ރާއްޖޭގެ ރައީސަށް އެންފީލްޑުން މަރުހަބާ ދަންނަވަން ލިބުމަކީ ޝަރަފެއް: ލިވަޕޫލް ލެޖެންޑް އިއަން ރަޝް

ރައިސޫލްޖުމްހޫރިއްޔާ ޑރ. މުޙައްމަދު މުއިއްޒަށް އެންފީލްޑް ދަޑުން މަރުހަބާ ދަންނަވަން ލިބުމަކީ ވަރަށް ބޮޑު ޝަރަފެއް ކަމަށާއި، ލިވަޕޫލްއާއެކު މަސައްކަތްކުރަން ދިވެހިރާއްޖެއިން ނިންމުމަކީ ވަރަށް އުފާވި ކަމެއް ކަމަށް އެ ކުލަބުގެ ލެޖެންޑް އިއަން ރަޝް ބުނެފިއެވެ.

ލިވަޕޫލްގެ ތާރީހުގައިވެސް މިހާތަނަށް އެ ކްލަބަށް އެންމެ ގިނަ ލަނޑު ޖަހާފީފައިވާ ކުރީގެ މަޝްހޫރު ކުޅުންތެރިއާ އިއަން ރަޝް ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ ވިޒިޓް މޯލްޑިވްސް އާއި ލިވަޕޫލް އާއެކު ހެދިގެންދިޔަ އެއްބަސްވުމަކީ ދެ ފަރާތައްވެސް އިތުރު ދޮރުތަކެއް ހުޅުވިގެންދާނެ ވަރަށް ކާމިޔާބު އެއްބަސްވުމަކަށް ވާނެކަމަށް ގަބޫލުކުރާ ކަމަށެވެ.

ރައިސޫލްޖުމްހޫރިއްޔާ ޑރ. މުހައްމަދު މުއިއްޒަށް ލިވަޕޫލްގެ ދަނޑުން މަރުހަބާ ދެންނެވުމަށްފަހު އިއަން ރަޝް ބުނީ ސޯޝަލް މީޑިއާގައި 200 މިލިއަން ފޮލޮވާސް އަދި މިދިޔަ ސީޒަންގައި 12 ބިލިއަންއާ ގާތްކުރާ އަދަދަށް ވިއުސް ލިބިފައިވާ ލިވަޕޫލް އަކީ ދުނިޔޭގެ ވަރުގަދަ ބްރޭންޑެއް ކަމަށާއި ވިސިޓް މޯލްޑިވްސް އާއެކު ހެދުނު އެއްބަސްވުމަކީ ހަމައެކަނި ޓޫރިޒަމް އާއި ގުޅުންހުރި އެއްބަސްވުމެއް ނޫންކަމަށާއި މިއީ މުޅި ދުނިޔެ ހިމާޔަތްކޮށް ކުރިއަށް އޮތް ޖީލުތަކަށް ރަނގަޅު މާހައުލެއް ދެއްކުމަށް އެޅުނު ރަނގަޅު ފިޔަވަޅެއް ކަަމަށެވެ.

ދިވެހިރާއްޖޭގެ ތިމާވެއްޓާއި ރައްޓެހި ސަސްޓެއިނަބަލް ޓޫރިޒަމްގެ ޕޮލިސީތަކަށް ތައުރީފްކޮށް އިއަން ރަޝް ވަނީ ލިވަޕޫލްއިން ތިމާވެށި ރައްކާތެރި ކުރުމަށް ކުރަމުންދާ މަސައްކަތްތަކުގެ ތެރެއިން ދިވެހިރާއްޖެ އިތުރަށް ޕްރޮމޯޓުކޮށްދޭނެކަމަށް ބުނެފައެވެ.

ލިވަޕޫލްގެ "އޮފިޝަލް ޓޫރިސްޓް ޑެސްޓިނޭޝަން ޕާޓްނަރު"ގެ ގޮތުގައި ދިވެހިރާއްޖެ ހަމަޖެއްސީ ރާއްޖޭގެ ޓޫރިޒަމް ބްރޭންޑް ވާސިލުވާ މިންވަރު އިތުރުކޮށް، ރާއްޖެއަށް ޒިޔާރަތްކުރުމަށް އިތުރު ފަތުރުވެރިންނަށް ހިތްވަރު ދިނުމުގެ ގޮތުން، ތިން އަހަރާއި ހަ މަސް ދުވަހަށް ކުރިއަށް ގެންދާ ކެމްޕޭނެއްގެ ދަށުންނެވެ.