ސަރުކާރުގެ އެކި އިދާރާތަކުގައި މަސައްކަތްކުރާ ފަރާތްތަކަށް އަމާޒުކުރައްވައިގެން 1500 ހައުސިންގ ޔުނިޓް ތަރައްޤީކުރެއްވުމަށް ރައީސުލްޖުމްހޫރިއްޔާ ނިންމަވައިފިއެވެ.
ރައީސުލްޖުމްހޫރިއްޔާ މިގޮތަށް ނިންމަވާފައިވަނީ މިކަމާބެހޭގޮތުން އިކޮނޮމިކް އެންޑް ޔޫތު ކައުންސިލުގައި މަޝްވަރާކުރެއްވުމަށްފަހުގައި ކަމަށް ރައީސުލްޖުމްހޫރިއްޔާގެ އޮފީހުން ހާމަކުރައްވައެވެ. މި މަޝްރޫޢަކީ، ސަރުކާރުން ސޯޝަލް ހައުސިންގ މަޝްރޫޢުތައް ހިންގެވުމަށް ނިންމަވާފައިވާ އުޞޫލާ އެއްގޮތުގެ މަތިން، ސަރުކާރުގެ އެކި ދާއިރާތަކުގަ ޚިދުމަތްކުރާ ތަފާތު ޕްރޮފެޝަންގެ ބޭފުޅުންނަށް ޚާއްޞަކުރައްވައިގެން ހިންގަވަން ނިންމަވާފައިވާ މަޝްރޫޢެކެވެ.
މި ފްލެޓްތައް ތަރައްޤީކުރެއްވުމަށް ހަމަޖެހިފައިވަނީ ހުޅުމާލޭ ދެވަނަ ފިޔަވަހި ތަރައްޤީކުރެއްވުމަށް ހިންގަވާ މަޝްރޫޢުގެ ތެރެއިންކަމަށްވެސް ރައީސުލްޖުމްހޫރިއްޔާގެ އޮފީހުން ވިދާޅުވެއެވެ.