މީޑިއާތަކުގެ އިލްތިމާސް: "ސިލޯނާއެކު ދިވެހީން" ޓެލެތޯންގައި ހުރިހާ ދިވެހީން ބައިވެރިވެ އެހީތެރިވަމާ!

ސްރީލަންކާއަށް ދިމާވެފައިވާ ކާރިސީ ޙާލަތުގައި އެޤައުމަށް އެހީތެރިކަން ފޯރުކޮށްދިނުމަށް، ދިވެހި މީޑިއާތަކުން ފެށި ޚާއްސަ ޓެލެތޯނަށް މުޅި ޤައުމު އެކަތިގަނޑަކަށްވެގެން އެހީތެރިވުމަށް މީޑިއާތަކުން އިލްތިމާސްކޮށްފިއެވެ.

"ސިލޯނާއެކު ދިވެހީން" ޓެލެތޯން ކުރިއަށްގެންދިޔުމަށް ހަމަޖެހިފައިވަނީ މިއަދު ހެނދުނު 9 އަކުން މިރޭ މެންދަމު 1 ޖެހުމާހަމައަށެވެ.

މިމަހުގެ 26 ވަނަ ދުވަހު ސްރީލަންކާއަށް ކުރިމަތިވި ތޫފާން ދީތުވާއާއި ގުޅިގެން އެޤައުމުވަނީ ކާރިސީ ޙާލަތުގައެވެ. ބައިނަލްއަޤުވާމީ އެހީތެރިކަން އެންމެ ބޮޑަށް ސްރީލަންކާއަށް ބޭނުންވެފައިވާ މިދަނޑިވަޅުގައި ދިވެހި މީޑިއާތަކުން އިސްވެ ވަނީ ޚާއްސަ ޓެލެތޯނެއް ފަށާފައެވެ.

މިޓެލެތޯން ފެށުމަށް ބޭއްވި ޚާއްސަ ރަސްމިއްޔާތުގައި ޕީއެސްއެމް ނިއުސްގެ ޑެޕިއުޓީ ޑިރެކްޓަރ އަޙްމަދު ޖަދުޢާންވަނީ މިޓެލެތޯންގައި ހުރިހާ ދިވެހި ރައްޔިތުން ބައިވެރިވުމަށް އެދިލައްވާފައެވެ. އަދި މިއީ ދިވެހީންގެ ޓެލެތޯނެއްކަމަށް ވިދާޅުވިއެވެ. މާލޭގެ އިތުރުން އަތޮޅުތަކުންވެސް މިޓެލެތޯންގައި ބައިވެރިވުމުގެ ފުރުސަތުވަނީ ހުޅުވާލާފައެވެ.

"މިއީ ވަކި ބައެއްގެ ޓެލެތޯނެއް ނޫން. މިއީ ދިވެހީންގެ ޓެލެތޯން. ޓެލެތޯންގައި ބައިވެރިވާން ބޭނުންވާ ކޮންމެ ފަރާތަކަށް ފެށިގެން ނިމެންދެން އެފުރުސަތު ވަނީ ހުޅުވާލެވިފައި." ޖަދުޢާން ވިދާޅުވިއެވެ.

މިޓެލެތޯންގައި ރާއްޖޭގެ 37 މީޑިއާއަކުން ބައިވެރިވެފައިވާއިރު، އިތުރު މީޑީއާތަކަށް ބައިވެރިވުމުގެ ފުރުސަތުވަނީ ހުޅުވާލާފައެވެ.

ޓެލެތޯން ފެށުމުގެ ގޮތުން ބޭއްވި ރަސްމިއްޔާތުގައި ބައިވެރިވި މީޑިއާތަކުންވަނީ މިއީ މީޑިއާތަކުން އިސްނަގައިގެން ކުރިއަށްގެންދާ ހަރަކާތެއްނަމަވެސް، މިކަމުގައި ހުރިހާ ދިވެހީން ބައިވެރިވުމާއި އެއްބާރުލުން ދެއްވުމަށް ވަނީ އިލްތިމާސްކުރައްވާފައެވެ.

"ޒުވާނުން އަބަދުވެސް ދައްކާވާހަކައެއް، ދުނިޔެ ބަދަލުކުރުމުގެ ވާހަކަ. މިދަނޑީވަޅަކީ އަޅުގަނޑުމެން ޒުވާނުން ތެދުވެ ލަންކާގެ ޙާލަތު ބަދަލުކުރުމަށް މަސައްކަތްކުރަންވީ ވަގުތު. އަޅުގަނޑުމެންގެ އެދުމަކީ ހުރިހާ ޒުވާނުންވެސް މިކަމުގައި އެހީތެރިކަން ފޯރުކޮށްދިނުން." މީޑީއާއަކުން ދެންނެވިއެވެ.

"ސްރީލަންކާގެ ދަނޑުތަކަށް ބޮޑު އަސަރެއްކޮށްފައިވާއިރު އެއީ އެޤައުމުގެ ރައްޔިތުން ޢާމްދަނީ ހޯދުމަށްކުރާ މަސައްކަތް މިވަނީ ފެނުއަޑީގައި. އެހެންވީމަ އަޅުގަނޑުމެންގެ އެހީ ވަރަށް ބޮޑަށް މިވަގުތު ބޭނުންޖެހިފައިވަނީ." މީޑިއާއަކުން ވިދާޅުވިއެވެ.

"އަޅުގަނޑުމެންނަކީ މުސްލިމުންނަށްވެތިބެ އެކަކު އަނެކަކަށް އިޙްތިރާމް އަދާކޮށް އެހީތެރިވުމަކީ އަޅުގަނޑުމެން އެންމެންގެ މައްޗަށްއޮތް ކަމެއް." މީޑިއާއަކުން ވިދާޅުވެއެވެ.

މީޑިއާ ޓެލެތޯންއަށް އެހީތެރިވާން ބޭނުންވާ ފަރާތްތަކުން ބީއެމްއެލްގެ އެކައުންޓްތަކަށް އަދި ޓީވީ ބިލްޑިންގއާއި މާލޭގެ އެކި ސަރަޙައްދުތަކުގައި ބަހައްޓާފައިވާ ފޮށިތަކަށް އެހީތެރިކަން ފޯރުކޮށްދިނުމުގެ ފުރުސަތުވަނީ ހުޅުވާލާފައެވެ. މިޓެލެތޯން މިރޭ މެންދަމު 1 ޖެހުމާ ހަމައަށް ކުރިއަށްގެންދިޔުމަށްވަނީހަމަޖެހިފައެވެ.