އިޓާލިއަން ލީގުގައި އިންޓަރ މިލާނާ ދެކޮޅަށް ރޭ ފިއޮރެންޓީނާ ކުޅުނު މެޗުގައި އެ ޓީމުގެ މިޑްފީލްޑަރު އެޑުއާޑޯ ބޯވޭ ދަނޑު މައްޗަށް ވެއްޓި، އައިސީޔޫގައި ފަރުވާ ދޭން ފަށައިފިއެވެ.
އުމުރުން 22 އަހަރުގެ ބޯވޭ މެޗުގެ 16 ވަނަ މިނިޓުގައި ދަނޑު މައްޗަށް ވެއްޓުމާއިއެކު މެޗުގެ ރެފްރީ ވަނީ މެޗުގެ ކުޅުން ހުއްޓާލާފަ އެވެ. އަދި ފަހުން ރެފްރީ ވަނީ މެޗުގެ ބާކީ ވަގުތުގެ ކުޅުން ކުރިއަށް ނުގެންގޮސް މެޗު ހުއްޓާލާފަ އެވެ.
ފިއޮރެންޓީނާއިން ނެރެފައިވާ ބަޔާނެއްގައި ބުނެފައިވަނީ ބޯވޭއަށް އައިސީޔޫގައި ފަރުވާ ދެމުންދާ ކަމަށާއި އަދި މިއަދު އޭނާގެ އިތުރު ޓެސްޓްތަކެއް ހެދުމަށް ހަމަޖެހިފައިވާ ކަމަށެވެ.
މިދިޔަ އޮގަސްޓް މަހު ބޯވޭ ލޯނެއްގެ ދަށުން ފިއޮރެންޓީނާ އާއި ގުޅިފައިވަނީ ރޯމާ އިންނެވެ. އިޓަލީގެ ޖޫނިއަރ ގައުމީ ޓީމަށް ކުޅެފައިވާ ބޯވޭ އަދި މިހާތަނަށް ސީނިއާ ޓީމަށް ކުޅެފައެއް ނުވެއެވެ.
ބޯވޭ ދަނޑު މައްޗަށް ވެއްޓުމާއި ގުޅިގެން އިޓަލީގެ ކްލަބްތަކުގެ އިތުރުން އެ ޓީމުތަކަށް ކުޅޭ ގިނަ ކުޅުންތެރިންތަކެއް ވަނީ އޭނާއަށް އަވަސް ޝިފާއަކަށް އެދިފަ އެވެ.
އިންޓަރ މިލާނުގެ ރައީސް ގިއުސެއްޕެ މޮރާޓާ ބުނެފައިވަނީ އިންޓަރ މިލާނުގެ އިތުރުން މުޅި ފުޓްބޯޅަ އާއިލާއިންވެސް ބޯވޭއަށް އަވަސް ޝިފާއަކަށް އެދޭ ކަމަށެވެ. އަދި އޭނާ ކުޅެމުންދާ ފިއޮރެންޓީނާގެ ރައީސް ރޯކޯ ކޮމީސޯ ވެސް ވަނީ ބޯވޭއަށް އަވަސް ޝިފާއަކަށް އެދިފަ އެވެ.