ތަރައްޤީގެ ރޮނގުގައި އިންޑިއާގެ އެއްބާރުލުން އަބަދުވެސް ލިބޭނެ: ސަފީރު

އިންޑިއާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒުގެ އަރިހަށް ވަދާޢީ ޒިޔާރަތެއް ކުރައްވައިފިއެވެ.

ރައީސުލްޖުމްހޫރުއްޔާ އޮފީހުގައި ބޭއްވެވި މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ދެޤައުމުގެ ގުޅުން ބަދަހިކުރެއްވުމަށް ސަފީރު ކުރައްވަމުން ގެންދަވާ މަސައްކަތްޕުޅުތަކަށް ޝުކުރު އަދާކުރެއްވިއެވެ. އަދި ސަފީރުގެ ދައުރުގައި، ރާއްޖެއާއި އިންޑިޔާއާ ދެޤައުމުގެ ދެމެދުގައި އޮތް ގާތް ރަޙްމަތްތެރިކަމުގެ ގުޅުން އިތުރަށް ބަދަހިވެގެން ދިޔަކަން ރައީސުލްޖުމްހޫރިއްޔާ ފާހަގަކުރެއްވިއެވެ.

މިބައްދަލުކުރެއްވުމުގައި ސަފީރު މުނޫ މަހާވަރު ދެއްކެވި ވާހަކައިގައި، ރާއްޖޭގެ ތަރައްޤީއަށް އިންޑިޔާއިން އެއްބާރުލުން ދެއްވާނެކަމުގެ ޔަޤީންކަން ދެއްވިއެވެ. އަދި ދެޤައުމުގެ ގުޅުން އިތުރަށް ބަދަހިވެގެންގޮސްފައިވާ ކަމަށްވެސް ވިދާޅުވިއެވެ.

ރައީސުލްޖުމްހޫރިއްޔާއާއި ސަފީރު ދެއްކެވި ވާހަކަފުޅުގައި، ރައީސުލްޖުމްހޫރިއްޔާ އިންޑިޔާއަށް ކުރެއްވި ފުރަމާނަ ދަތުރުފުޅުގެ މައްޗަށް އަލިއަޅުވާލެއްވިއެވެ. އަދި މި ދަތުރުފުޅުގައި ސޮއިކުރެއްވި އެއްބަސްވުމުގެ ސަބަބުން މިހާރު އޮތް ތަރައްޤީގެ ޕާޓްނަރޝިޕް ކުރިއެރުވުމުގެ ބިންގާ އެޅިގެން ދިޔަ ކަމަށް ވިދާޅުވިއެވެ. އަދި ދެބޭފުޅުން ވަނީ ރާއްޖޭގެ އިޤްތިޞާދީ އިޞްލާޙުތައް ތަންފީޒުކުރުމަށާއި، އިޖްތިމާޢީ ވެލްފެއަރ ކުރިއެރުވުމުގައި އިންޑިޔާގެ ދީލަތި އެހީގެ ދަށުން ހޯދަމުންދާ ކުރިއެރުންތަކުގެ މައްޗަށް އަލިއަޅުއްވާ ވާހަކަފުޅު ދައްކަވާފައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާއާއި ސަފީރު ދެއްކެވި ވާހަކަފުޅުގައި، ދެޤައުމުގެ ދެމެދުގައި ޤާއިމުކުރެވިފައިވާ ރަނގަޅު ރާސްތާ ދެމެހެއްޓުމުގެ ޤާބިލުކަން އެބައޮތްކަމަށް ވިދާޅުވިއެވެ. އަދި ކުރިއަށް އޮތްތަނގައިވެސް ގުޅުން ބަދަހިކުރެވޭނެ ގޮތްތަކާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ސަފީރަށް ހެޔޮއެދުންތައް ފޮނުއްވައި، ދެން އަންނަން ހުރި ސަފީރާއެކު ތަރައްޤީގެ ގުޅުން އިތުރަށް ބަދަހިކުރެއްވުމަށް ޝައުޤުވެރިކަން ފާޅުކުރެއްވިއެވެ.