ހުޅުމާލޭގައި އެފްޑީސީން ހަދާ 32 ޓަވަރުގެ ކޮމަރޝަލް ޔުނިޓުތައް ކުއްްޔަށް ދޫކުރަނީ
-
32 ޓަވަރުގައި 127 ކޮމަރޝަލް ޔުނިޓުހުރޭ
-
ކުއްޔަށް ހިފުމުގެ ފުރުޞަތަށް އަންނަ ހަފްތާގެ ތެރޭގައި ހުޅުވާލެވޭނެ
ހުޅުމާލޭގެ ދެވަނަ ފިޔަވަހީގައި ތަރައްޤީކުރާ 32 ފްލެޓް ޓަވަރުގެ ކޮމަރޝަލް ޔުނިޓުތައް ކުއްޔަށް ދޫކުރަން ވަރަށް އަވަހަށް ހުޅުވާލެވޭނެކަމަށް ފަހި ދިރިއުޅުން ކޯޕަރޭޝަން، އެފްޑީސީން ވިދާޅުވެއްޖެއެވެ.
މީޑިއާތަކަށް މަޢުލޫމާތު ދެއްވަމުން އެފްޑީސީން ވިދާޅުވީ އެ ކުންފުނިން ތަރައްޤީކުރަމުންދާ 32 ޓަވަރުތަކުގައި ކޮމަރޝަލް ޔުނިޓު ނުވަތަ ވިޔަފާރިކުރުމަށާއި އެހެނިހެން ބޭނުންތަކަށް ޚާއްސަކޮށްފައި ހުންނަ ޖާގަތައް ހުންނާނީ ކޮންމެ ޓަވަރެއްގެވެސް އެންމެ ތިރީ ބަޔާއި ފުރަތަމަ ފަންގިފިލާގައި ކަމަށެވެ. އެގޮތުން ގާތްގަނޑަކަށް 127 ޖާގަ ހުންނާނެކަމަށް މަޢުލޫމާތު ދެއްވިއެވެ.
އެފްޑީސީން ވިދާޅުވީ 32 ޓަވަރު އެކި ޒޯންތަކަށް ބަހާލާފާ ހުންނައިރު ފުރަތަމަ ކުއްޔަށް ދޫކުރަން ހުޅުވާލާނީ ޒޯން 1 ގައި ހިމެނޭ ޓަވަރުތަކުގެ ކޮމަރޝަލް ޔުނިޓުތައްކަމަށެވެ. އެގޮތުން އަންނަ ހަފްތާގައި އެކަމަށް ހުޅުވާލެވޭނެ ކަމަށާއި އެހެން ޒޯންތަކަށްވެސް ވަރަށް އަވަހަށް ހުޅުވާލެވޭނެކަމަށް އެފްޑީސީން ވިދާޅުވިއެވެ.
އެފްޑީސީން ވިދާޅުވީ ޓަވަރުތަކުގެ ކޮމަރޝަލް ޖާގަތައް، އެކި ކަންކަމަށް ޚާއްސަކޮށްފައި ހުންނާނެކަމަށާއި މިގޮތަށް ޚާއްސަކޮށްފައި ހުންނާނީ ވަކި ތަރުތީބަކުން ކަމަށެވެ. އެގޮތުން ކޮންމެ ޓަވަރަކުންވެސް 5 މިނެޓުން ހިނގާފައިދެވޭ ހިސާބުގައި ތަފާތު ބާވަތްތަކުގެ ކާބޯތަކެތި ވިއްކާ ފިހާރަތަކާއި މާޓްތައް ހުންނާނެކަމަށް އެ ކުންފުނިން ވިދާޅުވިއެވެ. އަދި 10 މިނެޓުން ހިނގާފައިދެވޭ ދުރުމިނުގައި ޞިއްޙީ ޚިދުމަތްދޭ މަރުކަޒުތައް ހުންނާނެ ކަމަށާއި 20 މިނެޓުން ހިނގާފައިދެވޭ ދުރުމިނުގައި ޒުވާނުންގެ ސެންޓަރުތަކާއި އޮފީސް ޖާގަތައް ހުންނާނެކަމަށްވެސް އެފްޑީސީން މަޢުލޫމާތު ދެއްވިއެވެ. މީގެއިތުރުން ކެފޭ، ރެސްޓޯރަންޓްތަކަށް ޚާއްސަކޮށްފައި ހުންނަ ޖާގަތައްވެސް ހުންނާނެކަމަށް އެފްޑީސީން ވިދާޅުވެއެވެ.
އެފްޑީސީން ވިދާޅުވީ އަމާޒަކީ ފްލެޓުތަކުގައި މީހުން ދިރިއުޅެން ފެށުމުގެ ކުރިން ޒަރޫރީ ބޭނުމަށް ގަންނަންޖެހޭ ތަކެތި ގަނެވޭ ފިހާރަތައް ޓަވަރުތަކުގައި ޤާއިމްކުރުން ކަމަށެވެ.
އެފްޑީސީން ތަރައްޤީކުރަމުންދާ 4000 ފްލެޓުގެ މަސައްކަތް އަވަހަށް ނިންމުމަށް ތާވަލް މުރާޖަޢާކުރަމުން އަންނަކަމަށް އެފްޑީސީން ވިދާޅުވެއެވެ.