ދުނިޔެއާއި އާޚިރަތުގެ މަގު އާރާސްތުކުރެވޭނީ ދީނުގެ ޢިލްމު ލިބިގަތުމަށް ގަދައަޅައި މަސައްކަތްކޮށްގެން: ޚުޠުބާ

ދީނުގެ ޢިލްމު ލިބިގަތުމަށް ގަދައަޅައި މަސައްކަތްކުރުމާއެކު، އެކަމުގެ މާތް ދަރަޖައާއި ހެޔޮކަން ލިބިގަނެ، އެއިން ދުނިޔެއާއި ޢާޚިރަތުގެ މަގު އާރާސްތުކުރުމަށް މިއަދުގެ ޚުކުރު ޙުޠުބާގައި ވިދާޅުވެއްޖެއެވެ.

މިއަދުގެ ހުކުރު ޚުޠުބާގެ މަޢުޟޫއަކީ "ޢިލްމު އުނގެނުމުގެ މާތްކަން" އެވެ.

ޢިލްމު އުނގެނުމަކީ ކޮންމެ މުސްލިމެއްގެ މައްޗަށް ވާޖިބުވެގެންވާ އަދި އެކަމެއްގެ ސަބަބުން މާތް ﷲގެ ލޯބި އެމީހަކަށް ލިބިގެންދާކަމެކެވެ. އަދި ޢިލްމު ލިބިގަތުމަކީ އެމީހެއްގެ ޝަރަފާއި، މާތްކަމާއި، މަތުވެރިކަމުގެ އިތުރުން އޭނާގެ ދަރަޖަ އިތުރުކުރައްވާކަމެކެވެ. މީގެ އިތުރުން މާތް ﷲއަށް އެންމެ ބޮޑަށް ބިރުވެތިވެ، ތަޤްވާވެރިވާ މީހުންނަކީ، ޢިލްމު އުނގެނި ޢިލްމު އުނގަންނައިދޭ މީހުންނެވެ.

މިއަދުގެ ހުކުރު ޚުޠުބާގައި ވިދާޅުވީ، ޢިލްމު އުނގެނުމަކީ މަތިވެރި މަޤާމެއް ލިބިގެންވާ އަޅުކަމެއްކަމަށާއި، ޢިލްމު އުނގެނުމަށް ނަބިއްޔާ (ޞޢވ)ވެސް ވަރަށް ބޮޑަށް ބާރުއަޅުއްވާފައިވާކަމަށެވެ. އަދި ބަދުރު ހަނގުރާމައިގެ އަސީރުން މިނިވަންވުމަށް ފިދުޔައިގެ ބަދަލުގައި މުސްލިމް ދިހަ ކުއްޖަކަށް ލިޔަންކިޔަން ދަސްކޮށްދިނުން ޝަރުޠު ކުރެއްވުމުން ޢިލްމުގެ މަޤާމުގެ މަތިވެރިކަން ވަރަށް ރަނގަޅަށް ދޭހަވެގެންދާކަމަށްވެސް ޚުޠުބާގައި ވަނީ ފާހަގަކުރައްވާފައެވެ.

ހެޔޮކަންކަމަށް އެދެން ބޭނުންވާ މީހުން ޝަރުޢީ އިލްމު އުނގެނުމަށް ވަގުތު ހުސްކުރުމުގެ މުހިންމުކަމަށްވެސް މިއަދުގެ ހުކުރު ޚުޠުބާގައި ވަނީ އަލިއަޅުއްވާލައްވާފައެވެ. މިގޮތަށް ޢިލްމު އުނގެނުމަށް ކޮންމެ ދުވަހަކުވެސް ވަކި ވަގުތުކޮޅެއް ހުސްކުރުމަށް ބާރުއަޅުއްވާފައިވަނީ، ޢިލްމު އުނގެނުމަކީ އެކަމެއްގެ ސަބަބުން ތިމާއަށާއި އެހެން މީހުންނަށްވެސް އޭގެ ލާބަޔާއި މަންފާ ލިބިގެންދާކަމަކަށްވާތީއެވެ. އަދި ޢިލްމުވެރިޔާ މަރުވުމަށްފަހުގައިވެސް، އޭނާ އުނގެނިފައިވާ އަދި އެހެން މީހުންނަށް ފޯރުކޮށްދީފައިވާ ޢިލްމަކުން ފައިދާ ކުރާނެކަމަކަށްވާތީއެވެ.

