ހިމަންދޫ އައު މިސްކިތުގެ މަސައްކަތް މިއަހަރު ނިމޭނެ: ރައީސް

އއ. ހިމަންދޫ އައު މިސްކިތުގެ މަސައްކަތް މިއަހަރުގެ ތެރޭގައި ނިމޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ އއ. ހިމަންދޫގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.

ހިމަންދޫގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މިސްކިތުގެ މަސައްކަތް ސަރުކާރުން ވަރަށް ގާތުން ބަލަމުންދާކަމަށެވެ. އަދި އަމާޒަކީ މިއަހަރުގެ ނިމުމުގެ ކުރިން މަސައްކަތް ނިންމާލުންކަމަށް ރައީސް ވިދާޅުވިއެވެ.

މީސްމީޑިޔާގައި ޙިއްސާކުރެއްވި ޕޯސްޓުގައި ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ ހިމަންދޫގައި ސަރުކާރުން ބިނާކުރަމުންދާ މިސްކިތުގެ 75 އިންސައްތަ މަސައްކަތް ނިންމާފައިވާ ކަމަށެވެ. އަދި މިސްކިތުގެ މަސައްކަތަށް ސަރުކާރުން 5.7 މިލިއަން ރުފިޔާ ޚަރަދުކޮށްފައިވާކަމަށްވެސް ވަޒީރު ވިދާޅުވިއެވެ. ވަޒީރު ވިދާޅުވީ މިއަހަރު ފަހުކޮޅުގައި ހިމަންދޫ މިސްކިތުގެ މަސައްކަތް ނިންމާލުމަށް މަސައްކަތްކުރަމުން އަންނަ ކަމަށެވެ.

އ.އ ހިމަންދޫގައި ސަރުކާރުން ބިނާކުރަމުންދާ މިސްކިތް، މިމިސްކިތުގެ 75% ވަނީ ނިމިފަ.މިހާތަނަށް ސަރުކާރުން 5.7 މިލިއަން ރުފިޔާ ޚަރަދު ކޮށްފި. މި މިސްކިތުގެ މަސައްކަތްކުރަނީ ޕްރައިވެޓް ކުންފި އެލައިޓް އިން. މިއަހަރު ފަހުކޮޅުގައި މިސްކިތް ނިމޭތޯ މިދަނީ މަސައްކަތްކުރަމުން pic.twitter.com/fwfygQ351S

— Mohamed Shaheem Ali Saeed (@Mohamedshaheem1) August 19, 2025

ހިމަންދޫގައި ތަރައްޤީކުރާ މިސްކިތުގެ ޢަމަލީ މަސައްކަތް ފެށީ 2023 ވަނަ އަހަރުގެ ޖޫން މަހުގެ 18 ވަނަ ދުވަހުއެވެ.

ހިމަންދޫގައި އަލަށް ތަރައްޤީކުރާ މިސްކިތަކީ 300 މީހުންގެ ޖާގައިގެ މިސްކިތެކެވެ. ހިމަންދޫގައި އަލަށް ތަރައްޤީކުރާ މިސްކިތް އަޅަނީ ރަށުގެ ބަނދަރު ސަރަޙައްދުގައެވެ. މި މިސްކިތުގެ މަސައްކަތްކުރަމުންދަނީ އެލައިޓް އިންޓަރނޭޝަނަލް ޕްރައިވެޓް ލިމިޑެޓް ކިޔާ ކުންފުންޏަކުންނެވެ.

މި މިސްކިތް ބިނާކުރުމަށް ދައުލަތުން 10,312,301.43 ރުފިޔާ ޚަރަދުކުރެއެވެ. މިސްކިތުގައި ފިރިހެނުންގެ އިތުރުން، އަންހެނުންނަށް ނަމާދުކުރެވޭނެ ޖާގަވެސް ހުންނާނެއެވެ.