4 ވަނަ ދިރާގު އިންޓަނޭޝަނަލް އިންލައިން ސްޕީޑް ސްކޭޓިންގ ޗެމްޕިއަންޝިޕު ރާއްޖޭގައި ފެށުމަށް ތައްޔާރުވެއްޖެއެވެ.
ސްކޭޓް މޯލްޑިވްސްއިން އިން އިންތިޒާމުކުރާ މިމުބާރާތް ކުރިއަށްދާނީ މިމަހުގެ 4 އިން 6 އަށް މާލޭގެ އިތުރުން ހުޅުމާލޭގައިއެވެ.
އަންނަ ބުރާސްފަތި ދުވަހަށް ތާވަލުކޮށްފަވާ މުބާރާތާއި ގުޅޭގޮތުން ޕީއެސްއެމް ނިއުސްއަށް މައުލޫމާދެއްވަމުން ސްކޭޓް މޯލްޑިވްސްގެ ރައީސް މުޙައްމަދު ހާނިމް ވިދާޅުވީ މިމުބާރާތުގައި އަވަށްޓެރި އިންޑިއާ، ސްރީލަންކާ އަދި ނޭޕާލުން ބައިވެރިވާގޮތަށް ހަމަޖެހުނުކަމަށާއި، އެހެންނަމަވެސް މިހާތަނަށް ޔަގީންކަން ލިބިފައިވަނީ ނޭޕާލުގެ ޓީމުގެ ފަރާތުންކަމަށެވެ.
އިންޑިއާއިންވެސް މުބާރާތަށް ތައްޔާރުވި ނަމަވެސް ދުވަސްކޮޅުގެ ގޮތުން އަންނަން ދަތިވީކަމަށް ހާނިމް ވިދާޅުވިއެވެ. އަދި ސްރީލަންކާގެ ޓީމުން މިހާރުވެސް މަސައްކަތްކުރަމުންދަނީ މުބާރާތުގެ ކުރިން އާދެވޭތޯކަމަށާއި، މިއީ ސްކޫލު ދުވަސްވަރުކަމުން ސްރީލަންކާގެ އެޑިއުކޭޝަން މިނިސްޓްރީއިން ނަގަންޖެހޭ ހުއްދަތަކެއް ހުރުމުން ލަންކާ ޓީމަށް މުބާރާތުގައި ވާދަކުރުމަށް އައުމަށް ދަތިވެފައިވަނީކަމަށް ހާނިމް ވިދާޅުވިއެވެ.
"މިމުބާރާތުގައި ރާއްޖެއިން ބޭރުންވެސް ތިން ގައުމަކުން ޓީމުތައް ބައިވެރިވާގޮތަށް އޮތީ. އެހެންނަމަވެސް އަޅުގަނޑުމެންނަށް މިހާތަނަށް ސަތޭކަ ޕަސެންޓު ކޮންފާރމްވީ ނޭޕާލުގެ ޓީމު. ނޭޕާލުގެ ޓީމުވެސް ވަރަށް ފަހުގެ ވަގުތެއްގައި މި ކޮންފާރމްވީ. އެއީ އަށް ދުއްވުންތެރިންނާއި ދެ އޮފިޝަލުންނާ. އަށް ދުއްވުންތެރިންގެ އުމުރުފުރާތައް ބަހާލެވިފަ އޭނދީ ގާތްގަނޑަކަށް އަޅުގަނޑުމެންގެ މިއޮތް ނުވަ އުމުރުފުރާގެ ތެރެއިން ހަތް އުމުރުފުރާއަކަށް ކުދިން އެ ބޭފުޅުން ލާފަ އެތިބީ. ދެން އިންޑިއާ ޓީމުންވެސް ބާވީސް ދުއްވުންތެރިން އަންނަ ގޮތަށް ރޭވިފައޮތީ" ހާނިމް ވިދާޅުވިއެވެ.
އިންޑިއާ އަދި ސްރީލަންކާގެ ޓީމާމެދު މާބޮޑު އުންމީދެއް ނެތް ނަމަވެސް ނޭޕާލުން ދުއްވުންތެރިން އަންނާނެކަމުގެ ޔަގީންކަންވަނީ ލިބިފަވާކަމަށް ހާނިމް ވިދާޅުވިއެވެ. ނޭޕާލުގެ ސްކޭޓަރުން މިމަހުގެ 3 ވަނަ ދުވަހު ރާއްޖެ އައުމަށް ހަމަޖެހިފައިވާކަމަށާ އެއީ އަށް އެތުލީޓުންނާއި ދެ އޮފިޝަލުންކަމަށް ހާނިމް މައުލޫމާތުދެއްވިއެވެ.
