ޖަރުމަން ކަޕް މެޗެއްގައި ބަޔާން މިއުނިކްގެ ސަޕޯޓަރުން ހަމަނުޖެހުން ހިންގާފައިވާތީވެ، އެ ގައުމުގެ ފުޓްބޯޅަ ފެޑެރޭޝަން (ޑީއެފްބީ) އިން އެ ކްލަބު 150،000 ޔޫރޯ (158،940 އެމެރިކާ ޑޮލަރު) އިން ޖޫރިމަނާކޮށްފިއެވެ.
މިދިޔަ އޮގަސްޓް މަހުގައި ޖަރުމަން ކަޕްގައި ރަށުން ބޭރުގައި އުލްމް އަތުން 4-0 އިން ބަޔާން މޮޅުވި މެޗުގައި އެ ޓީމުގެ ސަޕޯޓަރުން ވަނީ ފަޓާސް ބޭނުންކޮށްގެން ހަމަނުޖެހުން ހިންގާފައެވެ. ބަޔާނުން ވަނީ މި އަދަބު ގަބޫލުކޮށްފައެވެ.
"އެސްއެސްވީ އުލްމްއާ ދެކޮޅަށް ކުޅުނު ޑީއެފްބީ ކަޕް މެޗުގެ 46 ވަނަ މިނެޓުގައި... މިއުނިކްގެ ސަޕޯޓަރުން މަދުވެގެން 70 ފްލެއަރ އަދި 4 ފަޓާސް ބެޓަރީ ރޯކުރި، އަދި އޭގެ ތެރެއިން ބައެއް ޓްރޭސަރ އެލެމެންޓްސް އަދި ރޮކެޓް ދޫކޮށްލެވުނު،" ޑީއެފްބީ އިން ނެރުނު ބަޔާނެއްގައި ބުނެފައިވެއެވެ.
"މީގެ ތެރެއިން ބައެއް ފަޓާސް ދަނޑަށް އަމާޒުކުރެވުނު، އަދި ބޯ ދުމުގެ ސަބަބުން ގާތްގަނޑަކަށް 3 މިނެޓަށް މެޗު މެދުކަނޑާލަން ޖެހުނު."
އަދި، އެ ކްލަބުން ދައްކަންޖެހޭ ޖޫރިމަނާގެ ތެރެއިން ގާތްގަނޑަކަށް 50 ހާސް ޔޫރޯ އަށް ވުރެ ގިނަ ނޫން އަދަދެއް ސަލާމަތީ ކަންތައްތަކަށާއި، ހަމަނުޖެހުން ހުއްޓުވުމުގެ ފިޔަވަޅުތަކަށް ބޭނުންކުރެވިދާނެ ކަމަށް ވެސް އެ ބަޔާނުގައިވެއެވެ. މީގެއިތުރުން، އެ ކަންތައް އަންނަ އަހަރުގެ ޖޫން މަހުގެ 30 ވަނަ ދުވަހުގެ ކުރީން ޖަރުމަންގެ ފުޓްބޯޅަ ފެޑެރޭޝަނަށް ބަޔާނުން ސާބިތުކޮށްދޭން ޖެހޭނެ ކަމަށް ވެސް ވެއެވެ.
މި ފަހަރުގެ ސީޒަނުގައި ރަނގަޅު ކުޅުމެއް ދައްކަމުން އަންނަ ބަޔާން މިވަގުތު އޮތީ ޖަރުމަން ލީގުގެ އެއްވަނައިގައެވެ. އެ ޓީމަށް މިހާތަނަށް ކުޅުނު 10 މެޗުން 26 ޕޮއިންޓާއެކު، އެއްވަނައިގައި ވަނީ ފަސް ޕޮއިންޓްގެ ލީޑެއްނަގައިފައެވެ. ޖަރުމަން ކަޕްގައި އެ ޓީމަށް ދެން އޮތީ ގަދަ 16 ގެ ބުރުގައި އަންނަ ޑިސެންބަރު މަހުގެ ތިންވަނަ ދުވަހު އެންމެ ފަހުގެ ޗެމްޕިއަން، ބަޔާ ލެވަކޫސަންއާ ދެކޮޅަށް ކުޅޭ މެޗެވެ.