މަސްވެރިކަމުގެ މުހިންމު ހުރިހާ މަޝްރޫޢުތަކަށް ބޭނުންވާ ފައިސާ ވަނީ ހަމަޖެހިފައި: މަސްވެރިކަމާބެހޭ ވަޒީރު

މަސްވެރިކަމުގެ ސިނާއަތު ކުރިއަރުވަން ސަރުކާރުން ރާވާފައިވާ މަޝްރޫޢުތަކަށް ބޭނުންވާ ހުރިހާ ފައިސާ ހަމަޖެހިފައިވާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

މަސްވެރިކަމުގެ ސިނާއަތު ކުރިއަރުވަން ސަރުކާރުން އެންމެ ބޮޑަށް އިސްކަންދެއްވައިގެން ކުރައްވާ އެއް މަސައްކަތަކީ މަސްވެރިން ކިރުވާ މަހަށް އަވަހަށް ފައިސާ ދިނުމާއި، މަސްވެރިންގެ ހުރި ކަންބޮޑުވުންތަކަށް ހައްލު ހޯދައިދިނުމެވެ.

މަސްވެރިކަމާގުޅޭ ވަޢުދުތައް ފުއްދެވުމަށް ސަރުކާރުން ކުރައްވަމުން އަންނަ މަސައްކަތްތަކާއި ގުޅޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވީ މަސްވެރިންގެ ކަންބޮޑުވުންތައް ހައްލު ކުރެއްވުމަކީ ރައީސުލްޖުމްހޫރިއްޔާ އެންމެ އިސްކަމެއް ދެއްވާ އެއް މަސައްކަތްކަމަށެވެ. އެގޮތުން މަސްވެރިކަމުގެ ސިނާއަތުގައި ސަރުކާރުން އެންމެ ބޮޑަށް އިސްކަންދޭ ކަންކަމަކީ މަސްވެރިން ކިރުވާ މަހަށް އަވަހަށް ފައިސާ ފޯރުކޮށްދިނުމާއި ފަސޭހައިން އައިސް ލިބޭނެ މަގު ތަނަވަސްކުރުން ކަމަށް ވިދާޅުވިއެވެ. އަދި މަހުގެ އެކި ބާވަތްތައް އެކްސްޕޯޓު ކުރާނެ އިތުރު މާކެޓްތައް ހޯދުމަކީވެސް ސަރުކާރުން އިސްކަންދެއްވާ މަސައްކަތެއްކަމަށްވެސް ވަޒީރު ވިދާޅުވިއެވެ.

މަސްވެރިކަމުގެ ސްޓޯރޭޖް ކެޕޭސިޓީއާ ގުޅޭގޮތުން ވާހަކަދައްކަވަމުން ވަޒީރު ޝިޔާމް ވިދާޅުވީ އެއްގަމުގައި ހުރި ސްޓޯރޭޖް ކެޕޭސިޓީ އަކީ 4200 ޓަނުކަމަށާއި އެންމެ އެކަށީގެންވާ ކެޕޭސިޓީ ނޫންކަމަށެވެ.

ޝިޔާމް ވިދާޅުވީ މަސްވެރިކަމުގެ ސިނާއަތުގައި ކުރަން ހުރި ހުރިހާ މަސައްކަތަކަށް ބޭނުންވާ ފައިސާ ހަމަޖެހިފައިވާއިރު މި މަސައްކަތްތައް ކުރިއަށް އޮތް ދޮޅު އަހަރާއި ދެ އަހަރާ ދޭތެރޭ ނިންމައި، އެތަންތަނުން ޚިދުމަތް ލިބޭނެކަމަށެވެ. އަދި އޭގެ ސަބަބުން ކަނޑުމަތީގެ ބޯޓުތަކާއި އެއްގަމުގެ ސްޓޯރޭޖް އެއްކޮށްލައިގެން މިހާރު ހުރި 8000 ޓަނުގެ ސްޓޯރޭޖް 25000 ޓަނަށް އިތުރުވެގެންދާނެކަންވެސް ވަޒީރު ފާހަގަކުރެއްވިއެވެ.

މަސްވެރިކަމުގެ ސިނާއަތް ކުރިއެރުވުމަށްޓަކައި ވަރަށް ބޮޑެތި ނިންމުންތައް ނިންމާ ހޭދަތަކެއް ކުރައްވަން ޖެހޭނެކަން ފާހަގަކުރައްވާ ވަޒީރު ޝިޔާމް ވިދާޅުވީ މަސްވެރިކަމުގެ ސިނާއަތުގައި ހުރި މައްސަލަތައް ހައްލުކުރެއްވުމަށް ރައީސުލްޖުމްހޫރިއްޔާ ގެންގުޅުއްވާ ސިޔާސަތުތަކުގެ ދަށުން 5 ބިލިއަނެއްހާ ރުފިޔާ އިންވެސްޓް ކުރަންޖެހޭކަމަށެވެ.

"ކޮންމެހެން ނުޖެހޭ ދަޢުލަތުން އެ ހުރިހާ އެއްޗެއް އިންވެސްޓް ކުރާކަށް، ޕްރައިވެޓް ޕާޓީތަކާއި އެހެން ބޭންކުތަކާއި އެހެނިހެން ފަރާތްތަކުގެ އެހީތެރިކަމާއެކު މިކަން އެބައޮތް ކުރެވެން. ރާއްޖޭގެ މަސްވެރި ސިނާއަތް ރަނގަޅުކުރުމަށް ރައީސުލްޖުމްހޫރިއްޔާގެ ސިޔާސަތު ތަންފީޒު ކުރުމަށްޓަކައި އަޅުގަނޑުމެން ހޯދަންޖެހޭ ހުރިހާ ފައިސާއެއް ރައީސުލްޖުމްހޫރިއްޔާ އެހެރީ ހޯއްދަވާފައި. ދެން އޮތީ މިކަންކަން ތަންފީޒުކުރުން" ވަޒީރު ޝިޔާމް ވިދާޅުވިއެވެ.

މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ގިނައިން މަސް ބާނާ ދުވަސްވަރު ދަތިކަމެއް ނެތި މަސްވެރިންނަށް އައިސް ލިބޭނެ މަގު ފަހިކުރުމަށް ދޯނިފަހަރުގައި ލޮނުފެނުން މަސް ފިނިކުރާ ނިޒާމް ނުވަތަ އާރުއެސްޑަބްލިއު ސިސްޓަމް ހަރުކުރުމަށް ލޯނަށް އެދުމަށްވެސް ސަރުކާރުން ހުޅުވާލިއެވެ. އަދި މިހާތަނަށް ބައެއް ފަރާތްތަކަށް ލޯނު ދޫކޮށްފައިވާއިރު މިއީ ސަރުކާރަކުން މިހާތަނަށް ދޫކުރި މިފަދަ އެންމެ ލުއި ލޯނެވެ.