އަންނަ އަހަރުގެ ވޯލްޑް ޓްރެވެލް އެވޯޑްސްގައި މަދުވެގެން 15 އެވޯޑް ހޯދުމަކީ އަމާޒެއް: ވަޒީރު ފައިޞަލް

އުންމީދަކީ އަންނަ އަހަރު ވޯލްޑް ޓްރެވެލް އެވޯޑްސްގައި މަދުވެގެން 15 އެވޯޑް ރާއްޖޭން ހޯދުންކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ. ވަޒީރު މިހެން ވިދާޅުވީ، މިއަހަރު ވޯލްޑް ޓްރެވެލް އެވޯޑްސްގައި ރާއްޖެއަށް ލިބުނު ކާމިޔާބީ ފާހަގަކުރުމަށް ވެލާނާ އިންޓަރނޭޝަނަލް އެއަރޕޯޓް، ވީއައިއޭގައި ބޭއްވި ހަފްލާއެއްގައެވެ.

ވޯލްޑް ޓްރެވެލް އެވޯޑްސްގެ 9 ކެޓަގަރީއަކުން މިއަހަރު ރާއްޖެ ވަނީ އެވޯޑް ހާސިލްކޮށްފައެވެ. އޭގެތެރެއިން އެންމެ ފާހަގަކޮށްލެވެނީ ވޯލްޑްސް ލީޑިންގ ޑެސްޓިނޭޝަންގެ އެވޯޑާއި ވޯލްޑްސް ލީޑިންގ ގްރީން ޑެސްޓިނޭޝަންގެ އެވޯޑެވެ. މިއީ ވޯލްޑްސް ލީޑިންގ ޑެސްޓިނޭޝަންގެ އެވޯޑް ރާއްޖެއަށް ލިބުނު 5 ވަނަ އަހަރެވެ. އަދި ލީޑިންގ ގްރީން ޑެސްޓިނޭޝަންގެ އެވޯޑް ލިބުނު ފުރަތަމަ ފަހަރެވެ.

މިކަން ފާހަގަކުރުމަށް ބޭއްވި ހަފްލާގައި ވާހަކަފުޅުދައްކަވަމުން ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވީ، އުންމީދަކީ އަންނަ އަހަރު 15 ނުވަތަ 20 އެވޯޑް ހާސިލްކުރުންކަމަށެވެ. މިއީ މުޅި ސިނާއަތުގެ އެންމެންގެ ބުރަ މަސައްކަތުން ހޯދުނު އެވޯޑެއްކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، މޯލްޑިވިއަންއަކީ ފަތުރުވެރިކަމުގެ މުހިންމު ބައިވެރިއެއްކަމަށެވެ. ކުރިއަށްއޮތް ތަނުގައި ދެކެން ބޭނުންވަނީ "ވިޒިޓް މޯލްޑިވްސް" ޖަހައިގެން މޯލްޑިވިއަނުން ރާއްޖެއަށް އެންމެ ގިނައިން ފަތުރުވެރިން އަންނަ މަންޒިލްތަކަށް ދަތުރުކުރާ ތަން ފެނުންކަމަށެވެ.

"ކެޓަގަރީތަކުގައި ވާދަކޮށްގެން އިތުރަށް މަސައްކަތްކޮށްގެން ހޯދޭނެ އެވޯޑްތަކެއް އެބަހުރި. މިއަންނަ އަހަރު އަޅުގަނޑުމެން ޓާގެޓްކުރަނީ 15 ނުވަތަ 20 އަކަށް އެވޯޑް ހޯދުމަށް މަސައްކަތް ކުރުން އެމްއެމްޕީއާރުސީއާއި އަދި އިންޑަސްޓްރީއާއި އެކީގައި". ވަޒީރު ފައިސަލް ވިދާޅުވިއެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީގެ މެނޭޖިން ޑިރެކްޓަރ އިބްރާހިމް ޝިއުރީ ވިދާޅުވީ، އަންނަ އަހަރަށްވެސް އެމްއެމްޕީއާރުސީން މާކެޓިންގެ ގިނަ ހަރަކާތްތަކެއް ރާވާފައިވާކަމަށެވެ. އަދި މާކެޓިންގ ހަރަކާތްތައް ތަފާތުކުރުމަށް މަސައްކަތްކުރަމުންދާކަން އޭނާ ފާހަގަކުރެއްވިއެވެ.

"ކުރިއަށް އޮތް ތަނުގައި އަޅުގަނޑުމެން ރާވާފައިވާ ހަރަކާތްތަކަކީ މިއަހަރުގެ ހަރަކާތްތަކާ ކުޑަކޮށް ތަފާތު ހަރަކާތްތަކެއް. އަޅުގަނޑުމެން އައު މާކެޓްތަކެއްގެ ވާހަކަ އެބަ ދައްކަން. ޑައިވަސިފައިކުރާ ވާހަކަ އެބަ ދައްކަން. އިތުރު މާކެޓްތަކުގެ ގޮތުގައި ސްޕޯރޓްސް ޓޫރިޒަމް، ހެލްތު ޓޫރިޒަމް، ފިލްމް ޓޫރިޒަމް، އެޑިއުކޭޝަން ޓޫރިޒަމް މިހިރަ އޭރިއާތަކަކީ އެކްސްޕްލޯރ ކުރާނެ އޭރިއާތަކެއް". ޝިއުރީ ވިދާޅުވިއެވެ.

މި ރަސްމިއްޔާތުގައި ވަނީ ވީއައިއޭގައި ބަހައްޓާފައިވާ ވޯލްޑްސް ލީޑިންގ ޑެސްޓިނޭޝަން މޮނިއުމަންޓަށް 2024 އިތުރުކުރުމަށްފަހު އެމޮނިއުމެންޓް އަލުން ހުޅުވާފައެވެ.