ސްޕެއިނުގެ ރެއާލް މެޑްރިޑްގެ ޑިފެންސްލައިނަށް ކުރިމަތިވެފައިވާ މައްސަލަ އަށް ހައްލު ހޯދާފައިވާ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.
ރެއާލްގެ ކޯޗު، އަންޗެލޮޓީ،65، މިހެން ބުނީ، ލީގުގައި އޮސަސޫނާއާ ދެކޮޅަށް ރެއާލް ކުޅުމަށް ހަމަޖެހިފައިވާ މެޗުގެ ކުރީން ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައެވެ.
އަންޗެލޮޓީ ވަނީ، ރެއާލްގެ ކުޅުންތެރިންނާއެކު ދެކެވުނު ވާހަކަތަކަށްފަހު އޭނާގެ ޓީމުގެ ޑިފެންސަށް ކުރިމަތިވެފައިވާ މައްސަލައަށް ހައްލު ލިބިފައިވާ ކަމަށް ބުނެފައެވެ.
"މިއީ ޑިފެންސަށް ކުރިމަތިވެފައިވާ މައްސަލައެއް، އޮފެންސިވް މައްސަލައެއް ނޫން." ރެއާލްގެ ކޯޗު، އަންޗެލޮޓީ ބުންޏެވެ.
އަންޗެލޮޓީ ބުނީ، މިދިޔަ ދުވަސްތަކުގައި ރެއާލްގެ ފޯމާ ގުޅޭގޮތުން ސްކޮޑުގައި ހިމެނޭ ހުރިހާ ކުޅުންތެރިންނާއެކު މަޝްވަރާތައް ބާއްވާފައިވާ ކަމަށާއި، އެ ޓީމަށް ކުރިމަތިވެފައިވާ މައްސަލަތަކަށް ހައްލެއް ހޯދިފައިވާ ކަމަށް ގަބޫލުކުރާ ކަމަށެވެ.
އެންމެ ފަހުގެ ޔޫރަޕްގެ ޗެމްޕިއަންކަން ހޯދާފައިވާ ރެއާލުން އެންމެ ފަހުން އަމިއްލަ ދަނޑުގައި ޗެމްޕިއަންސް ލީގުގައި އިޓަލީގެ އޭސީ މިލާނާ ދެކޮޅަށް 3-1 އިން ބަލިވިއިރު، އޭގެކުރީން ލީގުގައި ވާދަވެރި ބާސެލޯނާއާ ދެކޮޅަށް ކުޅުނު 'އެލް ކްލެސިކޯ' ޑާބީ އިން ވަނީ 4-0 ގެ ތަފާތު ބޮޑު ނަތީޖާއަކުން ބަލިވެފައެވެ.
"އަހަރެމެން އެކަމާ ގުޅޭގޮތުން ވާހަކަދައްކައިފިން، މިހާރުގެ ހާލަތު ދެނެގަތުމަށްފަހު ރަނގަޅުކުރުމަށް ކުޅުންތެރިންނާއެކު މަސައްކަތްކޮށްފިން." ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި އަންޗެލޮޓީ ބުންޏެވެ.
އަންޗެލޮޓީ އިތުރަށް ބުނީ، އޭނާގެ ޓީމަށް ކުރިމަތިވެފައިވާ މައްސަލަތަކަށް ހައްލު ލިބިފައިވާ ކަމަށް ގަބޫލުކުރާ ކަމަށާއި، އެއީ ތިއަރީ އިން ކަމަށް އޭނާ އަށް އެނގޭ ކަމަށެވެ. އަދި، އެކަން އަމަލީގޮތުން އޭނާގެ ކުޅުންތެރިން ދައްކުވައިދޭން ޖެހޭ ކަމަށް ވެސް އަންޗެލޮޓީގެ ވާހަކައިގައި ފާހަގަކުރިއެވެ.
އޭނާ އަށް ފެންނަނީ ޓީމު ވަރަށް އެއްބައިވަންތަކޮށް އޮތްތަން ކަމަށާއި، މިހާތަނަށް ދެނެގަނެވުނު މައްސަލަތަކަށް ހޯދުނު ހައްލުތަކަކީ ރަނގަޅު ނިންމުމެއް ކަމަށް ވެސް އަންޗެލޮޓީ ބުންޏެވެ. އަދި، އެކަމަށް އެންމެ ރަނގަޅު ގޮތުގައި ކުރިއަށް އޮތް މެޗުގައި ޖަވާބުދެވޭތޯ ބަލަންޖެހޭނެ ކަމަށް ވެސް އަންޗެލޮޓީ ވަނީ ބުނެފައެވެ.
އޭގެފަހުން، ރެއާލްގެ ބްރެޒިލް ވިންގް، ވިނީޝިއުސް ޖޫނިއާގެ އެންމެ މޮޅު ކުޅުން ދެއްކުމަށްޓަކައި ފްރާންސްގެ ފޯވާޑް، ކީލިއަން އެމްބާޕޭއާ އެ ދެ ކުޅުންތެރިން ކުޅެމުން އަންނަ މަގާމު ބަދަލުކުރުމާ ގުޅޭގޮތުން، ކުރެވުނު ސުވާލުތަކަށް ޖަވާބުދެމުން އަންޗެލޮޓީ ވަނީ، އޭނާގެ ޓީމަށް މައްސަލަ ކުރިމަތިވެފައިވަނީ ޑިފެންސަށް ކަމަށެވެ.
"ވިނީ ކުޅެމުން އަންނަ މަގާމު ބަދަލުކުރަން އަހަރެން ބޭނުމެއްނެތް. އެއީ އޭނާ ތަފާތު ދައްކާފަ، އެމްބާޕޭ އަށް ސެންޓްރަލް ފޯވާޑަށް ކުޅެވޭތީވެ." އަންޗެލޮޓީ ބުންޏެވެ.
"މިއީ ދިފާއީ މައްސަލައެއް، އޮފެންސިވް ނުވަތަ ކުޅުންތެރިން ކުޅެމުންއަންނަ މަގާމާ ގުޅޭ މައްސަލައެއް ނޫން." ނިންމާލަމުން އަންޗެލޮޓީ ބުންޏެވެ.
ރެއާލުން ދެން ކުޅޭ މެޗުގައި އޮސަސޫނާއާ ބައްދަލުކުރުމަށްފަހު ކުރިއަށް އޮތް އިންޓަނޭޝަނަލް ބްރޭކަށްފަހު ދެން އޮތް މެޗުގައި މި މަހުގެ 24 ވަނަ ދުވަހު ރަށުން ބޭރުގައި ނިކުންނާނީ ލެގަނޭސްއާ ދެކޮޅަށެވެ.