"ފަލަސްޠީނުގެ ވާހަކަތައް ކިޔައިދީ، އެބިމާއި އަޤްޞާ މިސްކިތާމެދު ލޯބި ޖެއްސުން މުހިންމު"

ފަލަސްޠީނުގެ މުސްލިމުންނާ ދެކޮޅަށް އިސްރާޢީލުގެ ޔަހޫދީން ހިންގަމުންދާ ޤަތުލުޢާންމުގެ ވާހަކަތައް އަދުގެ ދަރިވަރުންނަށް ކިޔައިދީ ފަލަސްޠީނާމެދު ލޯބި އުފެއްދުމަކީ މުހިންމުކަމެއްކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ ދިވެހިރާއްޖޭގެ ޤައުމީ ޔުނިވަރސިޓީއާއި ދިވެހިރާއްޖޭގެ އިސްލާމީ ޔުނިވަރސިޓީގެ ސްޓޫޑަންޓް ޔޫނިއަންގެ ދަރިވަރުން އިންތިޒާމްކޮށްގެން ބޭއްވި ފަލަސްޠީން ފޯރަމާ ގުޅިގެން ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައެވެ.

އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ޞަޢީދު ވިދާޅުވީ ފަލަޞްޠީނުގެ މުސްލިމުންގެ ޙައްޤުގައި ކުރަންޖެހޭ އެންމެ މުހިންމުކަމަކީ އެޤައުމަށް ދިމާވެފައިވާ ނިކަމެތިކަމަކީ ކޮންމެ މުސްލިމަކުވެސް އެކަމާ ހިތާމަކޮށް ކަންބޮޑުވާންޖެހޭ، އަދި މުސްލިމް އުންމަތަށް ދިމާވެފައިވާ މުހިންމު މައްސަލައެއްކަން އަދުގެ ދަރިވަރުންނަށް ކިޔައިދިނުން ކަމަށެވެ. އަދި މި މައްސަލަ ޢިލްމީ ހަމަތަކުން ކިޔައިދީ، ހޭލުންތެރިކަން އުފެއްދުން މުހިންމުކަމަށްވެސް ވަޒީރު ވިދާޅުވިއެވެ. އަދި ފަލަސްޠީންގެ ބިމާއި އެބިމުގައިވާ މުސްލިމުންގެ މުޤައްދަސް މިސްކިތްކަމުގައިވާ އަލްމަސްޖިދުލް އަޤްޞާއާމެދު ދަރިވަރުންގެ ހިތްތަކުގައި ލޯބި ޖެއްސުމަކީވެސް މުހިންމުކަމެއްކަން ވަޒީރު ފާހަގަކުރެއްވިއެވެ.

ވަޒީރު ވަނީ ފަލަސްޠީނަށް ދިމާވެފައިވާ ޙަލަތާމެދު ހޭލުންތެރިކުރުމަށް ރާއްޖޭގެ މައި ދެ ޔުނިވަރސިޓީގެ ސްޓޫޑެންޓް ޔޫނިއަނުން އިންތިޒާމްކޮށްގެން ފޯރަމެއް ބޭއްވުމުން އެ ދެ ޖަމިއްޔާއަށް ޝުކުރުއަދާކޮށްފައެވެ. އަދި މި ފޯރަމަކީ މަތީ ތަޢުލީމު ޙާސިލްކުރާ ދަރިވަރުންތަކެއް އިސްނަގައިގެން ރާއްޖޭގައި ބޭއްވި މިފަދަ ފުރަތަމަ ފޯރަމްކަން ވަޒީރު ފާހަގަކުރެއްވިއެވެ.

ފަލަސްޠީނަށް ދިމާވެފައިވާ ޙަލާތާ ގުޅޭގޮތުން ބޭއްވި ފޯރަމްގައި އެކަމާގުޅޭ މުހިންމު މަޢުލޫމާތުތަކެއް ވަނީ ޙިއްސާކޮށްފައެެވެ. އެގޮތުން ފަލަސްޠީނަށް ޔަހޫދީން ދެމުންގެންދާ ލާއިންސާނީ ޢުދުވާނީ ޙަމަލާތައް ފެށުނު ގޮތާބެހޭ ވީޑިއޯ ޕްރެޒެންޓޭޝަނެއް ވަނީ ދައްކާފައެވެ. އަދި މިކަމާ ގުޅޭގޮތުން ސްޓޫޑެންޓް ޔޫނިއަންތަކުގެ ދަރިވަރުންވެސް މަޢުލޫމާތު ހިއްސާކޮށް، ވާހަކަދައްކާފައިވެއެވެ.

މީގެ އިތުރުން މި ފޯރަމްގައި ޚާއްސަ ޕެނަލް ޑިސްކަޝަނެއްވެސް ވަނީ ކުރިއަށްގެންގޮސްފައެވެ. މި ޕެނަލް ޑިސްކަޝަންގައި މަޢުލޫމާތު ދެއްވާފައިވަނީ އައްޝެއިޚް ޑރ. ޢަބްދުއްސައްތާރު ޢަބްދުއްރަޙްމާނާއި އެމްއެންޔޫގެ ސީނިއަރ ލެކްޗަރަރ މުޙައްމަދު ދީދީއާއި އައިޔޫއެމްގެ ލެކްޗަރަރ ޑރ. ޢަލީ ރިޒާ އަޙްމަދެވެ.

ޕެނަލިސްޓުން ވަނީ ފަލަސްޠީނަށް ދިމާވެފައިވާ ޙާލަތާބެހޭ މުހިންމު މަޢުޟޫތަކަށް އަލިއަޅުވާލައި ވާހަކަފުޅުދައްކަވާފައެވެ.

ފަލަސްޠީންގެ މުސްލިމުންނާ ދެކޮޅަށް ޔަހޫދީން ޢުދުވާނީ ޙަމަލާތަކެއް މިފަހަކުން ދޭން ފަށާފައިވަނީ މިދިޔަ އަހަރުގެ އޮކްޓޫބަރުމަހުގެ 7 ވަނަ ދުވަހުއެވެ. ޙަމަލާތައް ދޭން ފަށާފައިވާތާ އަހަރަކަށްވުރެ ގިނަ ދުވަސްވެފާވާއިރު، 44،000 އެއްހާ މީހުން ވަނީ ޝަހީދުކޮށްލާފައެވެ.