ދުންފަތާ ދެކޮޅު ފިޔަވަޅުތައް، ޖީލުތަކަކަށް އޭގެ ފައިދާ ދެމިގެންދާނޭ މުހިންމު ނިންމުންތަކެއް

ދުންފަތް ކޮންޓްރޯލް ކުރުމަށް ސަރުކާރުން ދަނީ ގިނަ ފިޔަވަޅުތަކެއް އެޅުއްވަމުންނެވެ. އެގޮތުން ބޮޑެތި މީހުންނާއި ކުޑަކުދިން އާދަޔާޚިލާފަށް ދެވިހިފައިފައިވާ ވޭޕް ނުވަތަ އީ-ސިނގިރޭޓު ނޮވެމްބަރު މަހުގެ 15 ވަނަ ދުވަހުން ފެށިގެން އެތެރެކުރުން ވަނީ މަނާކޮށްފައެވެ. އަދި މި މަހުގެ 15 ވަނަ ދުވަހުން ފެށިގެން އެތަކެތި ބޭނުންކުރުންވެސް ވަނީ މަނާކޮށްފައެވެ.

މީގެ އިތުރުން ދުންފަތުގެ އިސްތިޢުމާލު ކުރުމުން ދުރުހެލިވުމަށް ބާރު އެޅުމުގެ ގޮތުން ސިނގިރޭޓާ ބިޑިން ނަގާ އިމްޕޯޓް ޑިއުޓީ ބޮޑުކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަނީ ނިންމަވާފައެވެ. މި ނިންމެވުމަށް އަމަލު ކުރަން ފެށީ ނޮވެމްބަރު މަހުން ފެށިގެންނެވެ. މިއީ އާންމު ރައްޔިތުންގެ ސިއްހީ ރައްކާތެރިކަމަށްޓަކައި ނިންމެވި ނިންމެވުމެކެވެ. އަދި ދުންފަތާއި އާންމުން ދުރުކޮށް، މި ވަބާއިން މި ޤައުމު ސަލާމަތްކުރުމުގެ ނިންމެވުމެކެވެ.

މި ފިޔަވަޅުތައް އެޅި ނަމަވެސް އާންމު ފަރުދުންނާއި ޖަމުޢިއްޔާ ޖަމާއަތްތަކާއި މީޑިއާގެ އެއްބާރުލުން ބޭނުންވެއެވެ. މިކަމަކީ ފަރުދުންގެ ސިއްހީ ދުޅަހެޔޮކަމާއި ގުޅިފައިވާކަމަކަށްވާއިރު މިކަން ހައްލު ކުރުމަށް އެންމެން ގުޅިގެން މަސައްކަތް ކުރަންޖެހެއެވެ.

ސިނގިރޭޓާއި ބިޑިން ނަގާ އިމްޕޯޓް ޑިއުޓީ ބޮޑުކުރުމުން، ސިނގިރޭޓު ވިއްކާ ތަންތަނުން، އޭގެ އަގު ވަނީ ބޮޑުކޮށްފައެވެ. ބައެއް މީހުން ސިނގިރޭޓުގެ އަގު ބޮޑުކުރިޔަސް އެ ގަނެގެން ބުއިނަމަވެސް، ބައެއްމީހުން އޭގެ ބަދަލުގައި މި ބަލަނީ ކޮންމެވެސް "އަގު ހެޔޮ" ގޮތަކަށް ދުންފަތުގެ އިސްތިއުމާލު ކުރެވޭތޯއެވެ.

ދުންފަތް ކޮންޓްރޯލް ކުރުމަށް ސަރުކާރުން އެޅި ފިޔަވަޅުތަކާއި ގުޅިގެން ޓޭކްއަވޭ ތަނެއްގައި ދެމީހަކު ދެއްކި ވާހަކައެއް އަޑުއެހީމެވެ.

އެތަނުން އެކަކު އަނެއް މީހާއާ ދިމާއަށް ބުންޏެވެ. އޭނާ އަދިވެސް ބޮނީ ބޮޑު އަގުގައި ސިނގިރޭޓު ގަނެގެން ކަމަށެވެ. އަދި ފައިސާ އިސްރާފުނުކޮށް "އަގު ހެޔޮކޮށް ދުންފަތުގެ އިސްތިއުމާލު ކުރުމަށް އިރުޝާދު ދިނެވެ. އެއީ އާއިލާއަށްޓަކައި ޚަރަދުކުރުމުގައި ވިސްނަންޖެހޭ ކަމެއްކަމަށްވެސް ބުންޏެވެ.

ރަނގަޅު ވާހަކައެކެވެ. އަނބިދަރިންނާއި މެދު ވިސްނަންޖެހޭނެއެވެ. އެހެންނަމަވެސް ދުންފަތުގެ އިސްތިއުމާލުކުރުން ހުއްޓާލުމުގައި ބަލަންވީ މާލީގޮތުން ލިބޭ ފައިދާއަށް އެކަންޏެއް ނޫނެވެ. ދުންފަތުގެ އިސްތިއުމާލު ކުރުމުން ތިމާއާއި ތިމާގެ އަނބިދަރިންނަށް އަދި ތިމާގެ އާއިލާއާއި މުޖުތަމަޢުއަށްވެސް އެކަމުން ލިބިދާނެ ގެއްލުމަކާ މެދު ވިސްނަންޖެހެއެވެ. އެހެނީ ރާއްޖޭގައި ގައިންގަޔަށް ނާރާ ބަލިތަކުގެ އެންމެ ބޮޑު ހިއްސާއެއް އޮންނަ އެއްކަމަކީ ދުންފަތުގެ އިސްތިއުމާލުކުރުމެވެ.

