މެލޭޝިއާގެ މެލަކާ ސްޓޭޓްގެ ސަރުކާރުން އިސްނަގައިގެން އުފެއްދި ދުނިޔާ މަލޭއު ދުނިޔާ އިސްލާމް ޑީއެމްޑީއައިގެ ގޮތްޕެއް ރާއްޖޭގައި އުފައްދައި، 3 އެއްބަސްވުމެއްގައި ސޮއިކޮށްފިއެވެ.
ދިވެހިރާއްޖެއަކީ މި ޖަމްޢިއްޔާގެ 19 ވަނަ އަދި އެންމެ ހަގު މެމްބަރު ޤައުމެވެ. ޑީއެމްޑީއައި ނުވަތަ ދުނިޔާ މެލޭއު ދުނިޔާ އިސްލާމަކީ އިސްލާމީ އުންމަތުގެ ތެރޭގައި ގުޅުން ބަދަހިކުރުވައި، ގުޅުން އާލާކޮށް އިޤްތިޞާދީ، އިޖްތިމާޢީ އަދި ޓެކްނޮލޮޖީގެ ދާއިރާ ކުރިއަރުވައި ކަންތައްތައް ރާވައި، ހިންގުމަށް އުފައްދާފައިވާ ޖަމްޢިއްޔާއެކެވެ. މި ޖަމްޢިއްޔާ އުފައްދާފައިވަނީ 21 އޮކްޓޯބަރު 2000 ގައެވެ. އަދި މިހާތަނަށް 18 ޤައުމެއް މި ޖަމްޢިއްޔާގެ މެމްބަރުންގެ ގޮތުގައި ޙަރަކާތްތެރިވަމުންދެއެވެ. އަދި ރަސްމީކޮށް ދިވެހިރާއްޖެ މި ޖަމްޢިއްޔާގެ މެމްބަރަކަށް ވުމާއެކު ރާއްޖެ ވެފައިވަނީ މި ޖަމްޢިއްޔާގެ އެންމެ ހަގު މެމްބަރު ޤައުމަށެވެ.
ޑީއެމްޑީއައި މޯލްޑިވްސް އިން ބުނީ ރާއްޖޭގެ ވިޔަފާރިވެރިންނާއެކު 3 އެއްބަސްވުމެއްގައި ސޮއިކުރައްވާފައިވާ ކަމަށާއި، އޭގެތެރޭގައި ފަތުރުވެރިކަން ފުޅާކުރުމަށާއި، ތަޢުލީމީ ދާއިރާ ކުރިއެރުވުމާއި، ދެޤައުމުގައި އުފައްދާ ތަކެތި ވިއްކުމުގެ އެއްބަސްވުމެއްގައިވަނީ ސޮއިކޮށްފައެވެ. ދިވެހިރާއްޖެ މި ޖަމިއްޔާގެ މެމްބަރު ޤައުމަކަށް ރަސްމީކޮށް ވުމަށް ބަނޑޮސް އައިލެންޑް ރިސޯޓްގައި ބޭއްވި ރަސްމިޔާތު ޝަރަފްވެރިކޮށްދެއްވީ ރައިސުލްޖުމްހޫރިއްޔާގެ ނާއިބް ޢަބްދުﷲ ޖިހާދުއެވެ. މި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނާއިބު ޢަބްދުﷲ ޖީހާދު ވިދާޅުވީ މި ޖަމްޢިއްޔާގެ މެމްބަރު ޤައުމަކަށް ރާއްޖެ ވެގެން ދިޔުމަކީ އެކަމުގެ ސަބަބުން ރާއްޖެއަށް އިޤްތިޞާދީ އަދި އިޖްތިމާޢީ ގޮތުން ބޮޑެތި ފައިދާތަކެއް ލިބިގެންދާނެ ކަމެއް ކަމަށް ދެކެވަޑައިގަންނަވާ ކަމުގައެވެ. ރައީސުލްޖުމްހޫރިއްޔާގެ ނާއިބުގެ ވާހަކަފުޅުގައި ބޭރު ދުނިޔެއިން މުސްލިމުންނަށް އަޅަމުންދާ ހުރަސްތަކާ ބެހޭގޮތުންވެސް ވާހަކަފުޅު ދެއްކެވިއެވެ.
މި ރަސްމިޔާތަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑީއެމްޑީއައި މޯލްޑިވްސްގެ ޗެއަރމަން ޢަބްދުﷲ ނާޝިދު ވިދާޅުވީ، ޑީއެމްޑީއައިގެ މެމްބަރު ޤައުމަކަށް ރާއްޖެ ވެގެންދިޔުމުން އެކި ދާއިރާތަކުން ރާއްޖެއަށް ކުރިއެރުންތަކެއް ލިބިގެންދާނެ ކަމަށެވެ.
"ޑީއެމްޑީއައި އަކީ އިސްލާމީ އިޤްތިސޯދީކަންކަން ސަރުކާރުން ރާވާފައިހުރި ޕޮލިސީތަކަށް ވާސިލްވުމަށް ވަރަށް މަގުފަހިވާ ގޮތަށް އުފެދިފައި އިން ޕުލެޓްފޯމެއް. އެ ޕުލެޓްފޯމުގެ ފުރިހަމަކަމުން އެވަގުތު އަޅުގަނޑަށް އޮފާ ޤަބޫލުކުރެވުނީ. އަދި އެ އޮފަރ ގަބޫލުކޮށްފަ ކުރިޔަށްދާން، މިއަދު އެ މަސައްކަތުގެ ގާތްގަޑަކަށް 7 މަސްތެރޭގައި މިތިބީ ފޯމަލީ ޑީއެމްޑީއައި ދިވެހިރާއްޖޭގައި އެސްޓޭބްލިޝްކޮށްފައި." ޑީއެމްޑީއައި މޯލްޑިވްސްގެ ޗެއަރމަން ޢަބްދުﷲ ނާޝިދު ވިދާޅުވިއެވެ.
މި ޖަމްޢިއްޔާގެ ޙަރަކާތްތައް ހިންގާ ޤައުމުތަކުގެ ތެރޭގައި މެލޭޝިއާގެ އިތުރުން ސިންގަޕޯރ، ސްރީލަންކާ، ސައުތުއެފްރިކާ، ބުރޫނާއީގެ ދަރުއްސަލާމް، ތިމޯރ ލެސްތޭ، މަޑަގަސްކަރ، ބޮސްނިއާ ހެރްޒެގޮވިނާ، އިންޑޮނޭޝީއާ، ކެމްބޯޑިއާ، ތައިލެންޑް، އޮސްޓްރޭލިއާ، ޕިލިޕިންސް، ޔޫކޭ، ޗައިނާ އަދި މިސްރު ހިމެނެއެވެ.