އަޙްމަރު މުނައްވަރާއި، ދިވެހިރާއްޖޭގެ އޮޑިޓަރ ޖެނެރަލް ޙުސައިން ނިޔާޒީ ހާޒިރުކުރުމަށްވެސް ކޮމިޓިން ވަނީ ނިންމަވާފައެވެ. މިގޮތަށް ފާސްކޮށްފައިވަނީ މިއަދު ކުރިއަށްދިޔަ ބަޖެޓު ދިރާސާކުރާ ކޮމިޓީގެ ބައްދަލުވުމުގައެވެ.
މި ބައްދަލުވުމުގައި ބަޖެޓާ ގުޅޭގޮގުން މެންބަރުން ސުވާލު ކުރުމަށާއި، ބަޖެޓާ ގުޅޭގޮތުން މަޝްވަރާކުރުމަށް މާލީ ވަޒީރާއި އޮޑިޓަރ ޖެނެރަލް އަދި އެމްއެމްއޭގެ ގަވަރުނަރު ހާޒިރުކުރުމަށް ހުށައެޅުއްވީ ބާރަށު ދާއިރާގެ މެންބަރު އިބްރާހީމް ޝުޖާޢުއެވެ. މާދަމާ މެންދުރުފަހު 14:00 ގައި ބާއްވާ ބަޖެޓު ކޮމިޓީއަށް އެ ތިން ބޭފުޅުން ހާޒިރުވާންޖެހޭގޮތަށްވެސް ޝުޖާޢު ހުށައެޅުއްވިއެވެ. މި ހުށައެޅުން ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ވަނީ ފާސްވެފައެވެ.
މީގެ އިތުރުން ސަޕްލިމަންޓްރީ ބަޖެޓު ފާސްކުރާނެ ވަގުތަކާ ބެހޭގޮތުންވެސް މެންބަރު ޝުޖާޢު ހުށައެޅުމެއް ހުށައެޅުއްވިއެވެ. އެގޮތުން މާދަމާ ކޮމިޓީއަށް ހާޒިރުކުރާ 3 ބޭފުންނާ ސުވާލުކުރުމުގެ ސެޝަން ނިންމަވާލެއްވުމަށްފަހު، ބަޖެޓު ފާސްކުރާ ގޮތަށް ޝުޖާޢު ހުށައެޅުއްވިއެވެ. މި ހުށައެޅުމަށް ތާޢީދުކުރެއްވީ މާމިގިލީ ދާއިރާގެ މެންބަރު ޤާސިމް އިބްރާހީމެވެ. މި ހުށައެޅުންވެސް ކޮމިޓީގެ އިއްތިފާޤުން ވަނީ ފާސްވެފައެވެ.
ރައްޔިތުންގެ މަޖިލީހުގެ ބަޖެޓް ދިރާސާކުރާ ކޮމިޓީގެ މުޤައްރިރާއި ނައިބު މުޤައްރިރު ހޮވުން އަދި 2024 ވަނަ އަހަރުގެ ސަޕްލިމެންޓަރީ ބަޖެޓުގެ މަސައްކަތް ނިންމާނެ ސުންގަޑި ކަނޑައަޅައި ބަޖެޓާ ގުޅޭގޮތުން މަޝްވަރާކުރުން pic.twitter.com/sfn82dgCRL
— People's Majlis (@mvpeoplesmajlis) October 27, 2024
މިއަހަރަށް ސަރުކާރުން ހުށައެޅުއްވި ސަޕްލިމެންޓަރީ ބަޖެޓު ދިރާސާކުރަން އެކުލަވާލި ކޮމިޓީގެ މުޤައްރިރަކަށް ކޮމިޓީގެ އިއްތިފާޤުން ކަނޑައަޅާފައިވަނީ ފުވައްމުލަކު މެދު ދާއިރާގެ މެންބަރު ޢަލީ ފަޒާދެވެ. އަދި ނައިބު މުޤައްރިރަކަށް ކަނޑައަޅާފައިވަނީ އޭދަފުށީ ދާއިރާގެ މެންބަރު އަޙްމަދު ސަލީމެވެ.
ދައުލަތުގެ ޚަރަދުތައް ފޫބެއްދުމަށް ސަރުކާރުން ރައްޔިތުންގެ މަޖިލީހަށް 5.1 ބިލިޔަން ރުފިޔާގެ ސަޕްލިމެންޓަރީ ބަޖެޓެއް ހުށައެޅީ މިދިޔަ ބުރާސްފަތި ދުވަހުއެވެ.
ސަރުކާރުން ހުށައެޅުއްވި ސަޕްލިމެންޓަރީ ބަޖެޓުގެތެރޭގައި ހިމެނެނީ ރިކަރަންޓް ޚަރަދުގެ ގޮތުގައި 1.5 ބިލިޔަން ރުފިޔާ އަދި ކެޕިޓަލް ޚަރަދުގެ ގޮތުގައި 3.5 ބިލިޔަން ރުފިޔާއެވެ.