"އިންސާނާ މަރުވުމުން ތިންކަމަކުން މެނުވީ އޭނާގެ ޢަމަލުތައް ނިމެއެވެ. އެއީ ދެމިގެންދާ ޞަދަޤާތަކުން، ނުވަތަ ފައިދާހުރި ޢިލްމަކުން، ނުވަތަ އޭނާ ދޫކޮށް ދިޔަ، އޭނާއަށްޓަކައި ހެޔޮދުޢާކުރާނޭ ޞާލިޙު ދަރިއެއްގެ ފުށުން މެނުވީއެވެ." އަދިވެސް މާތް ނަބިއްޔަ ޙަދީޘްކުރައްވައިފައި ވެއެވެ. "އެއް ހާސް އަޅުވެރީންނަށް ވުރެ، އެންމެ ފަޤީހެއްގެ ބާރު ޝައިޠާނާގެ މައްޗަށް ގަދަވެގެންވެއެވެ." ޚުޠުބާގައި ވިދާޅުވިއެވެ.

ޚުޠުބާގައި ވިދާޅުވީ، ނުދަނެ ހުރެ އަޅުކަންކުރާ މީހަކަށް ބާޠިލު ގޮތުގައި އަޅުކަމެއް ކުރުމަށް ޝައިޠާނާ ވިސްނައިދީފާނެކަމަށާއި، އެކަމުގެ ސަބަބުން އޭނާ މަގުފުރެދި، އެހެންމީހުން ވެސް މަގުފުރައްދައިފާނެކަމަށެވެ. އެހެންނަމަވެސް ޢިލްމު އުނގެނިފައިވާ މީހެއް މަގުފުރައްދާކަށް ޝައިޠާނާއަކަށް ފަސޭހައެއް ނުވާނެކަމަށާއި، އޭގެ ބަދަލުގައި އޭނާއަށް ލިބިފައިވާ ޢިލްމުގެ މަތީގައި ސާބިތުވެ ހުރެ، އަނެކުންވެސް ހެޔޮ މަގަށް އަޅުވަން މަސައްކަތްކުރާނެކަމަށްވެސް ޚުޠުބާގައި ވިދާޅުވިއެވެ.

މާތް ނަބިއްޔާ މުޙައްމަދު (ޞޢވ)ގެ އިރުޝާދުފުޅުތަކަށް ތަބާވެ، ދީނުގެ ޢިލްމު ލިބިގަތުމަށް ގަދައަޅައި މަސައްކަތްކުރުމާއެކު، އެކަމުގެ މާތް ދަރަޖައާއި ހެޔޮކަން ލިބިގަނެ، އެއިން ދުނިޔެއާއި ޢާޚިރަތުގެ މަގު އާރާސްތުކުރުމަށް ޚުޠުބާގައި ބާރުއަޅުއްވާފައިވެއެވެ. އަދި ޢިލްމުން އަމިއްލަ ނަފުސާއި، އަނބިދަރީންނާއި، އަވަށްޓެރީންނާއި، މުޅި އިންސާނީ މުޖުތަމަޢަށް އަމާންކަމައި ރައްކާތެރިކަމާއި ކާމިޔާބީ ހޯދައިދިނުމާއެކު، ޢިލްމު އުނގެނި، އެއާ އެއްގޮތަށް ޢަމަލުކޮށް، މާތް الله ރުއްސަވާ މަގަށް ރުޖޫޢަވުމަށްވެސް ޚުޠުބާގައި ވަނީ ބާރުއަޅުއްވާފައެވެ.