އައު އިސްލާޙާއެކު ކޮމިޝަންތަކުގެ ވެރިންނަށް ޤާނޫނުން ލިބިދޭ ބާރު ކަށަވަރުކުރެވޭނެ: ބަންޑާރަނައިބު

އައު އިސްލާހާއެކު މިނިވަން މުއައްސަސާތަކަށް އައްޔަންކުރެވޭ ރައީސުންނާއި ނައިބު ރައީސުންނަށް ޤާނޫނުން ލިބިދޭ ބާރު ކަށަވަރުކުރެވޭނެކަމަށް ދައުލަތުގެ ބަންޑާރަނައިބު އަޙްމަދު އުޝާމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ބަންޑާރަނައިބު އަޙްމަދު އުޝާމް ވިދާޅުވީ ބައެއް މިނިވަން މުއައްސަސާތަކުގެ ރައީސުންނާއި ނައިބު ރައީސުން އައްޔަންކުރަނީ ރައީސް މަޖިލީހަށް ނަން ފޮނުވުމުން، މަޖިލީހުން ރުހުން ދިނުމުން ކަމަށެވެ. އަދި އެންޓި ކޮރަޕްޝަން ކޮމިޝަނާއި އިލެކްޝަންސް ކޮމިޝަންގެ ޤާނޫނަށް މިހާރު ގެނެވޭ އިސްލާހާއެކު ކުރިން މެންބަރުންގެ ވޯޓުން ރައީސާއި ނައިބު ރައީސް އިންތިޚާބުކުރެވޭގޮތަށް އޮންނަ އޮތުން ބަދަލުކުރެވޭނެކަމަށް ބަންޑާރަނައިބު ވިދާޅުވިއެވެ.

ބަންޑާރަނައިބު ވިދާޅުވީ ހުރިހާ މިނިވަން މުއައްސަސާތަކަކުން އެއްގޮތަކަށް ޢަމަލުކުރުން މުހިންމުކަމަށާއި މިއިސްލާޙު ގެނެވެނީ އެހެންވެގެންކަމަށް އެމަނިކުފާނު ވިދާޅުވިއެވެ.

ބަންޑާރަނައިބު ވިދާޅުވީ މިހާރު ޤާނޫނު އޮންނަ ގޮތުން ރައީސުންނާއި ނައިބު ރައީސުންނަށް ޤާނޫނުގައި ބުނާ މަސްއޫލިއްޔަތުތަކާއި ޒިންމާތައް އަދާކުރުމުގައި ދަތިތައް ދިމާވާ ކަމަށެވެ.

"މިސާލަކަށް 5 މެންބަރުން ތިބޭ ކޮމިޝަނެއްގައި 3 މެންބަރުން ކޮމިޝަންގެ ރައީސްއާ ދެކޮޅަށް މަސައްކަތްކުރަން ފަށަިފިއްޔާ، ރައީސްގެ ބާރު އެ ނިގުޅައިގަނެވެނީ. އެހެންވީމަ މިކަން ވިޔަ ނުދިނުމަކީ ޤާނޫނަށް އިސްލާޙު ގެނައުމުގެ އެއް ބޭނުން. މީގެ ކުރިން މިކަހަލަ ކަންކަން ހިނގާފައި އެބަހުރި. މަޖިލީހުގެ ދައުރެއް އޮވެގެން ކޮމިޝަންތަކަށް ރައީސުން އައްޔަންކުރުން މުހިންމު. އޭރުން މަޖިލީހަށްވެސް އެމީހުން ޖަވާބުދާރީކުރުވުމުގެ ފުރުޞަތު އެބަ ލިބޭ." ބަންޑާރަނައިބު ވިދާޅުވިއެވެ.

ބަންޑާރަނައިބުގެ ވާހަކަފުޅުގައި ކޮމިޝަންގެ ރައީސުން، ރައީސުލްޖުމްހޫރިއްޔާ އައްޔަންކުރައްވާގޮތަށް ޤާނޫނަށް އިސްލާހު ގެންނާތީ އިދިކޮޅު ފަރާތްތަކުން ދައްކާ ވާހަކަތަކަށްވެސް ރައްދުދެއްވިއެވެ. އެގޮތުން މިނިވަން މުއައްސަސާތަކަށް ރައީސުލްޖުމްހޫރިއްޔާ ބާރުފޯރުވަން އުޅޭކަމަށް އިދިކޮޅު އެމްޑީޕީން ތުހުމަތުކުރާކަން ބަންޑާރަނައިބު ފާހަގަކުރެއްވިއެވެ. އެހެންނަމަވެސް، ޤާނޫނުތަކަށް އިސްލާހު ގެންނަނީ މިނިވަން މުއައްސަސާތަކަށް ދިމާވެފައިވާ ޤާނޫނީ މައްސަލަތައް ހައްލުކުރަންކަމަށް ބަންޑާރަނައިބު ވިދާޅުވިއެވެ.

ބަންޑާރަނައިބު ވިދާޅުވީ ނިމިދިޔަ އެމްޑީޕީގެ ސަރުކާރުގައި ކޮމިޝަންގެ މެންބަރުންނަށް ލިބިދީފައިވާ ބާރު ނިގުޅައިގަތް މަންޒަރު ފެނިފައިވާ ކަމަށެވެ.

"މިދިޔަ 5 އަހަރުގެ ތެރޭގައި ކިތައް ކޮމިޝަންގެ މެންބަރުންތޯ އެމްޑީޕީގެ މެޖޯރިޓީ އޮތް މަޖިލީހުން ވަކިކުރީ. ދައުރުން ބޭރުން ޖަލްސާއެއް ބާއްވައިގެން އޭސީސީގެ 5 މެންބަރުން ވަކިކުރި. އީސީން، ބްރޯޑްކާސްޓިން ކޮމިޝަންގެ މެންބަރުން ވަކި ކުރެއްވި. ބާރު ނިގުޅައިގަންނަން އުޅޭކަމަށްބުނެ އެބޭފުޅުން ވާހަކަދައްކަވަނީ ރަނގަޅު ނިޔަތެއް އޮވެގެނެއްނޫން." ބަންޑާރަނައިބު ވިދާޅުވިއެވެ.

އެއްވެސް މިނިވަން މުއައްސަސާއަކަށް ބާރުފޯރުވުމުގެ ނިޔަތުގައި އެއްވެސް ޤާނޫނަކަށް ސަރުކާރުން އިސްލާޙެއް ނުގެންނަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ވިދާޅުވެފައިވެއެވެ.

އަދި އިންތިޚާބު ކުރެވޭ އެއްވެސް ބައެއްގެ ބާރުތަކުގެ ތެރެއަށް ނުފޫޒު ފޯރުވުމަކީ މިއަދާ ހަމަޔަށްވެސް ކުރެއްވި ކަމެއް ނޫންކަމަށާއި މިނިވަން މުއައްސަސާތަކުން ޢަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމަށް ޤާނޫނަށް ގެންނަންޖެހޭ އިސްލާހެއް ގެންނަވާނެކަމަށްވެސް އެމަނިކުފާނު ވިދާޅުވެފައިވެއެވެ.