މަސައްކަތް ކުރިއަށްދާ ފެނާއި ނަރުދަމާގެ ހުރިހާ މަޝްރޫޢެއްގެ މަސައްކަތް މިއަހަރު ނިމޭނެ

މިހާރު މަސައްކަތް ހިނގަމުންދާ ފެނާއި ނަރުދަމާގެ ހުރިހާ މަޝްރޫޢެއްގެ މަސައްކަތް މި އަހަރުގެ ނިޔަލަށް ނިންމާލެވޭނެކަމަށް އެމްޑަބްލިޔުއެސްސީގެ މެނޭޖިންގ ޑިރެކްޓަރ ޢަބްދުލް މަޠީން މުޙައްމަދު ވިދާޅުވެއްޖެއެވެ.

މި ސަރުކާރު ވެރިކަމާ ހަވާލުވިއިރު ފެނާއި ނަރުދަމާގެ ވަރަށް ގިނަ މަޝްރޫޢުތަކެއް އޮތީ ހުއްޓިފައެވެ. އޭގެ ތެރެއިން ގިނަ މަޝްރޫޢުތަކެއް މިދިޔަ އަހަރު ނިންމިއެވެ. އަދި ހުއްޓިފައިވާ 22 ރަށުގެ މަސައްކަތް މިދިޔަ އަހަރުގެ ފަހުކޮޅު އެމްޑަބްލިޔުއެސްސީއާ ވަނީ ހަވާލުކޮށްފައެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަދައްކަވަމުން އެމްޑަބްލިޔުއެސްސީގެ މެނޭޖިންގ ޑިރެކްޓަރ ޢަބްދުލް މަޠީން މުޙައްމަދު ވިދާޅުވީ މި އަހަރުގެ ތެރޭގައި 20 ރަށުގައި ފެނާއި ނަރުދަމާ ޤާއިމުކުރުމުގެ މަސައްކަތް ފެށުމަށް ތައްޔާރުވެފައިވާ ކަމަށެވެ. އަދި އޭގެ ތެރެއިން ބައެއް މަޝްރޫޢުތަކުގެ ޢަމަލީ މަސައްކަތް ފަށާފައިވާއިރު، ބައެއް މަޝްރޫޢުތައް ޑިޒައިން ފޭސްގައި ހުރިކަންވެސް މަޠީން ފާހަގަކުރެއްވިއެވެ.

މަޠީން ވިދާޅުވީ އަމާޒަކީ މަސައްކަތް މިހާރު ފަށާފައިވާ ހުރިހާ މަޝްރޫޢެއް މި އަހަރަށް ނިންމުން ކަމަށެވެ. އަދި މަސައްކަތް ނުފަށާ ޑިޒައިން ފޭސްގައި ހުރި ހުރިހާ މަޝްރޫޢެއްވެސް އަންނަ އަހަރުގެ މެދުތެރޭ ނިމޭނެކަމަށް މަޠީން ވިދާޅުވިއެވެ.

"ޚަރަދު ކުޑަ ކުރުމުގެ ގޮތުން ސަރުކާރުން ކަނޑައަޅުއްވާފައިވަނީ ކޮމާރޝަލް ކޮންޓްރެކްޓާއަކާ ހަވާލުނުކޮށް، ސަރުކާރު ކުންފުނިތަކުން ކުރިއަށްގެންދާ ގޮތަށް. އޭރުން އަސްލު އެންމެ ޚަރަދު ކުޑަވަނީ. ވެރިކަމާ ހަވާލުވިއިރު ހުއްޓިފައި އޮތް ބައިވަރު މަޝްރޫޢުތައް ހުރި ފައިސާ ހަމަނުޖެހިގެން." މަޠީން ވިދާޅުވިއެވެ.

ރާއްޖޭގެ އެކިކަންކޮޅުތަކުގައި ހުއްޓިފައިވާ ފެނާއި ނަރުދަމާގެ ހުރިހާ މަޝްރޫޢެއްގައި ދިމާވެފައިވާ މައްސަލަތައް ޙައްލުކޮށް ސަރުކާރުގެ ފުރިހަމަ ބާރު އޮންނަގޮތަށް އެ މަޝްރޫއުތައް ކުރިއަށްގެންގޮސް ނިންމަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރެއްވީ މިދިޔަ ޖެނުއަރީ މަހުއެވެ.

މިދިޔަ އަހަރު ފެނާއި ނަރުދަމާގެ 20 މަޝްރޫޢެއްގެ މަސައްކަތް އެމްޑަބްލިޔުއެސްސީން ވަނީ ނިންމާލާފައެވެ.