ސައިބަރ ކުށާއި ޑިޖިޓަލް އަދި ފޮރެންސިކް ފަދަ ދާއިރާތައް މަތީ ތަޢުލީމުގެ މަންހަޖުގައި ހިމަނަނީ

ސައިބަރ ކުށްތަކާއި، ޑިޖިޓަލް އަދި ފޮރެންސިކްގެ ދާއިރާ މަތީ ތަޢުލީމުގެ މަންހަޖުގައި ހިމެނުމަށް މަސައްކަތްކުރަމުންދާކަމަށް މަތީ ތަޢުލީމާއި މަސައްކަތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.

ވަޒީރު ވިދާޅުވީ ބައިނަލްއަޤުވާމީ ޔުނިވަރސިޓިތަކާއި ގުޅިގެން އެ ދާއިރާއިން އިތުރު ފުރުޞަތުތަކެއް ހޯދައިދިނުމަށްވެސް މަސައްކަތް ކުރުމަށް ނިންމަވާފައިވާކަމަށެވެ.

ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ 2024 ވަނަ އަހަރުގެ ދަސްވެނިވުން ޝަރަފުވެރިކޮށްދެއްވާ ވާހަކަފުޅުދައްކަވަމުން މަތީ ތަޢުލީމާއި މަސައްކަތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. މަރްޔަމް މާރިޔާ ވިދާޅުވީ ފުލުހުންނަކީ ހަމައެކަނި ޤާނޫނު ތަންފީޒުކުރުމަށް ތިބި ބައެއް ނޫންކަމަށާއި، ޤާބިލު، ޤާނޫނަށް ތަބާވާ އަޚްލާޤު ރަނގަޅު ނަމޫނާ ބަޔަކަށް ފުލުހުން ވާންޖެހޭކަމަށެވެ. އެކަން ކަށަވަރުކުރުމަށް މަތީ ތަޢުލީމާއި ތަމްރީނުގެ މުހިއްމުކަން ވަޒީރުވަނީ ފާހަގަކުރައްވާފައެވެ.

އެހެންކަމުން ރާއްޖޭގައި މިވަގުތު ތަންފީޒުކުރަމުންދާ މަތީ ތަޢުލީމުގެ މަންހަޖުގެ ތެރެއަށް ބޭނުންވާ ސައިބަރ ކުށްތަކާއި، ޑިޖިޓަލް އަދި ފޮރެންސިކްސްގެ ދާއިރާ ފަދަ ދާއިރާތައް ހިމެނުމުގެ މަސައްކަތް މަތީ ތަޢުލީމާއި ބެހޭ ވުޒާރާގެ ފަރާތުން ކުރައްވަމުންގެންދަވާކަމަށް ވަޒީރުވަނީ ވިދާޅުވެފައެވެ.

"މިތަމްރީންތަކަކީ ޒަމާނީ ކުށްތަކާއި، ގޮންޖެހުންތަކަށް ޙައްލު ހޯދުމަށް ބޭނުންވާ ޢިލްމާއި ހުނަރު އޮފިސަރުންނަށް ލިބޭނެ ތަމްރީނުތަކެއް. އަދި މިތަމްރީނުތައް ވެގެންދާނީ، މަތީ ތަޢުލީމުގެ ޤާނޫނު ތަންފީޒުކުރުމުގެ ދާއިރާގައި އެންމެ ޒަމާނީ އުކުޅުތަކާއި ޒަމާނީ ވަޞީލަތްތައް ބޭނުންކުރުމަށް މަގުފަހިކޮށްދޭ ވަޞީލަތަކަށް." ވަޒީރު ވިދާޅުވިއެވެ.

މަތީ ތަޢުލީމާއި ބެހޭ ވަޒީރު ޑރ.މަރްޔަމް މާރިޔާ ވިދާޅުވީ، ރައީސުލްޖުމްހޫރިއްޔާ ޢިއުލާންކުރައްވާފައިވާ ޤައުމީ ޚިދުމަތުގެ ޕްރޮގްރާމާއެކު އަޚްލާޤު ލިބިގެންވާ ޚިދުމަތްތެރި ފުލުހުންގެ ޖީލެއް އުފެއްދުމަށް މަގުފަހިވެގެންދާނެކަމަށެވެ. އަދި އެއީ ރާއްޖޭގެ ފުލުހުންގެ ޚިދުމަތް އިތުރަށް ހަރުދަނާވާނެކަމެއްކަން ވަޒީރު ފާހަގަކުރެއްވިއެވެ. މީގެއިތުރުން ހުރިހާ ފުލުހުންނަށްވެސް ހަމަހަމަކަމާއެކު މަތީ ތަޢުލީމުގެ ފުރުސަތު ފަހިކުރުމަށް ކުރަމުންދާ މަސައްކަތުގެ ތެރެއިން އަންހެން އޮފިސަތުންނަށާއި އަތޮޅު ތެރޭގެ ރަށްރަށުގައި ތިބި އޮފިސަރުންނަށްވެސް މަތީ ތަޢުލީމު ފުރުސަތު ފަހިކުރުމަށް މަސައްކަތް ކުރަމުންދާކަން ވަޒީރު ފާހަގަކުރެއްވިއެވެ.

