ޚަބަރު

މި އަހަރުގެ އޮފް ސީޒަންގައި ފަތުރުވެރިކަން ކުރިއަރައި، ފެނުނީ ޑަބަލް ޑިޖިޓުގެ ކުރިއެރުމެއް: ޝިއުރީ


  • އަހަރުގެ މިހާތަނަށް 2 މިލިޔަން ފަތުރުވެރިން ވަނީ ޒިޔާރަތްކޮށްފައި

  • އެންމެ ގިނައިން ފަތުރުވެރިން އަންނަނީ ޗައިނާއިން

މިއަހަރު ފަތުރުވެރިކަމުގެ އޮފް ސީޒަންގައިވެސް ރާއްޖޭގެ ފަތުރުވެރިކަން ކާމިޔާބުކަމަށް ވިޒިޓް މޯލްޑިވްސް ކޯޕަރޭޝަންގެ މެނޭޖިންގ ޑިރެކްޓަރ އިބްރާހީމް ޝިއުރީ ވިދާޅުވެއްޖެއެވެ. އާންމުގޮތެއްގައި ރާއްޖެއަށް ފަތުރުވެރިން އަންނަ ގޮތަށް ބަލާއިރު އޮފް ސީޒަންގައި ގިނަ އަދަދެއްގެ ފަތުރުވެރިންނެއް ނާދެއެވެ.

ސަރުކާރަށް 2 އަހަރު ވުމާއި ގުޅިގެން ޕީއެސްއެމް ނިއުސްއިން ގެނެސްދިން "ހަފްތާ 104" ޕްރޮގްރާމްގައި ވާހަކަދައްކަވަމުން ވިޒިޓް މޯލްޑިވްސް ކޯޕަރޭޝަންގެ މެނޭޖިންގ ޑިރެކްޓަރ އިބްރާހީމް ޝިއުރީ ވިދާޅުވީ، ރާއްޖެ އިޝްތިހާރުކުރުމަށްޓަކައި އެ ކުންފުނިން ގިނަ މަސައްކަތްތަކެއް ކުރައްވަމުން ގެންދަވާކަމަށެވެ. އެގޮތުން މަޤްބޫލު މަޝްހޫރު ފަރާތްތައް މެދުވެރިކޮށް ރާއްޖެ އިޝްތިހާރުކުރުމުގެ މަސައްކަތް ކޮށްފައިވާކަމަށާއި މީގެ ނަތީޖާވެސް ފެންނަމުންދާކަމަށް ޝިއުރީ ވިދާޅުވިއެވެ.

ޝިއުރީ ވިދާޅުވީ، މިއަހަރުގެ އޮފް ސީޒަންގައިވެސް ފަތުރުވެރިން ރާއްޖެ އައި އަދަދަށް ބޮޑު ކުރިއެރުމެއް ލިބިފައިވާކަމަށެވެ. އެގޮތުން މިއަހަރުގެ އޮފް ސީޒަންގައި ޑަބަލް ޑިޖިޓްގެ ކުރިއެރުމެއް ހޯދާފައިވާކަން ފާހަގަކުރެއްވިއެވެ.

"އާންމުކޮށް އޮފް ސީޒަންގައި ޑަބަލް ޑިޖިޓް ގްރޯތެއް ނުލިބޭ. ސިންގަލް ގްރޯތް ޑިޖިޓެއް މި ފެނިގެންދިޔައީ. މިއަހަރު އޮފް ސީޒަންގައި ވަރަށް ކާމިޔާބު. ކުރިއަށްގެންދެވުނު ކެންޕެއިންތަކުގެ ސަބަބުން ކަމަށް އަޅުގަނޑުމެން މިބަލަނީ. އަޅުގަނޑުމެން އެކަންޏެއް ނޫން އިންޑަސްޓްރީގެ ރިސޯޓްތަކުންވެސް ވަރަށް ގިނަ މަސައްކަތްތަކެއް އެބަ ކުރައްވާ. އެބޭފުޅުންގެ މާކެޓިން ޓީމްތަކުންވެސް ވަރަށް ގިނަ މަސައްކަތްތަކެއް އެބަ ކުރައްވާ. ކޮލަބޮރޭޓިވްލީ މި ކުރެވޭ މަސައްކަތުގެ ނަތީޖާއޭ އަޅުގަނޑު ދަންނަވާލާނީ." ޝިއުރީ ވިދާޅުވިއެވެ.

މިދިޔަ އަހަރުގެ ނޮވެމްބަރ މަހު ވިޒިޓް މޯލްޑިވްސްއިން ވަނީ ދުނިޔޭގައިވެސް މިހާތަނަށް ކުރިއަށްގެންދާ އެންމެ ބޮޑު އެއް ކެމްޕެއިން "ވޯލްޑްސް ބިގަސްޓް ގިވްއަވޭ" ފަށާފައެވެ. މި ކެމްޕެއިނަކީ 1 އަހަރު ދުވަހުގެ ކެމްޕެއިނެކެވެ.

ވިޒިޓް މޯލްޑިވްސްއިން ވިދާޅުވީ، ދުނިޔޭގެ އެކި ކަންކޮޅުތަކުގައި ރާއްޖެ އިޝްތިހާރުކުރުމުގެ މަސައްކަތް ކުރައްވަމުން ގެންދަވާކަމަށެވެ. މައިގަނޑު ގޮތެއްގައި އިސްކަންދެނީ ރާއްޖެއަށް އެންމެ ގިނައިން ފަތުރުވެރިން އަންނަ ގަދަ 10 މާކެޓަށްކަމަށެވެ. އަލަށް އަރަމުން އަންނަ މާކެޓްތަކަށްވެސް އިސްކަންދީގެން ހަރަކާތްތައް ހިންގަމުންދާކަމަށް ވިދާޅުވިއެވެ.

މިއަހަރުގެ މިހާތަނަށް ރާއްޖެއަށް 2 މިލިޔަން ފަތުރުވެރިން ވަނީ ޒިޔާރަތްކޮށްފައެވެ. މީގެތެރެއިން އެންމެ ގިނަ ފަތުރުވެރިން ޒިޔާރަތްކުރީ ޗައިނާއިންނެވެ. އެ ޤައުމުން ރާއްޖެއަށް 3 ލައްކައަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.