މަސްވެރިންގެ ދުވަހާއި ގުޅުވައިގެން ކުޑަކުދިންގެ ހަވީރެއް

މަސްވެރިންގެ ދުވަހާއި ގުޅުވައިގެން ކުޑަކުދިންގެ ހަވީރެއް އާޓިފިޝަލް ބީޗްގައި ބާއްވައިފިއެވެ.

މި ކުޑަކުދިންގެ ހަވީރު އިންތިޒާމު ކުރީ މަސްވެރިކަން ޕްރޮމޯޓް ކުރުމަށް އުފެއްދި މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ލިމިޓެޑުންނެވެ.

މަސްވެރި އުފާގެ ނަމުގައި ބޭއްވި ކުޑަކުދިންގެ ހަވީރު ކުރިއަށްދިޔައީ ހަވީރު 16:00 އިން 18:00 އަށެވެ. މި ހަވީރުގައި ގިނަ އަދަދެއްގެ ކުޑަކުދިން ވަނީ ބައިވެރިވެފައިވާއިރު ކުޑަކުދިންނާއި ގުޅޭ ތަފާތު ކުޅިވަރު ހަރަކާތްތައް ކުރިއަށްދިޔަ ސްޓޯލްތަކާއި ފޮޓޯ ނެގުމުގެ ހަރަކާތްތަކެއްވެސް ވަނީ ކުރިއަށް ގެންގޮސްފައެވެ. އަދި މި ހަވީރުގައި ރޮބޯމޭންގެ ހުށަހެޅުންތައް ފެނިގެންދިޔައެވެ.

ކުޑަކުދިންގެ ހަވީރުގައި މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙްމަދު ޝިޔާމް ބައިވެރިވެވަޑައިގެންނެވިއެވެ. ޝިޔާމް ވިދާޅުވީ މަސްވެރިންގެ ދުވަހާއި ގުޅިގެން އެއްހަފްތާއަށް އެކި އެކި ހަރަކާތްތައް ކުރިއަށް ގެންދިޔުމަށް ވުޒާރާއިން ރާވާފައިވާ ކަމަށެވެ.

ވަޒީރު ވިދާޅުވީ މިފަދަ ދުވަހެއް ފާހަގަކުރުމުގެ ބޭނުމަކީ އާއިލާތަކުން އެއްވެ އުފާވެރި ވަގުތުކޮޅެއް ހޭދަކޮށްލުމުގެ ފުރުސަތު ފަހިކޮށްދިނުން ކަމަށެވެ.

"އިވެންޓް ވަރަށް ފުރިހަމަ، މިހާ ކުރު މުއްދަތެއްގައި މި ހަރަކާތް ރޭވީ. ކުންފުނި ޅަފަތުގައި އޮތް ނަމަވެސް އަންނަ އަހަރު ކުންފުނީގެ ހަރަކާތްތައް ބާރަށް ކުރިއަށްދާނެ" ވަޒީރު ވިދާޅުވިއެވެ.

މި ކުޑަކުދިންގެ ހަވީރުގައި ބައިވެރިވި ކުދިން ބުނީ ގިނަ ގޭމްތަކެއްގައި ބައިވެރިވެ، އުފާވެރި ވަގުތުކޮޅެއް ހޭދަކޮށްލެވުނު ކަމަށެވެ.

މަސްވެރިކަމުގެ ސިނާއަތު ފުޅާކުރުމަށް ސަރުކާރުން ގިނަ މަސައްކަތްތަކެއް ކުރައްވަމުންދާއިރު، ކުރިއަށްއޮތްތަނުގައި މި ދާއިރާއަށް ބޮޑެތި ކުރިއެރުންތަކެއް އަންނާނެކަމަށް ސަރުކާރުން ވިދާޅުވެއެވެ.