މިރަސްމިއްޔާތުގައި ވާހަކަދައްކަވަމުން ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވީ، ދިވެހި ފުލުހުންގެ ޚިދުމަތުގައި ގިނަ ދާއިރާތަކަކުން ކުރިއަށް ދިޔުމުގެ ފުރުޞަތު އެބައޮތްކަމަށެވެ. އަދި މިހާރުވެސް ގުރޭޑު 10 ނިންމާ ފުލުހުންގެ ޚިދުމަތާއި ގުޅުމަށްފަހު މަސްޓަރސް ޑިގްރީއާއި ހަމައަށް ތަޢުލީމު ޙާސިލުކޮށްފައިވާ އެތައް އޮފިސަރުންނެއް ތިބިކަން ސީޕީވަނީ ފާހަގަކުރައްވާފައެވެ.

"ދިވެހި ޒުވާނުންނަށް ދަންނަވާލަންއޮތީ، ކޮލެޖް އޮފް ޕޮލިސިންގެ ކުރިއަށް އޮތް އިންޓޭކަށް ހުޅުވާލުމުން އެފުރުސަތުގެ ބޭނުން ހިފާށޭ. ފުލުހުންގެ ޚިދުމަތުގެ ތެރެއިން ތިޔަ ޒުވާނުން ކުރިއަށް ބޭނުންވާ ދާއިރާއަކުން މަތީ ތަޢުލީމު ހޯދުމުގެ ފުރުސަތު ހޯދާށޭ. ފޮރެންސިކް އެކްސްޕާޓަކަށް ނުވަތަ ކުޅަދާނަ އިންވެސްޓިގޭޝަން އޮފިސަރަކަށްވާން ބޭނުންވާ ކުދިންނަށް އެފުރުސަތު ލިބިގެންދާނެ" ސީޕީ ވިދާޅުވިއެވެ.

ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ 2024ވަނަ އަހަރުގެ ދަސްވެނިވުމުގެ ރަސްމިއްޔާތުގައި 297 ދަރިވަރުންވަނީ ދަސްވެނިވެފައެވެ. މީގެ ތެރޭގައި ޑިޕްލޮމާއިން ފެށިގެން މާސްޓަރސް ލެވެލްގެ 5 ކޯހެއްގައި ދަސްވެނިވީ ދަރިވަރުންނަށްވަނީ ސެޓުފިކެޓާއި ހަނދާނީ ލިޔުން ޙަވާލުކުރައްވާފައެވެ.

އެގޮތުން ޑިޕްލޮމާ އިން ފޮރެންސިކް އިންވެސްޓިގޭޝަން، ޑިޕްލޮމާ އިން ސެކިއުރިޓީ އެންޑް ރިސްކް މެނޭޖްމަންޓް، ޑިޕްލޮމާ އިން ކްރިމިނަލް އިންވެސްޓިގޭޝަން ބެޗް 2، 3، 4، 5 އަދި ޑިޕްލޮމަރ އިން ކްރިމިނަލް އިންވެސްޓިގޭޝަން ބެޗް 6، 7، 8، 9 އަދި 10ގެ އިތުރުން މާސްޓަރސް އިން ލީޑާރޝިޕް އެންޑް މެނޭޖްމަންޓް، ޕޮލިސިން އެންޑް ސެކިއުރިޓީ ކޯހުގެ ބައިވެރިވި ދަރިވަރުންވަނީ ދަސްވެނިވެފައެވެ. މީގެތެރެއިން ކޮންމެ ކޯހަކުން އެއްވަނަ ޙާސިލުކޮށްފައިވާ ދަރިވަރުން ހޯދި ކާމިޔާބީވެސްވަނީ ފާހަގަކޮށް އިނާމު ދެއްވާފައެވެ.