ޕީއެންސީގެ މެންބަރުން ސަރުކާރާއި ދެކޮޅަށް ޚިޔާލު ފާޅުކުރިކަމަށް ބުނެ ފަތުރަނީ ދޮގު ވާހަކަތަކެއް: ފަލާޙު

ސަރުކާރު ހިންގާ ޕާޓީ، ޕީޕަލްސް ނެޝަނަލް ކޮންގްރެސް، ޕީއެންސީގެ ޕާލިމެންޓަރީ ގުރޫޕުގެ ބައްދަލުވުމެއްގައި ބައެއް މެންބަރުން ސަރުކާރާ ދެކޮޅަށް ޚިޔާލުފާޅުކުރިކަމަށް ބުނެ ފަތުރަނީ ދޮގު ވާހަކަތަކެއްކަމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙު ވިދާޅުވެއްޖެއެވެ.

ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙު މިހެން ވިދާޅުވީ އެމްޑީއޭގެ ޕީޖީ ގްރޫޕްގެ މެމްބަރެއްކަމަށްވާ ވެލިދޫ ދާއިރާގެ އެމްޑީއޭ މެންބަރު މުޙައްމަދު ޢައްބާސް ޕީއެންސީގެ ޕީޖީ ގްރޫޕާއި ގުޅޭގޮތުން ދެއްކެވި ވާހަކަތަކަކަށް ރައްދު ދެއްވަމުންނެވެ. އެގޮތުން ޕީއެންސީގެ ޕީޖީ ބައްދަލުވުމެއްގައި ބައެއް މެންބަރުން ސަރުކާރުގެ ސިޔާސަތުތަކާ ދެކޮޅަށް ޚިޔާލުފާޅުކޮށްފައިވާކަމަށް އައްބާސް ވަނީ ވިދާޅުވެފައެވެ.

މިކަމާއި މީސް މީޑިޔާގައި ޙިއްސާކުރެއްވި ޕޯސްޓެއްގައި ޕީއެންސީގެ ޕީޖީ ލީޑަރު އިބްރާހިމް ފަލާޙު ވަނީ އައްބާސްގެ ވާހަކަތައް ދޮގުކުރައްވާފައެވެ. އަދި ދޮގު ވާހަކަތައް ފަތުރައިގެން ޕީއެންސީގެ ޕީޖީ ގުރޫޕް ރޫޅާލެވިދާނެކަމަށް ހީކުރުމަކީ ކުށް ހީއެއް ކަމަށްކަމަށްވެސް އޭނާ ވިދާޅުވިއެވެ.

ފަލާޙު ވިދާޅުވީ ޕީއެންސީގެ ޕީޖީ ގުރޫޕު އޮތީ އެކަތިގަނޑެއްގެ ގޮތުގައި ރައީސް ޑރ. މުޙައްމަދު މުޢިއްޒުގެ ފަހަތްޕުޅުގައި ވަރަށް ސާބިތުކޮށް ކަމަށެވެ. އަދި ކިތަންމެ ނުބައި ޕްލޭންތަކެއް ރާވާ، ދޮގު ވާހަކަތައް ފެތުރި ނަމަވެސް އެކަން ކާމިޔާބުނުވާނެކަމަށް ފަލާޙު ވިދާޅުވިއެވެ.

"މިފަދަ ފިތުނަވެރި ނުބައި ވާހަކަތައް ފެތުރުމަކީ ތިމާގެ ސިޔާސީ ހުނަރުވެރިކަން ހާމަކޮށްދޭ ކަމެއްކަމުގައި ދެކުމަކީ ވަރަށް ބޮޑު ކުށް ހީއެއް. މި ކަމުން އަންގައިދެނީ ތިމާއަކީ އެއްވެސް އަޚްލާޤެއް ނެތް މީހެއްކަން." ފަލާހުގެ ޕޯސްޓުގައި ވިދާޅުވިއެވެ.

ޕީއެންސީ ޕީޖީ ގްރޫޕް ރޫޅާލެވިދާނެކަމަށްހީކޮށް މިފަދަބުހްތާންދޮގުވާހަކަފެތުރުމަކީ ވަރަށްބޮޑުކުށްހީއެއް،

މެމްބަރު އައްބާހަށްވަނީ މިފަދަފިތުނަ ފަތުރައިދޭމަތިން ޔާމީނު ދާދިފަހުން އެގެއަށްގެނަގޮސް 3 މިލިއަން ރުފިޔާދީފައިވާ ކަމަށްމިދެކެވޭ ވާހަކަތަކަށް މި މެސެޖުންބާރުއެބަލިބޭ،… pic.twitter.com/cGueSGpFWd

— Ibrahim Falah (@IbrahimFalahR) August 8, 2025

ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވީ ޢައްބާސް ޢިޝާރަތްކުރެއްވި ޕީޖީ ބައްދަލުވުމުގައި ބައިވެރިވި ކަމަށާއި އެ ވާހަކަތަކަކީ ކަނޑައެޅިގެން ޙަޤީޤަތާ ޚިލާފު ވާހަކަތަކެއް ކަމަށެވެ. އަދި އެ ގޮތަށް ފަތުރާ ދޮގު ޚަބަރުތަކުން ޕީއެންސީ ބައިބައި ނުކުރެވޭނެކަމަށް ޢަބްދުއްރަޙީމް ވިދާޅުވިއެވެ.

މި ބައްދަލުވުމުގައި އަޅުގަނޑުވެސް ބައިވެރިވީން. މިއީ ކަނޑައެޅިގެން ޙަގީގަތާ ޚިލާފު ވާހަކަތަކެއް. މިހެން ފަތުރާ ދޮގު ޚަބަރުތަކުން ބައިބައިވާ ވަރަށްވުރެ ޕީއެންސީގެ ޕީޖީ މާ ވަރުގަދަވާނެ. pic.twitter.com/XzEqa6K1Sk

— Abdul Raheem Abdulla (@Banafsaa) August 8, 2025

ޕީއެންސީ ޕީޖީގެ ސީނިއަރ ޑެޕިއުޓީ ލީޑަރު އަދި ބާރަށު ދާއިރާގެ މެންބަރު އިބްރާހިމް ޝުޖާޢު ވިދާޅުވީ ޕީއެންސީގެ ޕީޖީ ގުރޫޕާ ގުޅުވައި އެހެން ޕާޓީއެއްގެ މެންބަރެއް ދައްކަނީ ޙަޤީޤަތާ ޚިލާފު، އެއްވެސް އަސްލެއް ނެތް ވާހަކަތަކެއް ކަމަށެވެ. އަދި ޙަޤީޤަތާ ޚިލާފު ވާހަކަތައް ފަތުރައިގެން ޕީއެންސީގެ ޕީޖީ ގުރޫޕު ބަލިކަށިކުރެވޭނެކަމަށް ދެއްކުމަކީ މޮޔަކަމެއް ކަމަށްވެސް ޝުޖާޢު ވިދާޅުވިއެވެ.

76 މެންބަރުން ތިއްބަވާ ޕީއެންސީގެ ޕާލިމެންޓަރީ ގްރޫޕަކީ މަޖިލީހުގައި ސުޕަރ މެޖޯރިޓީއެއް އޮންނަ ޕާޓީއަކަށްވާއިރު، އެ ޕާޓީގެ ޕީޖީ ގްރޫޕާއި ގުޅޭގޮތުން މީގެކުރިންވެސް ވަނީ މިފަދަ ހަޤީޤަތާއި ހިލާފު ވާހަކަތައް ފަތުރާފައެވެ.