ޑިމޮކްރެޓިކް ވެށި ހަރުދަނާކޮށް، އިންތިޚާބަށް ހޭލުންތެރިކުރުމަށް ޚާއްސަ ޕްރޮގުރާމްތަކެއް!

ރާއްޖޭގެ ޑިމޮކްރެޓިކް ވެށި ހަރުދަނާކުރުމަށާއި، އަންނަ އަހަރު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބާއި ގުޅިގެން އިލެކްޝަން ކޮމިޝަނުން އަތޮޅުތެރޭގައި ހޭލުންތެރިކުރުމުގެ ޕްރޮގުރާމްތައް ފަށައިފިއެވެ.

މި ޕްރޮގުރާމަކީ ޑިމޮކްރެޓިކް ވެށި ހަރުދަނާކުރުމުގެ ގޮތުން ރައްޔިތުންނަށް މަޢުލޫމާތު ފޯރުކޮށްދީ، ރާއްޖޭގެ ޑިމޮކްރެޓިކް ނިޒާމު ހިނގާގޮތާއި، އަސާސްތަކާއި، ރައްޔިތުންނަށް ލިބިދޭ ހައްޤުތަކާއި، ނިޒާމުގައި ހިމެނޭ މީހުން ނަގަންޖެހޭ ޒިންމާތަކާއި، އިންތިޚާބީ ނިޒާމަށް އާންމުން ހޭލުންތެރިކުރުވުމަށް ކުރިއަށްގެންދާ ޕްރޮގުރާމެކެވެ.

މި ޕްރޮގްރާމު 12 އަތޮޅެއްގެ 36 ރަށެއްގައި ދަނީ ކުރިއަށްގެން ދަމުންނެވެ. ހއ، ށ، ނ، ރ، ޅ، އދ، ފ، ތ، ގއ، ގދ، އައްޑޫ ސިޓީ، އަދި ފުވައްމުލަކު ސިޓީގައި މި ޕްރޮގުރާމް ކުރިއަށްގެންދިއުމަށް ހަމަޖެހިފައިވާކަމަށް އިލެކްޝަންސް ކޮމިޝަނުން ވިދާޅުވެއެވެ.

މި ޕްރޮގްރާމުގައި ވޯޓުލުމުގެ ހައްޤުލިބިފައިވާ އެކި އުމުރު ފުރައިގެ މީހުންނަށް މަޢުލޫމާތު ފޯރުކޮށްދިނުމުގެ ގޮތުން ސެޝަންތަކުގެ އިތުރުން ޒުވާނުންނަށް އަމާޒުކޮށްގެން ސެޝަންތަކެއް ކުރިއަށްގެންދިއުމަށް ހަމަޖެހިފައިވެއެވެ. މި ޕްރޮގުރާމުގައި، ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެންޓި ކޮރަޕްޝަން ކޮމިޝަން އަދި އިސްލާމިކް ޔުނިވަރސިޓީ އޮފް މޯލްޑިވްސް ލާރނިންގ ސެންޓަރ (ފުވައްމުލައް ސިޓީ) ބައިވެރިވެއެވެ. މި ޕްރޮގްރާމް ކުރިއަށްދިއުމަށް ހަމަޖެހިފައިވަނީ މިމަހުގެ 28 އިން ޑިސެމްބަރު 2އާ ހަމައަށެވެ.

ކުރިއަށްއޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބު ބޭއްވުމަށް މިހާރު ތާވަލުކޮށްފައިވަނީ އަންނަ މާރިޗުމަހުގައެވެ. ކެންޑިޑެސީއަށް ހުޅުވާލުމަށް ހަމަޖެހިފައިވަނީ އަންނަ ޖެނުއަރީމަހުގައެވެ.

ކައުންސިލް އިންތިޚާބު ބޭއްވުމަށްޓަކާ 70 ނުވަތަ 80 މިލިޔަނެއްހާ ރުފިޔާ ޚަރަދުވާނެކަމަށް އިލެކްޝަންސް ކޮމިޝަނުން ލަފާކުރައްވައެވެ.