ރައީސް އިޢުލާންކުރެއްވި ޤައުމީ ޚިދުމަތުގެ ޕްރޮގްރާމް: ޒިންމާދާރު ޖީލެއް ބިނާކުރުމަށް އެޅޭ ހަރުދަނާ ބިންގަލެއް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވުމަށްފަހު ދަނީ ޤައުމު ބިނާކޮށް، ޤައުމުގެ ސަލާމަތާއި ރައްކާތެރިކަމަށް ކުރަންޖެހޭ އެންމެހައި މަސައްކަތްތައް ކުރައްވަމުންނެވެ. އެއްވެސް ފަސްޖެހުމެއް ނެތި އެ ވަގުތަކަށް ނަގަންޖެހުނު ކޮންމެ ނިންމުމެއް ވަރަށް ހިކުމަތްތެރިކަމާއެކު އެ މަނިކުފާނު ދަނީ ނަންގަވަމުންނެވެ.

ނަޞްރުގެ ދުވަހުގެ ރަސްމީ ޖަލްސާގައި އެ މަނިކުފާނު ވަނީ ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމުގެ ނަމުގައި ދިވެހި ޢަސްކަރިއްޔާއާއި ފުލުހުންގެ ޚިދުމަތަށް އޮފިސަރުން ރެކްރޫޓުކުރުމުގެ ޕްރޮގްރާމެއް ފައްޓަވާނެކަން އިޢުލާންކުރައްވާފައެވެ.

ރާއްޖޭގައި ވަރަށް ގިނަ ޒުވާނުން ކޮންމެ އަހަރަކުވެސް ކިޔަވައި ނިމެއެވެ. އޯ ލެވެލް ނިންމައި އޭ ލެވެލްއަށް ނުދެވި ކޮންމެ އަހަރަކުވެސް 2000 އާއި 3000 އާއި ދޭތެރޭގެ އަދަދެއްގެ ކުދިން އެބައުޅެއެވެ. އޭ ލެވެލް ނިންމައި ޑިގްރީ ނުފެށި ގާތްގަނޑަކަށް ކޮންމެ އަހަރަކުވެސް 500 އެއްހާ ކުދިން އުޅެއެވެ.

އެކަށީގެންވާ ތަޢުލީމެއް ނެތުމުގެ ސަބަބުން، ވަޒީފާގެ ފުރުޞަތު ނެތި ޑްރަގާއި، އެކިކަހަލަ ނުބައި ޢަމަލުތަކުގެ ތެރެއަށް ވިއްސިވިހާލިވަމުންދާ ޒުވާނުންގެ އަދަދު ރާއްޖޭގައި އަންނަނީ އިތުރުވަމުންނެވެ. މިކަމުގެ ސަބަބުން ސަރުކާރުން އުފުލަންޖެހޭ ބުރައާއި، މުޖުތަމަޢުން އުފުލަންޖެހޭ ބުރަ، އެ ކުދިންގެ ޢާއިލާތަކުން އަދި އެ ކުދިންވެސް އުފުލަންޖެހޭ ބުރަ ވަރަށްބޮޑެވެ. އޭގެ ސަބަބުން ޤައުމުގެ އިޤްތިޞާދަށްވެސް ދަނީ ނުރަނގަޅު އަސަރު ކުރަމުންނެވެ.

މީގެ އަހަރުތަކެއް ކުރިން ސްކޫލް ނިންމާ ކުދިން ސިފައިން ގޭގައި ވަކި މުއްދަތެއް ވަންދެން ތަމްރީން ވާންޖެހެއެވެ. މީގެ ސަބަބުން ސްކޫލް ނިންމައި މުޖްތަމައުއަށް ނިކުންނަ ކުދިންގެ އަޙްލާޤީ ފެންވަރު ރަނގަޅުވެ އެ ކުދިންނަކީ ޤައުމަށް ބޭނުންތެރި ކުދިންތަކަކަށް ވެގެންދިޔަކަމަށް ގިނަ ފަރާތްތަކުން ޤަބޫލުކުރެއެވެ.

ނަޞްރުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމް ނޭޝަނަލް ސަރވިސްގެ ގޮތުގައި، މި އަންނަ އަހަރުން ފެށިގެން ކޮންމެ އަހަރަކު ހިންގޭ ޤައުމީ ޕްރޮގްރާމެއް ފެށިގެންދާނެކަން އިޢުލާންކުރައްވާފައެވެ. މިއީ ޤައުމަށް ނުހަނު ބޭނުންވެފައިވާ ނަމަވެސް މި ވޭތުވެދިޔަ އެއްވެސް ސަރުކާރަކަށް ކުރަން ކެރިވަޑައިގަތް ކަމެއްނޫނެވެ.

