މެސީގެ ދެ ލަނޑާއެކު ލީގްސް ކަޕުގެ ފައިނަލަށް އިންޓަރ މަޔާމީ

ފަހަތުން އަރައި 3-1 ގެ ނަތީޖާއަކުން އޯލަންޑޯ ސިޓީ ބަލިކޮށް، އިންޓަރ މަޔާމީން އެމެރިކާގެ ލީގްސް ކަޕުގެ ފައިނަލުގެ ޖާގައެއް ހޯދައިފިއެވެ.

އިންޓަރ މަޔާމީގެ ޗޭސް ސްޓޭޑިއަމްގައި އެކާވީސް ހާހަށްވުރެ ގިނަ މީހުންގެ ކުރިމަތީގައި އޯލަންޑޯ ސިޓީ އާއި ދެކޮޅަށް ކުޅުނު މި މެޗުގެ ފުރަތަމަ ހާފުގެ ފަހު މިނިޓުގައި މާކޯ ޕެސަލިޗް ވަނީ ލަނޑެއް ޖަހާ އޯލަންޑޯ ސިޓީ އަށް ކުރި ހޯދަދީފަ އެވެ.

މި މެޗުގައި އޯލަންޑޯ ސިޓީ އަށް މައްސަލަތަކާއި ކުރިމަތިލާން ޖެހުނީ މެޗުގެ 74 ވަނަ މިނިޓުގައި ޑޭވިޑް ބްރެކާލޯ އަށް ދެއްކި ދެވަނަ ރީނދޫ ކާޑާއިއެކު އޭނާ ދަނޑުން ފޮނުވާލުމާއި ގުޅިގެންނެވެ.

ޓަޑެއޯ އަލެންޑޯ އަށް ޕެނަލްޓީ އޭރިޔާ ތެރެއިން ބްރެކާލޯ ކުރި ފައުލާއިއެކު ރެފްރީ ވަނީ އިންޓަރ މަޔާމީ އަށް ޕެނަލްޓީ އެއް ދީފަ އެވެ. އަދި ކެޕްޓަން ލިއޮނެލް މެސީ ވަނީ ޕެނަލްޓީ އިން ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.

މި މެޗުގައި އިންޓަރ މަޔާމީ އިން ފުރަތަމަ ފަހަރަށް ކުރި ހޯދާފައިވަނީ މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް ޖޯޑީ އަލްބާގެ އެސިސްޓަކުން ލިއޮނެލް މެސީ ކާމިޔާބުކޮށްދިން ލަނޑުންނެވެ.

އިންޓަރ މަޔާމީ އިން މި މެޗުގައި ޖެހި ތިންވަނަ ލަނޑަކީ މެޗުގެ އިތުރު ވަގުތުގެ ކުޅުމުގައި ޓެލަސްކޯ ސެގޯވާ ކާމިޔާބުކޮށްދީފައިވާ ލަނޑެކެވެ.

މި މުބާރާތުގެ ފައިނަލުގައި އިންޓަރ މަޔާމީ އާއި ދެކޮޅަށް ކުޅޭނެ ޓީމެއް އެނގިގެންދާނީ އަންނަ އާދީއްތަ ދުވަހު ސެމީ ފައިނަލުގެ ދެވަނަ މެޗުގައި ލޮސް އެންޖަލެސް ގެލެކްސީ އާއި ސިއޭޓަލް ސައުންޑާރސް ބައްދަލުކުރާ މެޗަށްފަހުގަ އެވެ.