މިސްކިތްތަކަށް ގެއްލުން ދޭ މައްސަލަ ބަލައެއް ނުގަންނަން، ފިޔަވަޅު އަޅާނަން: ވަޒީރު ޑރ.ޝަހީމް
-
ފުރުޤާން މިސްކިތަށް މީހަކު ވަދެ ބޮޑެތި ގެއްލުންތައް ވަނީ ދީފައި
-
އެމީހާ ފުލުހުންވަނީ ހައްޔަރުކޮށްފައި
މިސްކިތްތަކަށް ގެއްލުން ދޭ މައްސަލަ ބަލައި ނުގަންނަކަމަށާއި، ރޭ ފުރުޤާން މިސްކިތަށް ގެއްލުންދިން މައްސަލަ ކަމާބެހޭ ފަރާތްތަކަށް ހުށައަޅާ ބަލާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ވަޒީރު މިހެން ވިދާޅުވީ ރޭ ފަތިހު، ފުރުޤާން މިސްކިތަށް މީހަކު ވަދެ، މިސްކިތުގައި ހުރި މުސްޙަފްތަކާއި މިސްކިތުގައި ހުރި އެކި ވަސީލަތްތަކަށް ގެއްލުންދިން މައްސަލައާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.
މި މައްސަލައިގައި ހިމެނޭ މީހާ މިހާރު ވަނީ ފުލުހުންގެ ބެލުމުގެދަށަށް ގެންގޮސްފައެވެ. ފުލުހުން ވިދާޅުވީ މައްސަލައިގައި ހައްޔަރު ކުރި މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ތަޙުޤީގު މަރުހަލާ ނިމެންދެން ބަންދުކުރުމަށް އަމުރުކޮށްފައިވާކަމަށެވެ.
Furuqan miskithah gellundhin massala balai fiyavalhu elhumah kamaa behey faraaithakah husha alhan Islamic Ministry in vanee miadhu nimmaafa. Miskiy thakah gellun dhinun bala eh nuganeveyne. https://t.co/umpSXl3cIJ
— Mohamed Shaheem Ali Saeed (@Mohamedshaheem1) November 24, 2024
ރޭ ދަންވަރު މީހަކު ފުރުޤާން މިސްކިތަށް ވަދެ، މިސްކިތުގައި ހުރި މުސްޙަފްތަކަށް އިހާނެތިކޮށް ހިތާ އުކާލުމާއި އަދި މިސްކިތުގައި ހުރި ކަރަންޓު ސޮކެޓުތަކާއި ބައެއް އިތުރު ސާމާނަށް ވަނީ ބޮޑެތި ގެއްލުންދީފައިވާ މަންޒަރު ފެންނަ ފޮޓޯތަކެއް ސޯޝަލް މީޑިއާގައި އަންނަނީ ދައުރުވަމުންނެވެ.
އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް އަލީ ސަޢީދު ވިދާޅުވީ ފުރުޤާން މިސްކިތަށް ގެއްލުންދިން މައްސަލަ ބަލައި ފިޔަވަޅު އެޅުމަށް ކަމާ ބެހޭ ފަރާތްތަކަށް ހުށައަޅަން އިސްލާމީ ކަންތައްތަކާ ބެހޭ ވުޒާރާއިން މިއަދު ނިންމާފައިވާކަމަށެވެ. ވަޒީރު ވިދާޅުވީ މިސްކިތްތަކަށް ގެއްލުން ދިނުން ބަލައި ނުގަނެވޭނެކަމަށެވެ.