ވޭޕު ބޭނުންކުރުމާއި އެތެރެކުރުން މަނާކުރުމަށް ހުށަހެޅި އިސްލާޙު ކޮމިޓީން ފާސްކޮށްފި

ވޭޕު ބޭނުންކުރުމާއި އެތެރެކުރުން މަނާކުރުމަށް ދުންފަތް ކޮންޓްރޯލުކުރުމާބެހޭ ޤާނޫނަށް ހުށަހެޅި އިސްލާޙު ރައްޔިތުންގެ މަޖިލީހުގެ އިޖުތިމާޢީ ކޮމިޓީން ފާސްކޮށްފިއެވެ.

މިބިލު ފާސްކޮށްފައިވަނީ މިދިޔަ ބުދަ ދުވަހު ކުރިއަށްގެންދިޔަ އިޖުތިމާޢީ ކޮމިޓީގެ ބައްދަލުވުމުގައެވެ. މި ބައްދަލުވުމުގައި ކޮމިޓީ މަރުޙަލާގައި ބިލަށް ހުށަހެޅި އިސްލާޙުތަކާއެކު ފާސްކުރުމަށް ހުށައެޅުއްވީ ދާންދޫ ދާއިރާގެ މެމްބަރު މުޙައްމަދު ފަޟީލެވެ. މި ހުށައެޅުމަށް ތާޢީދުކުރެއްވީ ކޮމަންޑޫ ދާއިރާގެ މެންބަރު މުޙައްމަދު އިބްރާހީމެވެ. މި ހުށައެޅުން ކޮމިޓީގެ އިއްތިފާޤުން ވަނީ ފާސްވެފައެވެ. އެހެންކަމުން ދެން އޮންނާނީ ކޮމިޓީ ރިޕޯޓު މަޖިލީހުގެ ތަޅުމަށް ހުށަހެޅުމަށްފަހު، ބިލު މަޖިލީހުން ފާސްކުރުމެވެ.

ދުންފަތް ކޮންޓްރޯލުކުރުމާބެހޭ ޤާނޫނަށް އިސްލާހު ގެނައުމުގެ ބިލު ރައްޔިތުންގެ މަޖިލީހަށް ހުށަހެޅުއްވީ ހެންވޭރު އުތުރު ދާއިރާގެ މެންބަރު އަޙްމަދު އައިފާނެވެ. މި ބިލު މަޖިލީހަށް ހުށަހަޅާފައިވަނީ މިދިޔަ މަހުގެ 23ވަނަ ދުވަހުއެވެ.

ދުންފަތް ކޮންޓްރޯލުކުރުމާބެހޭ ޤާނޫނަށް ގިނަ އިސްލާޙުތަކެއް ސަރުކާރުން ވަނީ ހުށަހަޅުއްވާފައެވެ. އެގޮތުން ދުންފަތުގެ އިސްތިޢުމާލު ކުރެވޭ، ވިއްކޭ އަދި އެފަދަ އެއްޗެއް ވިއްކުމުގައި ބައިވެރިކުރެވޭނީ 21 އަހަރުން މަތީގެ ޢުމުރުގެ މީހުންކަމަށް އައު އިސްލާޙުގައި ބަޔާންކޮށްފައިވެއެވެ. މީގެ ކުރިން 18 އަހަރުން މަތީގެ މީހުންނަށް މިކަންކަން ޤާނޫނު ހުއްދަކުރެއެވެ.

މީގެ އިތުރުން އިލެކްޓްރޯނިކް ސިނގިރޭޓު ނުވަތަ ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖެ އެތެރެކުރުމަކީ މަނާކަމެއްކަމަށް އިސްލާޙުގައިވަނީ ބަޔާންކޮށްފައެވެ. އަދި މިފަދަ ކަމެއް އެއްވެސް މީހަކު ކޮށްފިނަމަ، އެމީހުން 50،000 ރުފިޔާއިން ޖޫރިމަނާކުރެވޭނެ ކަމަށާއި އެއާއެކު އެތެރެކުރި ކޮންމެ އާލާތަކަށް 10،000 ރުފިޔާގެ މަގުން ޖޫރިމަނާކުރެވޭނެކަމަށް އިސްލާޙުގައި ވަނީ ބަޔާންކޮށްފައެވެ.

ހަމައެއާއެކު އިލެކްޓްރޯނިކް ސިނގިރޭޓު ނުވަތަ ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ވިއްކުމާއި ބޭނުންކުރުމާއި ހިލޭ ބެހުންވެސް ވަނީ މަނާކޮށްފައެވެ. އަދި އެފަދަ ކަމެއްކޮށްފިނަމަ 20،000 ރުފިޔާއިން ޖޫރިމަނާކުރެވޭނެ ކަމަށާއި އެފަދަ އާލާތެއް ވިއްކި ކޮންމެ ފަހަރަކަށް 10،000 ރުފިޔާގެ މަގުން ޖޫރިމަނާކުރެވޭނެކަމަށް އިސްލާޙު ގެނައުމުގެ ބިލުގައި ވަނީ ބަޔާންކޮށްފައެވެ. މީގެ ކުރިން ވޭޕް ބޭނުންކުރުމާއި އެތެރެކުރުމާއި މަނާކުރުމުގެ އެއްވެސް ވާހަކައެއް ޤާނޫނުގައި ބަޔާންކޮށްފައިނުވެއެވެ.

ދިވެހިރާއްޖޭގައި ދުންފަތް ކޮންޓްރޯލްކޮށް، އެ ބޭނުންކުރުމަށް ދިމާވާ ނުރައްކާތަކުން ދިވެހި މުޖުތަމަޢު ސަލާމަތްކުރުމަށް ދިވެހި ސަރުކާރުން ދަނީ ގިނަ ފިޔަވަޅުތަކެއް އެޅުމަށް ނިންމަވާ، މަސައްކަތްތަކެއް ކުރައްވަމުންނެވެ. އަދި ދުންފަތް ކޮންޓްރޯލްކުރުމާބެހޭ ޤާނޫނަށް ގިނަ އިސްލާޙުތަކެއް ސަރުކާރުގެ ފަރާތުން ހުށައަޅުއްވާފައިވަނީވެސް މި މަސައްކަތުގެ ދަށުންނެވެ.