ދިވެހި ފައިސާގެ ކުރީގެ ނޫޓުތައް، ވިޔަފާރީގެ މުޢާމަލާތުތަކުގައި ބޭނުންކުރުން ހުއްޓާލާފައިވާއިރު، ކުރީގެ ނޫޓުތަކުގެ ތެރެއިން މިހާރު ނުލިބި ހުރީ 217 މިލިއަން ރުފިޔާކަމަށް އެމްއެމްއޭއިން ހާމަކުރައްވައިފިއެވެ.
ރާއްޖޭގެ ލީގަލް ޓެންޑަރގެ ގޮތުގައި ކުރީގެ ފައިސާ ބޭނުންކުރުން ހުއްޓާލައްވާފައިވަނީ، އޮގަސްޓްމަހުގެ އެއްވަނަ ދުވަހުން ފެށިގެންނެވެ.
އެމްއެމްއޭއިން ހާމަކުރެއްވި ގޮތުގައި ކުރިން ބޭނުންކުރަމުން ގެންދިޔަ ނޫޓުގެ 2،901 މިލިއަން ރުފިޔާ، މިއަހަރުގެ ޖެނުއަރީމަހުގެ 25 އާ ހަމައަށް، އިޤްތިޞާދުގައި ދައުރުވަމުން ދިޔަނަމަވެސް، މިމަހުގެ 15ވަނަ ދުވަހުގެ ނިޔަލަށް، 2،684 މިލިއަން ރުފިޔާ އެމްއެމްއޭއަށް ނަންގަވާފައިވެއެވެ. އެއީ ކުރިން ބޭނުންކުރަމުން ގެންދިޔަ ނޫޓްތަކުގެ 92.5 އިންސައްތައެވެ. އަދި ބާކީ ނުނެގި ހުރީ 217 މިލިއަން ރުފިޔާ، ނުވަތަ 7.5 އިންސައްތަ ނޫޓުކަމަށް އެމްއެމްއޭއިން ވިދާޅުވެއެވެ.
img:http://s2.psmnews.mv/images/660x400/5366.jpg|ކުރީގެ 500ރ ގެ ނޫޓް ތަކެއް- ފޮޓޯ: ޕީއެސްްއެމް
ދިވެހިރާއްޖޭގެ ލީގަލް ޓެންޑަރ ކަމުގައިވާ ރުފިޔާގެ ތެރެއިން، 2015 އޮކްޓޫބަރު މަހުގެ 5 ވަނަ ދުވަހުގެ ކުރިން ނެރުއްވާފައިވާ 2 ރުފިޔާ، 10 ރުފިޔާ، 20 ރުފިޔާ، 50 ރުފިޔާ، 100 ރުފިޔާ އަދި 500 ރުފިޔާގެ ހުރިހާ ކަރުދާސް ނޫޓުތަކަކީ، 2016 ވަނަ އަހަރުގެ އޮގަސްޓު މަހުގެ 1 ވާ ހޯމަ ދުވަހުން ފެށިގެން ދިވެހިރާއްޖޭގެ ލީގަލް ޓެންޑަރ ނޫންކަމަށް ވަނީ ކަނޑައަޅުއްވާފައެވެ.
ވިޔަފާރީގެ މުޢާމަލާތްތަކުގައި ކުރީގެ ފައިސާ ބޭނުންކުރުން ހުއްޓާލައްވާފައިވީ ނަމަވެސް އޭޓީއެމް ޑިޕޮސިޓް މެޝިންތަކުންނާއި ރާއްޖޭގެ ބޭންކުތަކުން ކުރީގެ ނޫޓު ރަންދިހަ ފަހެއްގެ ނޫޓަށް ބަދަލުކުރެވޭނެއެވެ. އަދި ކުރިއަށްއޮތް ފަސްއަހަރުދުވަހު އެމްއެމްއޭއިން ކުރީގެ ނޫޓުތައް ރަންދިހަ ފަހެއްގެ ނޫޓުތަކަށް ބަދަލުކޮށްދެއްވާނެ ކަމަށްވެސް އެ އޮތޯރިޓީން ވިދާޅުވެއެވެ.