ވިނަރެސް ފުލެޓު ލިބުނު މީހުންނަށް ކާރު ޕާކުކުރާނެ ޖާގަ ގަތުމަށާއި ކުއްޔަށް ހިފުމަށް ހުޅުވާލައިފި

ވިނަރެސް ފްލެޓު ލިބުނު މީހުންނަށް ކާރު ޕާކުކުރާނެ ޖާގަ ގަތުމަށާއި ކުއްޔަށް ހިފުމުގެ ފުރުޞަތު ހައުސިން ޑިވެލޮޕްމެންޓް ކޯޕަރޭޝަން، އެޗްޑީސީން ހުޅުވާލައިފިއެވެ.

އެޗްޑީސީން ނެރުނު ބަޔާނެއްގައިވަނީ ފުލެޓުތަކުގެ އެތެރެއިންނާއި ބޭރުން ކާރު ޕާކުކުރާނެ ޖާގަ ހޯދަން ހުޅުވާލާފައިވާ ކަމަށެވެ. ފުލެޓުތަކުގެ އެތެރޭން 76 ޖާގަ އަދި ފުލެޓުތަކުގެ ބޭރުން 78 ޖާގަ ދޫކުރުމަށް ހަމަޖެހިފައިވާކަމަށް އެޗްޑީސީން ވިދާޅުވެއެވެ.

އެޗްޑީސީން ވިދާޅުވީ ޕާކިން ޖާގަދޫކުރަން ހަމަޖެހިފައިވަނީ ދެގޮތަކަށް ކަމަށެވެ. އެގޮތުން ފުލެޓުތަކުގެ އެތެރޭން ދޫކުރާ ޖާގަތަކަކީ ވިއްކާ ޖާގަތަކެއް ކަމަށާއި ފުލެޓުތަކުގެ ބޭރުން ދޫކުރަނީ މަހު ކުއްޔަށް ކަމަށެވެ. ގަތުމަށް ދޫކުރާ ޖާގަތަކުގެ ބީލަން ފަށާނީ 650،000 ރުފިޔާއިން ކަމަށާއި ގަންނަ ޖާގަތަކަށް ކާރު ރަޖިސްޓްރީކުރުމުގެ ހުއްދަ ދޭނެކަމަށް އެޗްޑީސީން ވިދާޅުވިއެވެ. އަދި ކުއްޔަށް ދޫކުރާ ޖާގަތަކުގެ ބީލަން ފަށާނީ މަހަކު 2،000 ރުފިޔާއިން ކަމަށާއި ކުއްޔަށް ދޫކުރެވޭނީ 5 އަހަރު ދުވަހުގެ މުއްދަތަކަށްކަމަށް އެޗްޑީސީން ވިދާޅުވިއެވެ. މިތަންތަނަށް ކާރު ރަޖިސްޓްރީކުރުމުގެ ހުއްދައެއް ނުދޭނެއެވެ.

ޕާކިން ޖާގަ ދޫކުރުމަށް ހަމަޖެހިފައިވަނީ ބީލަމުގެ އުޞޫލުންނެވެ. އަދި ބީލަމަށް ޕްރޮޕޯސަލް ހުށައަޅާ މީހުން ވާންވާނީ ވިނަރެސް ފުލެޓު ގަތުމުގެ އެއްބަސްވުމުގައި ސޮއިކޮށްފައިވާ މީހަކަށްކަމަށް އެޗްޑީސީން ވިދާޅުވިއެވެ. އަދި އެމީހަކު ވާންވާނީ އަންނަ މަހުގެ 5ގެ ނިޔަލަށް އެޗްޑީސީއަށް ދައްކަންޖެހޭ ފައިސާއެއް ދައްކާ ޚަލާސްކޮށްފައިވާ މީހަކަށްކަމަށްވެސް އެ ކޯޕަރޭޝަނުން ވިދާޅުވިއެވެ.

އެޗްޑީސީން ވިދާޅުވީ ކޮންމެ މީހަކަށްވެސް ދޫކުރާނީ އެއް ޖާގަ ކަމަށެވެ. އެޗްޑީސީން ވަނީ ކާރު ޕާކުކުރާނެ ޖާގަ ކުއްޔަށް ހިފުމަށް ނުވަތަ ގަތުމަށް އެދި ހުށައެޅުމުގެ ފުރުޞަތު އަންނަ މަހުގެ 5 ވަނަ ދުވަހާ ހަމައަށް ހުޅުވާލާފައެވެ. ކާރު ޕާކުކުރާނެ ޖާގަ ކުއްޔަށް ހިފުމަށް ނުވަތަ ގަތުމަށް ހުށަހެޅޭނީ އެޗްޑީސީގެ ބިޑްސް ޕޯޓަލް މެދުވެރިކޮށެވެ.