ބީއެމްއެލް ބޭންކު ފަންޑުގެ އެހީގައި ވޭމަންޑޫ ސްކޫލުގައި ސެން ކުލާހެއް

ބޭންކް އޮފް މޯލްޑިވްސް، ބީއެމްއެލްގެ ބޭންކު ފަންޑުގެ އެހީގައި ތ. ވޭމަންޑޫ ސްކޫލުގައި ސެން ކުލާހެއް ތަރައްޤީކޮށްފިއެވެ. މިއީ މިދިޔަ އަހަރު ބޭންކު ފަންޑުގެ ދަށުން އެހީ ލިބުނު ވޭމަންޑޫ ޒުވާނުންގެ ގުޅުމުން ހިންގި މަޝްރޫއެއް ކަމަށް ބީއެމްއެލުން ވިދާޅުވެއެވެ.

ބޭންކް އޮފް މޯލްޑިވްސް އަކީ ހާއްސަ އެހީއަށް ބޭނުންވާ ދަރިވަރުންނަށް ތައުލީމު އުނގަންނައިދިނުމަށް ބޭނުންވާ ވަސީލަތްތައް ފޯރުކޮށްދިނުމަށް އަބަދުވެސް ހާއްސަ އަހުމިއްޔަތުކަމެއް ދޭ ބޭންކެކެވެ. އެގޮތުން ބީއެމްއެލްގެ ބޭންކު ފަންޑުގެ އެހީގައި ތ. ވޭމަންޑޫ ސްކޫލުގައި ސްޕެޝަލް އެޑިއުކޭޝަން ނީޑްސް، ސެން ދަރިވަރުންނަށް ހާއްސަކޮށްގެން ސެންސަރީ އަދި ވޮކޭޝަނަލް ކުލާސްރޫމެއް ތަރައްގީކޮށް މިހާރު ވަނީ ހުޅުވާފައެވެ.

މި ކްލާސް ތަރައްގީކޮށްފައިވަނީ ދަރިވަރުންގެ ގާބިލުކަން އިތުރުކުރުމާއި، އެހެން މިހުންނާ ގުޅިގެން މުޖުތަމައުގައި ހަރަކާތްތެރިވުމަށް ބޭނުންވާ ހުނަރުތައް ދަސްކޮށްދިނުމަށާއި، އެ ކުދިންގެ ތައުލީމީ ބޭނުންތަކަށް ބަލައިގެން ކަމަށް ބީއެމްއެލުން ވިދާޅުވެއެވެ. އަދި އަމާޒަކީ މި ކްލާހުގައި ތައުލީމު ހާސިލުކުރާ ދަރިވަރުންނަށް ކެއްކުމާއި ފެހުން ފަދަ ދިރިއުޅުމުގެ ހުނަރުތައް ދަސްކޮށްދިނުމަށް ކްލާސްރޫމުގެ ޚިދުމަތްތައް އިތުރަށް ފުޅާކުރުން ކަމަށް ވޭމަންޑޫ ސްކޫލާއި ހަވާލާދީ ބީއެމްއެލުން ވިދާޅުވިއެވެ.

ވޭމަންޑޫ ސްކޫލުގައި ތަރައްޤީކޮށްފައިވާ ސެން ކުލާހާއި ގުޅޭގޮތުން ވާހަކަދައްކަވަމުން އެރަށުގެ ޒުވާނުންގެ ގުޅުމުގެ ރައީސް އަޙްމަދު ޝައުގަތު ބުނީ، މި މަޝްރޫއުގެ މައިގަނޑު މަޤްސަދަކީ އުގެނުމުގައި ހާއްޞަ އެހީއަށް ބޭނުންވާ ދަރިވަރުންނަށް ހާއްޞަކުރެވޭ ކުލާހަކުން ތަފާތު ހަރަކާތްތައް ހިންގޭނެ ގޮތެއް ފަހިކޮށްދިނުން ކަމަށެވެ. އަދި މިމަސައްކަތް ކުރުމަށް އެހީތެރިވި ފަރާތްތަށް ފާހަގަކޮށް އެފަރާތްތަކަށް ޝައުގަތު ޝުކުރުއަދާކުރެއްވިއެވެ.

