ނުދެވިހުރި ހުރިހާ ފައިސާ، މަސްވެރިންނަށް ދިނުމަށް މިފްކޯއާ ޙަވާލުކޮށްފި

މިއަދާ ހަމައަށް މަސްވެރިންނަށް ނުދެވިހުރި ފައިސާގެ ޖުމުލަ އަދަދު މިހާރު ވަނީ އެ ފަރާތްތަކަށް ރަށްދުކުރުމަށް މިފްކޯއަށް ޙަވާލުކުރެވިފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް އެކަން ހާމަކުރެއްވީ އެކްސްގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ ސަރުކާރު މެނިފެސްޓޯގައިވާ ފަދައިން 48 ގަޑި އިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ޤާއިމު ކުރުމުގެ މަސައްކަތް ކުރަމުންދާކަމަށެވެ.

ރައްޔިތުންގެ މަޖިލީހުގެ މެންބަރުންގެ ސުވާލުތަކަށް ޖަވާބު ދެއްވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވަނީ މަސްވެރިންނަށް 48 ގަޑިއިރުތެރޭ ފައިސާ ދިނުމުގެ ވަޢުދަކީ ހަނދާން ނައްތާލާނެ ވަޢުދެއް ނޫން ކަމަށް ވިދާޅުވެފައެވެ.

ވަޒީރު ވިދާޅުވީ، މަސްވެރިންނަށް މިވަގުތު ނުދެވިވާ ފައިސާގެ އަދަދަކީ 16،220،000 (ސޯޅަ މިލިޔަން ދެ ލައްކަ ވިިހި ހާސް) ރުފިޔާ ކަމަށެވެ. އަދި ފިނޭންސް މިނިސްޓްރީން މި ފައިސާ މިފްކޯއަށް މިއަދުގެ ވަގުތެއްގައި ޖަމާކޮށް މާދަމާ މަސްވެރިންނަށް މިފައިސާ ލިބޭނެ އިންތިޒާމު ހަމަޖައްސަވާނެ ކަމަށް ވަޒީރު ވިދާޅުވިއެވެ.

ވަޒީރު ޝިޔާމް ވިދާޅުވީ، ސަރުކާރު ހަވާލުވިއިރު 250 މިލިއަން ރުފިޔާ މަސްވެރިންނަށް ނުދެވި ހުރިކަމަށެވެ. ނަމަވެސް ސަރުކާރުން އެ ބެކްލޮގް ކްލިއަރކޮށް މަސްވެރިން ބާނާ މަހަށް މިހާރު ޤަވާއިދުން ފައިސާ ދެމުންދާކަމަށާއި، ސަރުކާރުން ވަޢުދުވީ ގޮތަށް 48 ގަޑިއިރު މަސްވެރިންނަށް ފައިސާ ދިނުމަށްވީ ވަޢުދު ފުއްދަނެކަމަށް ވަޒީރު ވިދާޅުވިއެވެ.

މަސްވެރިކަމާއި ބެހޭ ވަޒީރު، ވަނީ ރާއްޖޭގައި މިވަގުތު މަސްވެރިކަމުގެ ކެޕޭސިޓީ ދަށްވުމުން އެކަށީގެންވާ ވަރަށް މަސް ނުގަނެވޭކަން ފާހަގަކުރައްވާފައެވެ.