ޚަބަރު

މޫސުން އަލިވާން ފަށާނީ އަންނަ ބުރާސްފަތި ދުވަހުން ފެށިގެން: މޫސުމާ ބެހޭ އިދާރާ


  • އުތުރާއި މެދު ރާއްޖެ ތެރޭގެ އެކި ހިސާބުތަކަށް ވިއްސާރަކުރުމާއެކު ގުގުރާނެ

  • މޫސުން ގޯސްވެފައިވަނީ ލަންކާ ސަރަހައްދުގައި އުފެދިފައިވާ ތޫފާނަކާ ގުޅިގެން

މިހާރު ރާއްޖޭގެ އެކި ހިސާބުތަކަށް ކުރަމުންދާ ވިއްސާރަ އަލިވާން ފަށާނީ އަންނަ ބުރާސްފަތި ދުވަހުން ފެށިގެންކަމަށް ދިވެހިރާއްޖޭގެ މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ.

މޫސުމާ ބެހޭ ޤައުމީ އިދާރާއިން ވިދާޅުވީ ރާއްޖެއަށް މިހާރު ކުރަމުންދާ ވިއްސާރައަކީ ރާއްޖެއާއި ކައިރިން ސްރިލަންކާގެ ސަރަހައްދުގައި އުފެދިފައިވާ ތޫފާނަކާ ގުޅިގެން ކުރަމުންދާ ވިއްސާރައެއް ކަމަށެވެ.

އެންމެ ފަހުން މޫސުމާ ބެހޭ އިދާރާއިން ހާމަކުރި މަޢުލޫމާތަށް ބަލާއިރު، "ޑިޓުވާ" ތޫފާން މިހާރު ހުރީ ހއ. ތުރާކުނުގެ އިރުއުތުރުން ގާތްގަނޑަކަށް 875 ކިލޯމީޓަރު ދުރުގައެވެ. އަދި މި ތޫފާން ދަތުރުކުރާނެކަމަށް ލަފާކުރެވެނީ ރާއްޖެއާ ދުރަށްކަމަށް މޫސުމާ ބެހޭ އިދާރާއިން ވިދާޅުވެއެވެ.

މޫސުމާ ބެހޭ އިދާރާއިން ވިދާޅުވީ އުތުރާއި މެދު ރާއްޖެ ތެރޭގެ އެކި ހިސާބުތަކަށް ވިއްސާރަކުރުމާއެކު ގުގުރާނެ ކަމަށެވެ. އަދި ބައެއް ރަށްރަށަށް ބޯކޮށް ވާރޭވެހުން އެކަށީގެންވާ ކަމަށާއި ދެކުނުގެ ބައެއް ރަށްރަށަށް ކެރީގެ އަސަރުކުރުން އެކަށީގެންވާކަމަށް ވެސް މޫސުމާ ބެހޭ އިދާރާއިން ވިދާޅުވިއެވެ.

މޫސުމާބެހޭ އިދާރާއިން ވިދާޅުވީ އުތުރުގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެކަމަށާއި އެހެން ހިސާބުތަކަށް ހުޅަނގުދެކުނާއި ހުޅަނގުން ގަޑިއަކު 10 މޭލާއި 20 މޭލާ ދެމެދުގެ ބާރު މިނުގައި ވައިޖެހޭނެ ކަމަށެވެ. އަދި ވިލާގަނޑުގައި ގަޑިއަކު 35 މޭލަށް ވައިގަދަވުން އެކަށީގެންވާކަމަށް އެ އިދާރައިން ވިދާޅުވިއެވެ.

މޫސުމާ ބެހޭ އިދާރާއިން ލަފާކުރައްވާ ގޮތުގައި ރާއްޖޭގެ އުތުރުގެ ކަނޑުތައް އާދައިގެ ވަރަކަށް މަޑުވާނެއެވެ. ނަމަވެސް އެހެން ހިސާބުތަކުގެ ކަނޑުތައް އާދައިގެ ވަރަކަށް ގަދަވާނެކަމަށް ލަފާކުރައްވައެވެ. މޫސުމާ ބެހޭ ޤައުމީ އިދާރާއިން ވިދާޅުވީ ރާއްޖޭގެ މޫސުން އަލިވާނެކަމަށް ލަފާކުރެވެނީ އަންނަ ބުރާސްފަތި ދުވަހުން ފެށިގެން ކަމަށެވެ.

ރާއްޖޭގެ އެކި ހިސާބުތަކަށް މޫސުން ގޯސްވެ، ވިއްސާރަކުރަމުންދާ މި ދަނޑިވަޅުގައި ސަމާލުވެ، ރައްކާތެރިކަމުގެ ފިޔަވަޅުތައް ދުރާލާ އަޅައިގެން ތިބުމަށާއި ކަނޑު ދަތުރުފަތުރުކުރާއިރު ސަމާލުވުމަށް ކަމާ ބެހޭ އިދާރާތަކުން ވަނީ އިލްތިމާސްކުރައްވާފައެވެ.