ރައީސް ވިދާޅުވީ، ސްކޫލް ނިންމާ ނިކުންނަ ދަރިވަރުންގެ ތެރެއިން މުޖްތަމައުގައި އެކަހެރިވެގެންދާ ކުދިންނަކީ ރަނގަޅު ތަރުބިއްޔަތެއްދެވި، މިލިޓްރީ ތަމްރީނުދެވި، ރަނގަޅު ބަޔަކަށްހެދި، ވަޒީފާ ލިބިފައި ތިބޭ ބަޔަކަށް ހެދިއްޖިނަމަ، އެއީ އެ ކުދިންނަށްވެސް، ޢާއިލާތަކަށްވެސް، ޤައުމަށްވެސް، ސިފައިންނަށްވެސް ކޮށްދެވޭނެ ވަރަށްބޮޑު ކަމަކަށްވާނެކަމަށެވެ. އަދި ސިފައިންގެ ޚިދުމަތަށްވެސް ލިބޭނެ ވަރަށްބޮޑު ކުރިއެރުމަކަށް ވާނެކަމަށެވެ.

ސިފައިންގެ ޚިދުމަތަށް މި ސަރުކާރުން ބޭނުންވާ ސްކޭލްގައި، ކުރިއަށް އޮތް ހަތަރު އަހަރަށް ބޮޑުކުރަން ބޭނުންވާނަމަ، ކޮންމެ އަހަރަކު އިތުރު އެއްހާސް އޮފިސަރުން ރެކްރޫޓް ކުރުމަކީ ކުރަންޖެހޭ ކަމެއްގެ ގޮތުގައި ރައީސް ވަނީ ފާހަގަކުރައްވާފައެވެ.

މި އަންނަ އަހަރުން ފެށިގެން ކޮންމެ އަހަރަކު ހިންގޭ ޤައުމީ ޕްރޮގްރާމަކަށް މި ޕްރޮގްރާމް ވެގެންދާނެކަމަށް ރައީސް ވިދާޅުވިއެވެ. 2025 އަށް ހުށަހަޅާފައި އޮތް ބަޖެޓުގައި ނިއު ޕޮލިސީ އިނީޝިއޭޓިވްސް، އެން.ޕީ.އައި.ގެ ތެރެއިން 400 މިލިއަން ރުފިޔާ މިކަމަށް ޚާއްޞަ ކުރެވިގެންދާނެކަން ރައީސް ވަނީ ފާހަގަކުރައްވާފައެވެ. އަދި ކޮންމެ އަހަރަކު، އިތުރު 400 މިލިއަން ރުފިޔާ އިތުރުކުރެވިގެންދާނެކަން ފާހަގަކުރެއްވިއެވެ.

"މިއީ، ހިސާބުޖަހައި، ކަމާބެހޭ ވުޒާރާތަކުގެ ހިސާބުތައް އަޅުގަނޑު ހޯދައި، ހުރިހާ ކަމެއް ކަލްކިއުލޭޓްކޮށް، ފައިނަލް ކުރެވިފައި ހުރި ޢަދަދުތަކެއް. މި ޢަދަދުން 400 މިލިއަން ރުފިޔާއިން އަޅުގަނޑުމެންނަށް ކޮންމެ އަހަރަކު ސިފައިންގެއަށް 1000 ކުދިން، ފުލުހުންނަށް 250 ކުދިން ވެއްދޭނެ. ޖުމްލަ 5000 ކުދިން. ކުރިއަށް އޮތް ހަތަރު އަހަރުގެ ތެރޭގައި، މަގުމަތީގައި ބާކީވެފައި ތިބުމުގެ ބަދަލުގައި، ފުލުހުންގެ ތަމްރީނު، ސިފައިންގެ ތަމްރީނު ލިބިފައި ތިބި، އަޚްލާޤު ރަނގަޅު، ޤައުމަށް ފައިދާހުރި، މުޖުތަމަޢަށް ފައިދާހުރި ބައެއް ގޮތުގައި އިރާދަކުރެއްވިއްޔާ ވެގެންދާނެ." ރައީސް ޑރ. މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާނެކަން އިޢުލާންކުރެއްވި މި ޕްރޮގްރާމާއެކު ދިވެހި އަސްކަރިއްޔާގެ ފައުޖަށް ޒުވާނުން އިތުރުވެ، މުޖްތަމައުގައި ބާކީވެފައިވާ ޒުވާނުންނަކީވެސް ޤައުމަށް މުހިންމު ބޭނުންތެރި ބަޔަކަށް ވެގެންދާނެއެވެ. އަދި މިއީ ޤައުމުދެކެ ލޯބިވާ ޒިންމާދާރު ޖީލެއް ބިނާކުރުމަށް އެޅިގެންދާނެ މުހިންމު ފިޔަވަޅަކަށް ވެގެންދާނެއެވެ.