"މިފުރުސަތުގައި ބީއެމްއެލަށް ހިތުގެ ފުންމިނުން އަޅުގަނޑާއި ވޭމަންޑޫގެ ރައްޔިތުންގެ ނަމުގައި ވަރަށް ހާއްސަ ޝުކުރެއް ދަންނަވަން. އަދި މިޖަމިއްޔާގެ މެންބަރުންނަށާއި އެކި ގޮތްގޮތުން މި ޕްރޮޖެކްޓަށް އެހީވެދެއްވި އެންމެހާ ފަރާތްތަކަށާއި މިޕްރޮޖެކްޓް މަސައްކަތްތައް މިހާފުރިހަމަޔަށް އަދި މިހާ އަވަހަށް ނިންމަވާދެއްވީތީވެ ކޮންޓްރެކްޓަރަށްވެސް ވަރަށް ހާއްސަ ޝުކުރެއް ދަންނަވަން." ވޭމަންޑޫ ޒުވާނުންގެ ގުޅުމުގެ ރައީސް އަޙްމަދު ޝައުގަތު ބުންޏެވެ.

މި އަހަރުގެ މިހާތަނަށް ބީއެމްއެލުން ދެ ސްކޫލެއްގައި ސެން ކްލާސްތައް ތަރައްގީކޮށްފައިވެއެވެ. އެގޮތުން ހުޅުމާލޭގައި ހުންނަ ޞަލާޙުއްދީން ސްކޫލާއި، މާލޭ ހިރިޔާ ސްކޫލުގެ ސެން ކްލާސްރޫމްތައް ތަރައްގީކޮށްފައިވެއެވެ. މި ދެ މަޝްރޫއިން 200 އަށްވުރެ ގިނަ ދަރިވަރުންގެ އުނގެނުމުގެ މާހައުލު ތަރައްގީކޮށް، ވަސީލަތްތައް ފަހިކޮށްދޭފައިވާ ކަމަށް ބީއެމްއެލްއިން ވިދާޅުވެއެވެ.

ވޭތުވެދިޔަ އަހަރުތަކުގެ ތެރޭގައި ބީއެމްއެލުން ރާއްޖޭގެ އެކި ކަންކޮޅުތަކުގެ 40 ސްކޫލެއްގެ ސެން ކްލާސްތަކަށް ބޭނުންވާ އާލާތްތައް ވަނީ ހަދިޔާކޮށްފައެވެ. މީގެ އިތުރުން އަތޮޅުތެރޭގެ ސްކޫލުތަކުގެ ކޮމްޕިއުޓަރ ލެބްތައް ތަރައްގީކުރުމަށްވެސް އެހީތެރިކަން ފޯރުކޮށްދީފައިވާކަމަށް އެ ބޭންކުން ވިދާޅުވެއެވެ.

ބޭންކް އޮފް މޯލްޑިވްސްއިން ވިދާޅުވީ ހިލޭސާބަހަށް ކުރާ މަސައްކަތްތަކުގެ ތެރޭގައި ތައުލީމީ ދާއިރާއަށް ހާއްސަ އިސްކަމެއް އެ ބޭންކުން ދޭކަމަށެވެ. އަދި ކުޅިވަރާއި ތިމާވެށްޓާ ގުޅުންހުރި ޕްރޮޖެކްޓްތަކަށްވެސް އިންވެސްޓްކުރަމުން ގެންދެއެވެ. މިފަދަ މަސައްކަތްތަކަކީ މުޖުތަމައުގެ ތަރައްގީއަށް ކޮންމެހެން ބޭނުންވާ ކަންކަމުގެ ގޮތުގައި ވަނީ ފާހަގަކޮށްފައެވެ.