"ނޭޕާލު ޓީމު ހަމަ އެރައިވްވާނެ އޮން ތާރޑް އޮފް ސެޕްޓެމްބަރގައި އިނގޭތޯ" ހާނިމް ވިދާޅުވިއެވެ.
މިއަހަރުގެ މުބާރާތުގައި 5 އަހަރުންދަށުގެ އުމުރުފުރާގައިވެސް ދެ ޖިންސުން ވާދަކުރާނެކަމަށާ އޭގެ އިތުރުން ބޮޑެތި މީހުންނަށް ޚާއްސަ މާސްޓާރސް ކެޓެގަރީގައިވެސް ސްކޭޓަރުން ފެނިގެންދާނެކަމަށް ހާނިމް ވިދާޅުވިއެވެ. މިމުބާރާތުގައި ދުއްވުންތެރިން ވާދަކުރާނެ ކެޓަގަރީތަކުގެ ތެރޭގައި 5 އަހަރުންދަށް، 5 އަހަރާއި 7 އަހަރާއި ދެމެދު، 7 އަހަރާއި 9 އަހަރާއި ދެމެދު، 9 އަހަރާއި 11 އަހަރާއި ދެމެދު، 11 އަހަރާއި 13 އަހަރާއި ދެމެދު، 13 އަހަރާއި 15 އަހަރާއި ދެމެދު، 15 އަހަރާއި 17 އަހަރާއި ދެމެދު، 18 އަހަރާއި 30 އަހަރާއި ދެމެދުގެ އުމުރުފުރާގެ އިތުރުން ދެން އޮންނާނީ މާސްޓާރސް ކެޓެގަރީއެވެ.
މުބާރާތުގެ އިންތިޒާމުތަކާއި ގުޅޭގޮތުން މިމުބާރާތުގެ ޓޯނަމެންޓު ޑިރެކްޓަރ ޢަބްދުﷲ ރަޝީދު ވިދާޅުވީ ތިން ދުވަހަށް މުބާރާތް ކުރިއަށްދާއިރު، ބުރާސްފަތި ދުވަހުގެ ހެނދުނު މުބާރާތް ފަށާނީ ހުޅުމާލެއިންކަމަށެވެ. އަދި ޖެހިގެން އަންނަ ހުކުރުދުވަހުގެވެސް ހެނދުނު ދަންފަޅި ހުޅުމާލޭގައި ބޭއްވުމަށްފަހު އެދުވަހު ހަވީރު އޯޕަނިންގ ސެރެމަނީއާއެކު މުބާރާތް ކުރިއަށްދާނީ މާލޭ އުސްފަސްގަނޑުގައިކަމަށް ޢަބްދުﷲ ވިދާޅުވިއެވެ. އެއަށްފަހު ހޮނިހިރު ދުވަހު މުބާރާތް ނިންމާލާނެކަމަށާއި މުބާރާތަށް ވާންޖެހޭ އެންމެހާ ތައްޔާރީތައް މިހާރު ނިމިފައިވާކަމަށް އޭނާ މައުލޫމާތުދެއްވިއެވެ.
"މުބާރާތުގެ މިހާތަނަށް އައިއިރު މިތިބީ ގާތްގަނޑަކަށް ވާންޖެހޭ ހުރިހާ ތައްޔާރީތަކެއް ވެފަ. ވެނިއު ތައްޔާރުކުރުމާއި، ޓްރާންސްޕޯޓާއި، ފަރސްޓް އެއިޑާއި، މެޑިކަލްއާއި އަދި އެހެނިހެން ކަންކަމާއި ޓީމުތަކުގެ އެރޭންޖްމަންޓްސްތަކާއި މުބާރާތުގެ ޓެންޓުތައް ހުންނަގޮތާއި ހުރިހާ ކަމެއް ރޭވިފަ. ޓީމުތައް ބެހިފަ އިނގޭތޯ. އަޅުގަނޑުމެން އުންމީދުކުރަނީ މުބާރާތުގެ އެއްވެސް ހިކަޕެއް ނުޖެހި ވަރަށް ސްމޫތުކޮށް ނިންމާލެވޭނެކަމަށް" ޢަބްދުﷲ ވިދާޅުވިއެވެ.
2023 ވަނަ ބޭއްވި ތިންވަނަ އިންލައިން ސްޕީޑް ސްކޭޓް ޗެމްޕިއަންޝިޕަށްވެސް ވަނީ ބޮޑު ތަރުހީބެއް ލިބިފައެވެ. އެއަހަރުގެ މުބާރާތުގައި 10 ކެޓެގަރީއަކުން 79 ސްކޭޓަރުން ވާދަކޮށްފަވެއެވެ.