މިމަހު 20 ގައި ފެށުމަށް ހަމަޖެހިފަވާ ނައިންޓީ ޕްލަސް ގޯލްޑްކަޕް ފުޓްބޯޅަ މުބާރާތަށް ރާއްޖޭގައި ފުޓްބޯޅަ ކުޅުންތެރިންނާ ރަށްރަށުން ބޮޑު ތަރުހީބެއް ލިބެމުން އަންނަ ކަމަށް މުބާރާތުގެ ފައުންޑަރ އަދި ތަޖުރިބާކާރު ކޯޗު އަލީ ނިސްތާރު ބުނެފިއެވެ.
ޕީއެސްއެމް އިން ގެނެސްދޭ "ކުޅިވަރު ވިންދު" ޕްރޮގްރާމްގައި ވާހަކަދައްކަމުން ނިސްތާރު ބުނީ އަދިވެސް އޭނާ އަކީ ފުރަތަމަ ޑިވިޝަންގެ ގްރީން ސްޓްރީޓްސްގެ ކޯޗު ކަމަށާއި ދިމާވި ހަލާތަކާ އެކު އެކުލަބަށް ނިސްބަތްވާ ގިނަ ކުޅުންތެރިން ކުލަބު ދޫކޮށްލާފަވާކަމަށެވެ. އެހެންނަމަވެސް "އަލުން އަނބުރާދަނޑަށް" މި ޝިޔާރުގެ ދަށުން ކުޅުން ހުއްޓާލާފައި ތިބި ގިނަ ކުޅުންތެރިން ފެންނާނެ ކަމަށާއި މުބާރާތުގެ ސަބަބުން އެ ކުޅުންތެރިންނާއި ފުޓްބޯޅައަށްވެސް ދިރުމެއް ލިބިފަވާކަމަށެވެ.
"ޓެކްނިކަލީ ބަލައިފިއްޔާ އަހަރެއް ދެ އަހަރެއް ވަރު ނުކުޅެހުރެ ދެން އަލުން އަނބުރާ އަންނަން ވަރަށް އުނދަގޫވާނެ، އެނގިވަޑައިގަންނަވާނެ އަޅުގަނޑުމެން ލީގަށް ބަލައިފިއްޔާމުން މަޑުމަޑުން ސަޕޯޓު ގެއްލެމުން ދަނީ" ނިސްތާރު ބުންޏެވެ.
މި މުބާރާތުގެ ސަބަބުން ދިވެހި ޕްރިމިއަރ ލީގުން ހުނަރުވެރި ގިނަ ކުޅުންތެރިންތަކެއް ފެންނާނެ ކަމަށާއި މިއީ ރަށްރަށުގައި އެންމެ މަތީ ފަންތީގައި ކުޅެން ފުރުސަތު ބޭނުންވެފަ ތިބި ކުޅުންތެރިންނަށް ލިބިގެންދާ ރަނުގެ ފުރުސަތެއް ކަމަށެވެ.
ރާއްޖޭގެ ފުޓްބޯޅައިގެ ފޯރި އަލުން ވީހާވެސް ބޮޑަށް ގަދަކުރުމުގެ ގޮތުން މުޅިން އަލަށް ބާއްވާ ގޯލްޑް ކަޕް ފެށުމަށް ހަމަޖެހިފައިވަނީ މި މަހުގެ 20 ވަނަ ދުވަހެވެ. މި މުބާރާތުގައި މި ފަހަރު 22 ޓީމު ވާދަކުރާއިރު، ޓީމުތަކުން އަންނަނީ ވަރުގަދައަށް ތައްޔާރީތައް ކުރިއަށް ގެންދަމުންނެވެ.