ގައިންގަޔަށް ނާރާ ބަލިތައް ކަންބޮޑުވާ މިންވަރަކަށް އިތުރުވެފައިވާއިރު މިފަދަ ބަލިތަކުގައި މަރުވާ މީހުންގެ ނިސްބަތްވެސް އަންނަނީ އިތުރުވަމުންނެވެ. ދުންފަތުގެ އިސްތިއުމާލުކުރުމަކީ، ނުރައްކާތެރި ހިތުގެ ބަލިތަކާއި، ސްޓްރޯކާއި ކެންސަރުގެ އިތުރުން ނޭވާލާ ނިޒާމުގެ ބޮޑެތި ބަލިތައް ޖެހުމަށް މަގުފަހިވާ މައިގަނޑު އެއް ސަބަބުކަމަށް، ކަމާގުޅޭ މާހިރުން ވިދާޅުވެއެވެ. ދުންފަތުގެ އިސްތިއުމާލުކުރުން ހުއްޓާލަން ބޭނުންވާ މީހުންނަށް މިހާރުވެސް މާލޭގެ 4 ކްލިނިކް ވަނީ ޤާއިމުކޮށްފައެވެ. އަދި ދުންފަތުގެ އިސްތިއުމާލުކުރުން ހުއްޓާލަން ބޭނުންވާ މީހުންނަށް ސިއްޙީ ޚިދުމަތްދޭ ހުރިހާ ތަނަކުން އެހީތެރިކަން ފޯރުކޮށްދޭނެ އިންތިޒާމް ހަމަޖެއްސުމުގެ މަސައްކަތް ސަރުކާރުން ވަނީ ފަށްޓަވާފައެވެ.

ދުންފަތް ކޮންޓްރޯލް ކުރުމަށް ސަރުކާރުން ވަނީ ގިނަ ފިޔަވަޅުތަކެއް އަޅަން ފަށްޓަވާފައެވެ. ދުންފަތާ ދުރު މުޖުތަމަޢުއެއް ބިނާކުރުމަށްޓަކައި އިޖުތިމާޢީ ގޮތުން ހަރަކާތްތެރިވާ ފަރާތްތަކާއި، ދުންފަތުގެ އިސްތިޢުމާލުނުކުރާ ރަށްރަށް ފާހަގަކުރުމަށް އިނާމެއް ތަޢާރުފުކުރުމާއި، އެ އިނާމު ލިބޭ ރަށެއްގެ އިޖްތިމާޢީ ކަންކަމަށް މާލީ އެހީތެރިކަން ދިނުން ފަދަ ކަންކަން ކުރުމަށްވެސް ސަރުކާރުން ވަނީ ނިންމަވާފައެވެ.

ދުންފަތާ ދެކޮޅަށް އާންމުން ހޭލުންތެރިކަން އިތުރުކޮށް، ދުންފަތް ކޮންޓްރޯލް ކުރުމަށް ޤާއިމުކޮށްފައިވާ ކްލިނިކްތައް މެދުވެރިކޮށް ދުންފަތް ހުއްޓާލުމަށް އާންމުންނަށް އިތުރަށް ބާރު އަޅަންޖެހެއެވެ. ތިމާއާއި، ތިމާގެ ޤައުމާއި، ތިމާގެ ޢާއިލާއާއި، ލޯބިވާ މީހުންނަށްޓަކައިނަމަވެސް، ދުންފަތުގެ އިސްއުމާލު ކުރާ މީހުން ދުންފަތާއި ދުރުހެލިވާން އެބަޖެހެއެވެ.

ކޮންމެއަކަސް ދުންފަތާ ދެކޮޅަށް ސަރުކާރުން ނިންމަވާ ނިންމުންތަކަކީ ވަރަށް ހިތްވަރު ގަދަ ނިންމުންތަކެއްކަމަށް އެތައް ބަޔަކު ދަނީ ސިފަކުރަމުންނެވެ. މިއީ، ކުޑަކުދިންނާއި ޒުވާނުން ނިކޮޓިންގެ ވަބާއިން ސަލާމަތްކުރުމަށް އެޅި އެންމެ މުހިންމު ފިޔަވަޅުވެސްމެއެވެ. ވޭޕާއި އީސިނގިރެޓް މަނާކޮށް ދުންފަތުގެ ބާވަތްތަކުން ނަގާ ޓެކްސް ބޮޑުކުރުމަކީ ސިއްހީ ޚިދުމަތުގެ ޚަރަދު ކުޑަކުރުމަށާއި ދުޅަހެޔޮ ގައުމަކަށް ދިގު މުއްދަތަކަށް އެހީތެރިވެދޭނެ ކަމެކެވެ. މި ފިޔަވަޅުތަކަކީ އައު ޖީލުގެ ސަލާމަތަށް ނިންމަވާ އެންމެ ހަރުދަނާ ނިންމެވުންތަކެކެވެ. މިއީ ޖީލުތަކަކަށް ފައިދާ ދެމިގެންދާނޭ މުހިންމު ނިންމުންތަކެކެވެ.