ފަރުމަހުގެ މަސްވެރިކަން ކުރާ ފަރާތްތަކަށްދޭ ޚާއްސަ ލޯނު 62 ފަރާތަކަށް
-
ފަރުމަހުގެ މަސްވެރިކަމުގެ ލޯނަށް އެދި 121 ފަރާތެއް ހުށަހެޅި
ފަރުމަހުގެ މަސްވެރިކަން ކުރާ ފަރާތްތަކަށްދޭ ޚާއްސަ ލޯނު 62 ފަރާތަކަށް ދިނުމަށް ސަރުކާރުން ނިންމަވައިފިއެވެ.
މަސްވެރިކަމާއި ކަނޑުގެ ވަޞީލަތްތަކާ ބެހޭ ވުޒާރާއިން ފަރުމަސްވެރިކަމުގެ ސިނާޢަތް ތަރައްޤީ ކުރުމަށް ދޫކުރާ ލޯނު ލިބުނު ފަރާތްތަކާއި އެކު ވަނީ ބައްދަލުވުމެއް ބާއްވާފައެވެ.
އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން މެދުވެރިކޮށް ދޫކުރުމަށް މިދިޔަ ފެބްރުއަރީ މަހު ހުޅުވާލި މި ލޯނަށް 121 ފަރާތަކުން ކުރިމަތިލާފައިވެއެވެ. އޭގެ ތެރެއިން ޓެކްނިކަލް އިވެލުއޭޝަން އަދި ފައިނޭންޝަލް އިވެލުއޭޝަނަށް ފަހު 62 ފަރާތަކަށް އެ ލޯން ދިނުމަށް ނިންމާފައިވާކަމަށް މަސްވެރިކަމާއި ބެހޭ ވުޒާރާއިން ހާމަކުރެއެވެ.
މި ލޯން ލިބުނު ފަރާތްތަކާއި އެކު ބޭއްވި ބައްދަލުވުމުގައި، މަސްވެރިކަމާއި ކަނޑުގެ ވަސީލަތްތަކާއިބެހޭ ވަޒީރު އަހުމަދު ޝިޔާމް ވިދާޅުވީ، މި ސިނާޢަތް ތަރައްޤީ ކުރުމަކީ ސަރުކާރުން ވަރަށް އިސްކަމެއް ދީގެން ކުރަމުންދާ މަސައްކަތެއްކަމަށެވެ. އެގޮތުން ރާއްޖޭގެ ފަތުރުވެރިކަމުގެ ސިނާއަތުގައި ގިނަ ރިސޯޓުތަކުން ޚިދުމަތްދޭއިރު، ފަރުމަހުގެ މަސްވެރިކަމަށް ބޮޑު މާކެޓެއް އޮތްކަން ވަޒީރު ފާހަގަކުރެއްވިއެވެ.
މި ބައްދަލުވުމުގައި އެސްޑީއެފްސީގެ މެނޭޖިންގް ޑިރެކްޓަރ އައިޝަތު ފިފްޝީން ވިދާޅުވީ، ރާއްޖޭގެ މަސްވެރިކަމުގެ ސިނާޢަތް ފުޅާވަމުންދާއިރު، ފަރުމަހުގެ މަސްވެރިކަން ކުރާ ފަރާތްތައްވެސް އިތުރުވަމުންދާ ކަމަށެވެ. މިއާއެކު މި ސިނާޢަތުގެ އެކި ވިޔަފާރިތައް ކުރާ ފަރާތްތަކަށް އެސްޑީއެފްސީން ލޯނު ދެމުންދާ ކަމަށް ފިފްޝީން ވިދާޅުވިއެވެ.
ފަރުމަހުގެ މަސްވެރިކަމަށް ޚާއްސަކޮށްގެން ސަރުކާރުން ވަކި ލޯނެއް ތައާރަފްކުރުމުގެ ބޭނުމަކީ ފަރުމަހުގެ މަސްވެރިކަން ތަރައްޤީކޮށް ކުރިއެރުވުންކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވެއެވެ. އެގޮތުން ފަރުމަހުގެ މަސްވެރިކަމަށް ޚާއްސަކޮށްގެން ތައާރަފްކޮށްފައިވާ މިލޯނަކީ އެސްޑީއެފްސީގެ ކަނޑުފަޅުގެ ނަފާގެ ދަށުން ތައާރަފްކޮށްފައިވާ ލޯނެކެވެ.
ލޯނު ދޭ ދައިރާތައް:
ފަރުމަހުގެ މަސްވެރިކަން ކުރާ އުޅަނދު އަލަށް ބަނުމަށް ނުވަތަ ގަތުމަށް
ފަރުމަހުގެ މަސްވެރިކަން ކުރާ އުޅަނދު މަރާމާތުކުރުމާއި އިތުރު ބަދަލު ގެނައުމަށް
ފަރުމަހުގެ މަސްވެރިކަން ކުރާ އުޅަނދުގައި އިންޖީނު އެޅުމަށް
ފަރުމަހުގެ މަސްވެރިކަމަށް ބޭނުންވާ ވަސީލަތްތައް ގަތުމަށް
ފަރުމަހުގެ މަސްވެރިކަމަށް ޚާއްސަކޮށްގެން އިފްތިތާހް ކޮށްފައިވާ މި ލޯނު ނަގާއިރު ރަހުނު ނުބަހައްޓާ 7 ލައްކަ ރުފިޔާއާ ހަމައަށް ލޯނު ނެގޭނެއެވެ. ލޯނު އަނބުރާ ދެއްކުމަށް 10 އަހަރު ލިބޭ. ލޯނު ދައްކަން ފަށަން 6 މަހުގެ ގްރޭސް ޕީރިއަޑެއް ލިބެއެވެ.
ރާއްޖޭގައި ފުޅާ ދާއިރާއެއްގައި ކުރާ ފަރުމަހުގެ މަސްވެރިކަމަށް ޚާއްސަކޮށްގެން ލޯނެއް ތައާރަފްކޮށްފައިވާއިރު ސަރުކާރުގެ ސިޔާސަތަކީ ފަރުމަހުގެ މަސްވެރިކަން ކުރިއެރުވުމަށް ކޮށްދެވެން އޮތް މަސައްކަތެއް ކޮށްދިނުންކަން ވަނީ ހާމަކުރައްވާފައެވެ. އަދި މިސިނާޢަތް ތަރައްޤީ ކުރުމަށް ލޯނު ދިނުމަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ.