އަންނަ އަހަރުގެ ޗެމްޕިއަންސް ޓްރޮފީއަށްފަހު އޯޑީއައި ކްރިކެޓުން އަފްޣާނިސްތާންގެ ނާބީ ރިޓަޔާކުރަނީ

އަންނަ އަހަރު ބޭއްވުމަށް ހަމަޖެހިފައިވާ ޗެމްޕިއަންސް ޓްރޮފީ އަށް ފަހު އޯޑީއައި (ވަންޑޭ އިންޓަރނޭޝަނަލް) ކްރިކެޓުން އަފްޣާނިސްތާންގެ އޯލްރައުންޑަރު، މުޙައްމަދު ނާބީ ރިޓަޔާކުރާން ނިންމައިފިއެވެ.

އުމުރުން 39 އަހަރުގެ ނާބީ މިހެން ބުނީ، ޔޫއޭއީގައި ބަންގްލަދޭޝްއާ ދެކޮޅަށް ކުޅުނު އޯޑީއައި ސީރީޒްގައި 2-1 އިން އަފްޣާނިސްތާނުން ކާމިޔާބު ހޯދުމަށްފަހު، ޕްލެއާ އޮފް ދަ ސީރީޒްގެ އިނާމު ލިބުމުން ދެއްކި ވާހަކައިގައެވެ.

"ފާއިތުވި ވޯލްޑް ކަޕުން ފެށިގެން އަހަރެން ހިތުގައި ރިޓަޔާކުރުމުގެ ހިޔާލު އޮތް. އެކަމަކު ދެން އަހަރުމެން ޗެމްޕިއަންސް ޓްރޮފީއަށް ކޮލިފައިވީމަ އަހަރެން ހިތަށްއެރީ އެ މުބާރާތަށްފަހު އެކަން ކުރަން ރަނގަޅުވާނެއޭ،" ބަންގްލަދޭޝްއާ ދެކޮޅަށް ކުޅުނު ތިންވަނަ އޯޑީއައި މެޗަށްފަހު ނާބީ ބުންޏެވެ.

އޭނާ މިނިންމުން އަފްޣާނިސްތާން ކްރިކެޓް ބޯޑު (އޭސީބީ) އަށް އަންގާފައިވާކަމަށް ބެލެވެއެވެ. އަދި މިހާރެކޭ އެއްގޮތަށް ޓީ20އައި ކުޅުން ކުރިއަށް ގެންދާނެއެވެ.

އޭސީބީގެ މީޑިއާ ޓީމަށް ދިން އިންޓަވިއުގައި އޭނާ ބުނީ، "އަހަރެން ބަލާނަން، އެކަމަކު އަހަރެން މާގިނަ ދުވަހަކު ނުކުޅޭނަން. އިރާދަކުރެއްވިއްޔާ، ޗެމްޕިއަންސް ޓްރޮފީއަށްފަހު، އަހަރެން އޯޑީއައި އަށް އަލްވަދާއު ކިޔާނަން."

ނާބީ އަކީ މިހާތަނަށް 167 މެޗު ކުޅެ، އޯޑީއައި ކްރިކެޓްގައި އަފްޣާނިސްތާނަށް އެންމެ ގިނަ މެޗު ކުޅެދިނުމުގެ ރެކޯޑް އޮތް ކުޅުންތެރިޔާއެވެ. އަދި، އޭނާ އަކީ އައިސީސީގެ ރޭންކިންގައި އޯޑީއައި ކްރިކެޓްގެ އޯލްރައުންޑަރުންގެ ތެރެއިން އެއްވަނައިގައި އުޅޭ ކުޅުންތެރިޔާ ވެސް މެއެވެ.

ނާބީ އެންމެ ފުރަތަމަ އަފްޣާނިސްތާނަށް ކުޅުނު އޯޑީއައި މެޗަކީ 2009 ގައި ސްކޮޓްލެންޑާ ދެކޮޅަށް ކުޅުނު މެޗެވެ. އޭގެފަހުން، މިހާތަނަށްއައިއިރު އޭނާ ވަނީ ވަންޑޭ ކްރިކެޓްގައި 3600 ލަނޑުހަދައި، އެންމެ ގިނަ ލަނޑުހެދި ކުޅުންތެރިންގެ ލިސްޓުގެ ދެވަނަ އަށް ޖެހިލައިފައެވެ. އަދި، 27.48 އެވްރެޖަކާއެކު 17 ފަހަރު ބައިސައްތަ އާއި ދެ ފަހަރު ސައްތަ ހަދާފައިވެއެވެ. އޮފްސްޕިނަރެއްގެ ގޮތުން، އޭނާ ވަނީ 32.47 ގެ އެވްރެޖެއްގައި 172 ވިކެޓް ނަގާފައެވެ. މިއާއެކު، އޭނާ އަކީ އަފްޣާނިސްތާނުގެ ދެވަނައަށް އެންމެ ގިނަ ވިކެޓް ނެގި ކުޅުންތެރިޔާ އެވެ.

އަންނަ އަހަރުގެ ޗެމްޕިއަންސް ޓްރޮފީ އަކީ އަފްޣާނިސްތާނު ވާދަކުރާ ފުރަތަމަ މުބާރާތެވެ. އެ ޓީމުން އެ މުބާރާތަށް ކޮލިފައިވީ އެންމެ ފަހުގެ ކްރިކެޓް ވޯލްޑް ކަޕްގެ ހަވަނަ މަގާމު ހޯދައިގެންނެވެ. ޗެމްޕިއަންސް ޓްރޮފީގައި ވާދަކުރާނީ، ހޯސްޓް ޕާކިސްތާނުގެ އިތުރުން، އެންމެ ފަހުގެ ވޯލްޑް ކަޕުގެ އެންމެ ކުރިހޯދި ހަތް ޓީމެވެ.